Revolucioni më i madh i Kupës së Botës 2026 nuk lidhet me formatin e ri të garës apo me numrin më të madh të ekipeve pjesëmarrëse. Në qendër të vëmendjes është një ndryshim shumë më i veçantë: pushimet për hidratim. FIFA i prezantoi këto pauza si masë për mbrojtjen e shëndetit të futbollistëve, por brenda pak javësh ato janë kthyer në njërën nga temat më të diskutuara të turneut.
Ndërsa një pjesë e puristëve të futbollit kanë reaguar fort ndaj mënyrës se si pauzat ndërpresin rrjedhën normale të ndeshjes, industria televizive i ka parë ato si një mundësi të re. Sipas një analize të publikuar nga Marca, pushimet treminutëshe zhvillohen rreth minutës së 22-të dhe të 67-të të çdo takimi. Këto momente kanë hapur një hapësirë reklamuese që, më parë, ishte praktikisht e pamundur në futboll.
Pushimet për hidratim po e kthejnë futbollin në kohë reklamuese
Arsytimi zyrtar i FIFA-s lidhet me kushtet klimatike. Meqë Kampionati Botëror zhvillohet gjatë verës në vende me temperatura të larta, si Shtetet e Bashkuara, Meksika dhe Kanadaja, organizata vendosi që pushimet për hidratim të bëhen pjesë standarde e çdo ndeshjeje. Më herët, ato zbatoheshin vetëm kur temperaturat konsideroheshin ekstreme.
Megjithatë, ndikimi i ndryshimit nuk është kufizuar te shëndeti i lojtarëve. Përzgjedhësi i Francës, Didier Deschamps, e përmblodhi pakënaqësinë e shumë njerëzve në botën e futbollit pas një prej ndeshjeve të turneut. Në këtë këndvështrim, ai tha se pushimet po e “prishin gjithçka”, ndërsa industria “është e lumtur” për shkak të më shumë reklamave. Sipas tij, praktikisht ndeshja po kthehet në një strukturë të ngjashme me katër çerekë.
Analistët e industrisë argumentojnë se futbolli ka qenë historikisht sporti më i vështirë për t’u ndërprerë me reklama, sepse loja vijon pa ndalesa për 45 minuta. Pikërisht për herë të parë, pushimet për hidratim kanë krijuar një moment të përshtatshëm për transmetim të reklamave gjatë ndeshjes, duke e afruar modelin e futbollit me atë që përdoret në sporte amerikane si NBA. Kjo do të thotë se një pjesë e kohës së pauzave, e cila më parë nuk ishte e “paketuar” për reklamim në këtë mënyrë, tani është shndërruar në një treg më tërheqës për sponsorët.
Ndryshimi shihet menjëherë edhe në shifra. Sipas të dhënave të iSpot, të publikuara nga Forbes, Kupa e Botës 2026 ka një pjesëmarrje shumë më të madhe në tregun e reklamave televizive amerikane sesa Botërori i Katarit i vitit 2022. Në vitin 2022, turneu përbënte vetëm 2.77 për qind të të gjithë tregut të reklamave sportive në SHBA. Arsyetimi i dhënë është se zhvillohej në dimër dhe përplasej me sezonin e NFL-së dhe ligave të tjera amerikane. Këtë herë, pjesa ka arritur në 13 për qind. Rritja lidhet jo vetëm me faktin se turneu ka 104 ndeshje, krahasuar me 64 në Katar, por edhe me dy pushimet për hidratim në çdo takim, që sjellin qindra minuta shtesë të përshtatshme për reklama. Si pasojë, numri i reklamave të transmetuara gjatë Kupës së Botës në televizionet amerikane është pothuajse trefishuar në krahasim me vitin 2022.
Në Francë, një reklamë 20 sekondëshe gjatë një pushimi për hidratim kushton rreth 425 mijë euro. Ky çmim afrohet me tarifat e reklamave gjatë vazhdimeve apo gjuajtjeve të penalltive. Sponsorët kryesorë të FIFA-s, si Coca-Cola dhe kompania saudite e energjisë Aramco, kanë përparësi në rezervimin e këtyre hapësirave. Për krahasim, Lojërat Olimpike të Parisit kishin 84 sponsorë, por vetëm rreth 30 prej tyre shfaqeshin rregullisht në materialet zyrtare. Ndërkohë, Kupa e Botës, megjithëse zgjat gati dyfish më shumë, mbështetet nga vetëm 21 sponsorë globalë, të cilët përfitojnë ekspozim shumë më të madh.
Për televizionet, efekti i pushimeve për hidratim është kthyer në një biznes fitimprurës. Rrjeti amerikan Fox kishte siguruar të drejtat për Kupat e Botës 2022 dhe 2026 me një marrëveshje të favorshme, pasi turneu i Katarit nuk përputhej me kalendarin tradicional sportiv amerikan. Sipas The Hollywood Reporter, një reklamë 30 sekondëshe gjatë ndeshjeve të Botërorit kushton nga 200 mijë deri në 750 mijë dollarë. Me rreth 624 minuta pushime për hidratim në total gjatë 104 ndeshjeve të turneut, vlera e reklamave të krijuara vetëm nga këto pauza mund të kalojë 500 milionë dollarë. Kjo është më e lartë se 485 milionë dollarët që Fox pagoi për të drejtat televizive të këtij cikli.
Pikërisht për këtë arsye, pritet që gara për të drejtat televizive të Botërorëve 2030 dhe 2034 të jetë edhe më e fortë. Forbes shkruan se ofertat për tregun amerikan mund të nisin nga 1 miliard dollarë dhe, nëse dy turnetë shiten së bashku, mund të arrijnë deri në 2 miliardë. Interesimi nuk po vjen vetëm nga televizionet tradicionale: për herë të parë, kompani si ESPN, Netflix, Disney, YouTube, Apple dhe Amazon po tregojnë interes serioz për të hyrë në garë për të drejtat televizive të Kupës së Botës, falë rritjes së potencialit reklamues që kanë sjellë pushimet për hidratim.
Ndërkohë, jo të gjithë transmetuesit kanë zgjedhur të ndjekin të njëjtën qasje. Në Shtetet e Bashkuara, Fox ndërpreu çdo pushim për hidratim me reklama. Në anën tjetër, rrjeti hispanik Telemundo vijoi të transmetonte pa ndërprerje gjatë këtyre pauzave, duke e paraqitur ndeshjen ndryshe për audiencën e tij.
Botuar fillimisht në Telegrafi