Kryeministri i Maqedonisë së Veriut, Hristijan Mickoski, ka folur për situatën e krijuar në Gostivar lidhur me ujin e përdorur nga qytetarët dhe masat që janë marrë për ta vënë atë në standard. Ai theksoi se autorët dhe të gjitha përgjegjësitë për menaxhimin e këtij rasti i përkasin komunës, ndërsa procesi për përcaktimin e përgjegjësive po zhvillohet edhe nga prokuroria.
Gjatë një interviste në podkastin “Rishtazi në “Koha”, Mickoski sqaroi se, në ditët e fundit, parametrat kanë qenë pozitivë pasi instalimet janë pastruar dhe është zbatuar procesi i hiperklorimit. Sipas tij, nga sot në Gostivar është siguruar “ujë teknik”, i cili mund të përdoret për nevoja teknike, por jo për pije dhe gatim. Kryeministri nënvizoi se ky është një hap i domosdoshëm drejt normalizimit të situatës, ndërsa theksoi se procesi i trajtimit pritet të vijojë edhe më tej.
“Të gjithë duhet ta kemi të qartë se kjo është një përgjegjësi që i takon komunës dhe kjo është shumë e rëndësishme të thuhet, sepse ato shërbime janë ekskluzivisht përgjegjësi e komunës”, u shpreh Mickoski, duke shtuar se ekziston një mënyrë e caktuar se si komuna komunikon me institucionet shtetërore për inspektime dhe veprime të tjera përkatëse. Ai argumentoi se përgjegjësitë duhet të trajtohen në rrugën institucionale, ndërsa presioni publik nuk duhet të kthehet në histeri, por të mbetet i qetë dhe konstruktiv.
Mickoski paralajmëroi se hiperklorimi do të vazhdojë në ditët në vijim dhe se pritet që së shpejti, në gjysmën e dytë të kësaj jave, i njëjti ujë të mund të përdoret për pije dhe për përgatitjen e ushqimit. Ai e lidh këtë me rezultatet e arritura nga pastrimi i instalimeve dhe me vazhdimin e procedurave teknike, duke i bërë thirrje qytetarëve të ndjekin udhëzimet e autoriteteve përgjegjëse.
Hiperklorimi në Gostivar pritet të kalojë shpejt nga ujë teknik te ai i pijshëm
Lidhur me çështjen e përgjegjësive, kryeministri theksoi se drejtori i ndërmarrjes publike specifike nuk emërohet nga Qeveria, por nga struktura të tjera. Në rastin konkret, ai sqaroi se emërimi bëhet nga kryetari i komunës. Në këtë kuadër, Mickoski tha se prokuroria po kryen punën e saj për të përcaktuar se kush ka përgjegjësi për situatën e krijuar, duke theksuar se procesi ligjor do të japë përgjigje për të gjithë ata që mund të kenë kontribuar në shfaqjen e problematikës.
Ai u ndal edhe te mënyra se si mund të veprohet në një institucion publik kur ka vendimmarrje për menaxhimin e situatave të ndjeshme. Mickoski nënvizoi se nëse dikush vepron në mënyrë të papërgjegjshme, kjo është diçka që të paktën pritet që personi i emëruar për të udhëhequr institucionin të mos sillet në të njëjtën mënyrë siç është përshkruar të jetë vepruar më parë. “Nuk mund të marrësh një vendim dhe ta zbatosh atë vendim i vetëm pa marrë një urdhër ose pa kërkuar ndihmë nga njerëz të caktuar për logjistikë. Në këtë rast, kemi sjellje të pamatur njerëzore”, tha Mickoski, duke e lidhur kështu nevojën për bashkëpunim dhe procedura të rregullta me sigurinë e ujit.
Sipas kryeministrit, ekipi i tij është i rrethuar nga ekspertë, të cilët janë në kontakt dhe konsultohen për situatën, ndërsa këshillat që vijnë prej tyre përdoren për të orientuar vendimmarrjen. Ai tha po ashtu se është bërë reagim i shpejtë për të siguruar ujë të pijshëm, në mënyrë që qytetarët të mos mbeten pa zgjidhje. Mickoski shprehu mirënjohje për qytetarët dhe kompanitë që kanë dhuruar ujë, si dhe për të gjithë ata që kanë shfaqur durim gjatë periudhës së trajtimit dhe verifikimit të parametrave të ujit.
Në fund, Mickoski falënderoi Qytetin e Shkupit dhe Ndërmarrjen Publike “Ujësjellësi”, duke thënë se ekipi i tyre mori pjesë në hiperklorinimin për të siguruar ujë teknik. Ai u shpreh se pret që raste të tilla të mos ndodhin në të ardhmen dhe theksoi se prokuroria po bën punën e saj, ndërsa më pas do të shihet se kush mban përgjegjësi. Deri atëherë, sipas tij, qytetarët duhet të ndjekin udhëzimet për përdorimin e ujit, duke bërë dallimin mes përdorimit teknik dhe atij për pije e gatim.
Botuar fillimisht në Telegrafi