Ministrja e Tregtisë dhe Industrisë, Mimoza Kusari-Lila, mori pjesë në Takimin Ministror të Platformës Drejtuese të Ballkanit Perëndimor për Kërkimin Shkencor dhe Inovacionin, i cili u organizua në Bruksel nga Komisionerja Evropiane për Start-up-et, Kërkimin Shkencor dhe Inovacionin, Ekaterina Zaharieva.
Në kuadër të këtij aktiviteti, Kusari-Lila bëri të ditur se në takim morën pjesë edhe zëvendësministri i Arsimit dhe Shkencës, Përparim Kryeziu, ambasadori i Kosovës në Bruksel, Agron Bajrami, si dhe ministra të tjerë nga Ballkani Perëndimor dhe Evropa.
Gjatë takimit u diskutuan mundësitë që krijojnë kërkimi shkencor, inovacioni dhe zhvillimi për rritjen ekonomike dhe për avancimin e rajonit. Ministrja theksoi se këto tema janë parë si shtysë e drejtpërdrejtë për bashkëpunim më të fortë mes vendeve pjesëmarrëse dhe BE-së, me fokus të qartë në integrimin evropian dhe në rritjen e kapaciteteve për inovacion.
BE-ja dhe Ballkani Perëndimor zotohen për plan të përbashkët veprimi
Sipas Kusari-Lilës, gjatë takimit u miratua një deklaratë e përbashkët për forcimin e bashkëpunimit në kërkimin shkencor dhe inovacionin, si dhe për hartimin e një Plani të Përbashkët të Veprimit. Ajo tha se Komisionerja Ekaterina Zaharieva e ka cilësuar këtë deklaratë si një kapitull të ri në bashkëpunimin ndërmjet BE-së dhe Ballkanit Perëndimor, i cili synon të forcojë më tej kërkimin shkencor dhe të mbështesë integrimin evropian.
Në këtë ngjarje u nda edhe çmimi për inovacion, ku u vlerësuan inovatorët e rinj nga rajoni. Në këtë pjesë të aktivitetit, Kosova u përfaqësua nga Arbnora Kllokoqi, themeluese e platformës “Mendje”, një nismë që shfrytëzon teknologjinë për të lehtësuar qasjen në shërbimet e shëndetit mendor. Sipas prezantimit të bërë, platforma lidh shqipfolësit me psikologë të licencuar.
Ministrja Kusari-Lila ka informuar se gjatë takimit ka prezantuar nismat për zhvillimin e ekosistemit të inovacionit në Kosovë dhe potencialin e vendit për avancim në këtë drejtim. Ajo ka përmendur se sektori i shërbimeve në Kosovë ka bilanc pozitiv tregtar, gjë që, sipas saj, dëshmon potencialin për zhvillim të mëtejshëm dhe për kontribut në rritjen ekonomike të vendit.
Në të njëjtën linjë, Kusari-Lila theksoi se Kosova po investon në infrastrukturën teknologjike dhe industriale për të krijuar kushte për inovacion, zhvillim të ndërmarrësisë dhe rritje të konkurrueshmërisë. Një nga asetet kryesore, sipas saj, është Parku i Inovacionit dhe Trajnimit në Prizren (ITP), në të cilin shteti i Kosovës ka investuar 8 milionë euro.
Ministrja përmendi edhe mbështetjen financiare që do të jepet për bizneset dhe ndërmarrësit gjatë vitit 2026. Janë parashikuar 1.9 milionë euro për 34 ndërmarrje dhe 15 start-up-e, 1 milion euro për 42 përfitues në sektorin e teknologjisë së informacionit dhe komunikimit (TIK), 1.16 milionë euro për inovacionin në TIK dhe 1 milion euro për gratë ndërmarrëse.
Kusari-Lila theksoi se këto investime janë pjesë e përpjekjeve për të krijuar një ekosistem ku idetë shndërrohen në produkte, shërbime dhe biznese konkurruese, duke krijuar vende pune dhe mundësi të reja zhvillimi. Aktiviteti u përmbyll me zotimin e përbashkët për avancimin e objektivave të dakorduara dhe thellimin e bashkëpunimit rajonal dhe evropian në kërkimin shkencor, inovacion dhe zhvillim.
Në përfundim, ministrja ritheksoi se Kosova ka potencial, ide dhe njerëz të talentuar, ndërsa përgjegjësia e institucioneve është të krijojnë kushtet që ky potencial të kthehet në zhvillim ekonomik, mundësi të reja dhe mirëqenie për qytetarët.
Botuar fillimisht në Telegrafi
