Procesi maratonik gjyqësor ndaj ish-drejtuesve të UÇK-së, Hashim Thaçi, Kadri Veseli, Rexhep Selimi dhe Jakup Krasniqi, po shkon drejt fundit. Gjykata po i mbyll fazat kryesore të shqyrtimit dhe pret që aktgjykimi për këtë çështje të shpallet më 16 shtator.
Katër të akuzuarit kanë qenë në paraburgim që nga nëntori i vitit 2020. Pas një rruge të gjatë gjyqësore, ky proces pritet të marrë epilogun e tij me shpalljen e aktgjykimit nga Dhomat e Specializuara të Kosovës në Hagë, ku çështja është zhvilluar përgjatë disa viteve.
Prokuroria ka ngritur pretendime se Thaçi, Veseli, Selimi dhe Krasniqi kanë vepruar si pjesë e një “ndërmarrjeje të përbashkët kriminale”. Në këtë kuadër, sipas akuzës, objektivi i tyre ka qenë marrja dhe ushtrimi i kontrollit përmes frikësimit, keqtrajtimit dhe eliminimit të kundërshtarëve. Në aktakuzë, viktimat janë përshkruar si persona që përfshinin serbë, romë dhe shqiptarë që nuk mbështesnin UÇK-në.
Gjatë rrjedhës së procesit, prokuroria ka kërkuar dënime të rënda. Në përfundim të shqyrtimit, ajo ka kërkuar që secili prej katër të akuzuarve të dënohej me nga 45 vjet burg. Ndërkaq, mbrojtja e tyre ka mohuar akuzat dhe ka kërkuar lirimin e menjëhershëm.
Aktgjykimi i 16 shtatorit mbyll betejën gjyqësore 6-vjeçare
Vetë Thaçi ka hedhur poshtë pretendimet e prokurorisë, duke i cilësuar ato si “krejtësisht të pavërteta, absurde dhe thellësisht fyese”. Edhe Kadri Veseli, Rexhep Selimi dhe Jakup Krasniqi kanë kërkuar lirimin dhe kanë vazhduar të mohojnë përgjegjësinë për pikat e aktakuzës.
Në mbështetje të mbrojtjes, gjatë procesit kanë dëshmuar figura të njohura nga diplomacia dhe siguria perëndimore të kohës së luftës. Në mesin e tyre përmenden James Rubin, ish-zëdhënës i Departamentit amerikan të Shtetit, si dhe Wesley Clark, ish-komandant i NATO-s për Evropën. Dëshmitë e tyre kanë synuar të hedhin dritë mbi mënyrën se si funksiononte UÇK-ja, duke argumentuar se ajo nuk operonte si një strukturë plotësisht e centralizuar dhe se të akuzuarit kishin, sipas pretendimeve të mbrojtjes, ndikim e kontroll më të ulët se sa çfarë parasheh aktakuza.
Procesi ka kaluar në disa faza procedurale dhe është ndjekur me ndryshime të vazhdueshme të aktakuzës. Aktakuza fillestare u konfirmua më 26 tetor 2020. Më pas, ajo u ndryshua më 3 shtator 2021, më 29 prill 2022 dhe përsëri më 30 shtator 2022. Versioni me më pak redaktime i aktakuzës u dorëzua më 27 shkurt 2023.
Trupi gjykues e ka mbyllur fazën e paraqitjes së provave më 18 dhjetor 2025. Në këtë çështje kanë dhënë dëshmi 134 dëshmitarë. Deklaratat përmbyllëse u mbajtën në intervalin 9 deri në 18 shkurt 2026, duke i hapur rrugë më pas fazës së shqyrtimit final.
Gjykimi nisi në fillim të prillit 2023. Ky hap erdhi pasi të akuzuarit për krime lufte dhe krime kundër njerëzimit kishin qëndruar për 2 vjet e gjysmë në paraburgim. Në deklarimet e para në seancë, Thaçi, Veseli, Selimi dhe Krasniqi janë deklaruar të pafajshëm. Në fillim të gjykimit, ish-presidenti Hashim Thaçi ka thënë: “E kuptoj, jam plotësisht i pafajshëm”. Edhe Veseli ka shprehur pakënaqësi lidhur me kohëzgjatjen e procesit, duke theksuar: “E shpreh pakënaqësinë time për një vonesë të tillë dyvjeçare e gjysmë, megjithatë ju falënderoj. Tërësisht i pafajshëm”.
Botuar fillimisht në Koha.net
