Zjarre të shumta, thatësira e zgjatur dhe stuhi të fuqishme kanë përfshirë disa vende të Europës, duke vënë nën presion të menjëhershëm shërbimet emergjente dhe duke rënduar situatën për popullsinë. Në ditët e fundit, valët e temperaturave të larta kanë tharë vegjetacionin në pjesë të gjera të kontinentit, duke rritur rrezikun e shpërthimeve të zjarreve dhe duke sjellë probleme me furnizimin me ujë.
Në verilindje të Spanjës, zjarrfikësit po përballen me flakët me ndihmën e 30 avionëve, pas një zjarri të madh që detyroi evakuimin e rreth 1.000 personave. Situata vjen pas valëve të njëpasnjëshme të temperaturave ekstreme, të cilat kanë çuar termometrat në nivele të paprecedentë në zona të gjera të Europës. Si rezultat, shfaqen mungesa uji, dëmtime të të korrave dhe një numër i lartë viktimash, më shumë se zakonisht në këtë periudhë të vitit.
Sot, sipas të dhënave të Reuters, temperatura mesatare në Europë është 27.5 gradë Celsius, rreth 4.2 gradë më e lartë se mesatarja maksimale për 17 korrikun në periudhën 1961-1990. Ndërsa moti vazhdon të jetë i paqëndrueshëm, në Francë thatësira është përkeqësuar çdo ditë që nga fundi i majit. Ngrohja në Mesdhe ka ndikuar edhe në kapacitetet e prodhimit të energjisë: një central bërthamor në jug të vendit mund të detyrohet të mbyllet, pasi uji i detit po bëhet shumë i ngrohtë për të ftohur reaktorët.
Valët e nxehtësisë nisin zinxhirin e zjarreve dhe pasojave
Në Gjermani, nivelet e ulëta të ujit në lumin Rih kanë penguar transportin lumor, duke sjellë rritje të kostove për transportuesit. Edhe pse në disa zona temperaturat kanë nisur të ulen, reshjet e forta dhe stuhi të fuqishme kanë nisur të shfaqen në pjesë të tjera. Në Francën qendrore dhe lindore janë regjistruar dy viktima: njëra prej tyre është një grua në zonën e Saint-Victurnien, në departamentin Haute-Vienne, e cila ka vdekur pasi një pemë i ka rënë mbi të. Në pjesën lindore të vendit, në Dolomieu, trupi i një burri është gjetur në një fabrikë që ishte shkatërruar nga zjarri.
Agjencia AFP ka raportuar se zjarri në atë zonë është shkaktuar nga një goditje rrufeje. Përveç viktimave dhe dëmeve materiale, ka pasur edhe ndërprerje të shërbimeve: operatori i rrjetit elektrik Enedis ka konfirmuar se gjithsej 53.000 familje kanë mbetur pa energji elektrike. Problemet më të mëdha të furnizimit janë vërejtur në rajonet Auvergne-Rhône-Alpes në juglindje dhe Nouvelle-Aquitaine në jugperëndim.
Ndërkohë, shërbimet meteorologjike në Spanjë paralajmërojnë se temperaturat pritet të rriten sërish duke nisur nga e diela. Në disa zona të Andaluzisë dhe La Manchës priten 42 deri në 44 gradë Celsius, për shkak të ardhjes së ajrit të nxehtë nga Afrika e Veriut. Në Aragon, pranë Ores, një zjarr në pyje ka përhapur mbi 12.000 hektarë gjatë natës së së premtes. Rreth 300 ushtarë po përballen me flakët, me ndihmën e helikopterëve dhe pesë avionëve zjarrfikës.
Zjarret kanë prekur edhe zona të tjera: zjarrfikësit po përpiqen të kontrollojnë vatra afër Madridit dhe në provincën e Guadalajara-s, ku janë djegur rreth 1.500 hektarë, ndërsa një kamp veror për fëmijë është evakuar. Përtej rasteve në terren, Organizata Botërore e Shëndetësisë (OBSH) paralajmëroi javën e kaluar se Europa po përballet me “disa javë vdekjeprurëse” për shkak të valëve të reja të nxehtësisë që po formohen mbi Oqeanin Atlantik. Studiuesit që monitorojnë të ashtuquajturat vdekje “të tepërta” kanë theksuar se gjatë valës së nxehtësisë në fund të qershorit, mijëra persona kanë vdekur më shumë se sa është e zakonshme për këtë periudhë të vitit. Ndërsa moti vazhdon të ndryshojë, zjarret, thatësira dhe stuhitë mbeten sfida kryesore për vendet e prekura.
Botuar fillimisht në Telegrafi
