Është zyrtare: nga mesi i vitit 2027, pasagjerët ajrorë në të gjithë Bashkimin Evropian do të përfitojnë nga të drejta më të zgjeruara dhe mbrojtje më të fortë gjatë udhëtimeve të tyre. Parlamenti Evropian dhe Këshilli Evropian kanë miratuar marrëveshjen e arritur në qershor, e cila synon të përmirësojë mbrojtjen e pasagjerëve në rast të ndërprerjeve, vonesave dhe problemeve të tjera gjatë fluturimeve.
Bashkëligjvënësit e BE-së e finalizuan marrëveshjen më 15 qershor për përditësimin e rregullave që rregullojnë të drejtat e pasagjerëve. Më pas, ajo u miratua nga Parlamenti Evropian më 7 korrik, me 646 vota pro dhe 12 kundër. Përfundimisht, Këshilli dha miratimin përfundimtar më 13 korrik, duke hapur rrugën që rregullat e reja të hyjnë në fuqi nga viti 2027.
Komisioni Evropian e kishte propozuar për herë të parë rishikimin e këtyre rregullave në vitin 2013. Por procesi u bllokua për shkak të dallimeve mes bashkëligjvënësve lidhur me nivelin e mbrojtjes që duhej t’u ofrohej pasagjerëve. Në marrëveshjen e qershorit, Parlamenti Evropian arriti të ruajë në masë të madhe standardet ekzistuese të mbrojtjes, duke kundërshtuar përpjekjet për zbutjen e disa prej masave.
Një nga elementet kryesore të rregullave të reja lidhet me mënyrën se si pasagjerët do të marrin kompensim dhe si do të funksionojnë procedurat për raste vonesash apo anulimesh. Marrëveshja synon të sjellë procedura më të qarta për rimbursime, transparencë më të madhe të çmimeve dhe ndalimin e praktikës së anulimit të fluturimit për pasagjerët që nuk paraqiten në segmentin e parë të udhëtimit, të njohura si fluturime “no-show”.
Rregullat e reja rrisin mbrojtjen dhe e bëjnë kompensimin më të lehtë
Eurodeputeti Andrey Novakov, nga Partia Popullore Evropiane dhe raportues për të drejtat e pasagjerëve ajrorë në Parlamentin Evropian, ka theksuar se ndryshimet nuk lidhen vetëm me zgjerimin e të drejtave, por edhe me përmirësimin e zbatimit të tyre në praktikë. Ai u shpreh se procedura synon t’i bëjë më të arritshme dhe reale dëmshpërblimet për pasagjerët, duke kaluar nga “përmirësim vetëm në letër” drejt marrjes së kompensimit konkret.
Ndërkohë, eurodeputetët i kanë mbajtur të paprekura disa të drejta thelbësore. Pasagjerët do të vazhdojnë të kenë të drejtë për kompensim kur një fluturim vonohet të paktën tre orë, kur anulohet më pak se 14 ditë para nisjes ose kur u refuzohet hipja në avion për shkak të mbipopullimit të fluturimit. Po ashtu, mbetet në fuqi e drejta për rimbursim ose për sistemim në një fluturim alternativ në rast të anulimit të udhëtimit.
Nivelet aktuale të kompensimit nuk ndryshojnë dhe varen nga distanca e fluturimit: 250 euro për udhëtime deri në 1500 kilometra, 400 euro për fluturime nga 1500 deri në 3500 kilometra dhe 600 euro për të gjitha udhëtimet mbi 3500 kilometra. Edhe pse shuma e kompensimit mbetet e njëjtë, Novakov ka deklaruar se rregullat e reja e bëjnë më të lehtë marrjen e tij, duke e shoqëruar kompensimin me një procedurë që ua bën pagesat më të aksesueshme pasagjerëve.
Rregullat e reja përfshijnë edhe sqarime praktike për ndihmat gjatë pritjeve. Ato parashtrojnë të drejtën e pasagjerëve për pije freskuese çdo dy orë pritjeje gjatë ndërprerjeve të fluturimeve, për një vakt pas tre orësh vonesë dhe për akomodim gjatë natës deri në tre net për vonesa të gjata. Nëse kompania ajrore nuk ofron ndihmën e parashikuar, pasagjerët do të kenë të drejtë të kërkojnë rimbursimin e shpenzimeve të tyre.
Ndërsa përfaqësuesit e industrisë ajrore e kanë cilësuar marrëveshjen si një mundësi të humbur, Parlamenti Evropian dhe Këshilli kanë vendosur të avancojnë drejt një kornize më të qartë për zbatimin e të drejtave ekzistuese dhe forcimin e mbrojtjes për udhëtarët. Me hyrjen në fuqi nga mesi i vitit 2027, pasagjerët në gjithë BE-në pritet të përballen me rregulla më të forta për vonesat, anulimet dhe rastet e tjera që ndikojnë udhëtimin.
Botuar fillimisht në Telegrafi