Një biznesmen nga Prizreni, Alajdin Fusha, ka publikuar faturën e rrymës elektrike që, sipas tij, i është dorëzuar nga KESCO dhe ka ngitur shqetësimin për koston e lartë të energjisë për prodhuesit vendorë. Në reagimin e tij publik, ai thotë se fatura që ka pranuar më 9 nëntor 2026 shkon në shumën 157,884.67 euro.
Fusha pohon se kjo faturë mbulon 505,974 kilovat-orë (kWh) energji të faturuar për një periudhë mujore. Sipas llogaritjeve të tij, kur përfshihen të gjitha kostot e furnizimit, shpenzimet e rrjetit dhe TVSH-ja, çmimi për një kilovat-orë arrin në 0.312 euro, përkatësisht 31.2 centë. Ai e shoqëron këtë shifër me një pyetje të drejtpërdrejtë: si mund të mbijetojë dhe të ruajë konkurrueshmërinë prodhimi vendor në këto kushte.
Biznesmeni thekson se energjia është një nga shpenzimet kryesore për industrinë përpunuese. Për të, kjo kosto nuk ndalet vetëm te fatura e energjisë, por reflektohet drejtpërdrejt në çmimin përfundimtar të produkteve, te mundësia për investime të reja dhe te ruajtja e vendeve të punës. Ai argumenton se në sektorin e prodhimit dhe përpunimit, kostot e energjisë ndikojnë në të gjithë zinxhirin e punës.
31.2 centë për kWh: sfidë për industrinë përpunuese
Si shembull, Fusha përmend prodhimin e qumështit dhe përpunimin e produkteve bujqësore. Ai thotë se, përveç lëndës së parë, prodhuesit duhet të përballojnë edhe shpenzimet e energjisë, ambalazhimit, pagave, transportit dhe tatimeve. Në këtë mënyrë, sipas tij, rritja e kostove të energjisë e bën më të vështirë ruajtjen e qëndrueshmërisë financiare, sidomos për bizneset që operojnë me marzhe të kufizuara.
Fusha tregon se kompania e tij ka investuar më herët në panele solare, me qëllim që të zvogëlojë varësinë nga energjia e blerë. Megjithatë, ai shpreh shqetësimin se jo të gjitha fabrikat kanë pasur mundësinë për të bërë investime të tilla, duke lënë të hapur një pabarazi mes prodhuesve. Sipas tij, ndërkohë që disa biznese kanë gjetur mënyra për të ulur kostot përmes energjisë së prodhuar vetë, të tjerat mbeten të ekspozuara ndaj çmimeve të larta të rrymës.
Në reagimin e tij, biznesmeni i është drejtuar publikisht ministres së Ekonomisë, Mimoza Kusari-Lila, duke kërkuar që institucionet të shqyrtojnë mundësinë e krijimit të mekanizmave për mbrojtjen e prodhuesve nga kostot e larta të energjisë elektrike. Ai sjell edhe një krahasim me diskutimet e fundit për monitorimin e tregut të naftës dhe mundësinë e rikthimit të çmimit tavan për derivatet, duke pyetur nëse masa të ngjashme mbrojtëse mund të shqyrtohen edhe për energjinë elektrike.
Fusha bën të qartë se nuk po kërkon “energji falas” dhe as “privilegje”, por kushte që ai i konsideron të përballueshme për prodhimin në Kosovë. Ai paralajmëron se, nëse kostot mbeten në nivele të tilla, prodhuesit mund të detyrohen të rrisin çmimet e produkteve, të zvogëlojnë prodhimin, të shtyjnë investimet ose edhe të ndërpresin aktivitetin. Në fund, ai i bën thirrje Qeverisë, Ministrisë së Ekonomisë, Zyrës së Rregullatorit për Energji (ZRRE) dhe institucioneve të tjera përgjegjëse që të shqyrtojnë urgjentisht koston e energjisë për industrinë përpunuese, transparencën e formimit të çmimeve dhe mundësinë e mbështetjes për investimet në energji të ripërtëritshme.
Botuar fillimisht në Telegrafi