Ish-presidenti i Kosovës, Hashim Thaçi, ka ndarë një rrëfim emocional për takimin që kishte me veprimtarin e njohur shqiptar, Adem Demaçi, një ditë para se Kosova të shpallte pavarësinë.
Thaçi e ka treguar këtë ngjarje në intervistën e dhënë për Arben Ahmetin në Kanal 10. Ai ka shpjeguar se mbrëmjen e 16 shkurtit 2008, pas përmbylljes së të gjitha përgatitjeve me ekipin e tij për seancën historike të 17 Shkurtit, kishte ndjerë se diçka nuk po shkonte, edhe pse nga ana organizative gjithçka ishte gati.
“Ndjeja se diçka nuk po shkonte, diçka shpirtërisht më mungonte. Doja ta takoja Demaçin”, ka rrëfyer Thaçi. Sipas tij, në fillim kishte synuar që Demaçi të qëndronte në Prishtinë gjatë asaj fundjave historike, por më pas vendosi ta takonte personalisht atë natë, duke e konsideruar të rëndësishme prezencën dhe mesazhin e tij në një moment kaq vendimtar.
Thaçi ka treguar se ai fillimisht kishte menduar ta vizitonte Demaçin në shtëpi, por veprimtari kishte vendosur që të vinte në zyrën e tij. Kjo e ka bërë takimin më të afërt dhe më të drejtpërdrejtë, duke i dhënë Thacit mundësinë të dëgjonte këshilla nga një figurë që lidhej me gjenerata të tëra për shkak të aktivitetit dhe qëndrimeve të tij.
“Mos humb kohë pas ngjyrave e tingujeve” – këshilla e Demaçit para 17 shkurtit
Gjatë takimit, Thaçi ka përshkruar një atmosferë të ngrohtë dhe miqësore. Adem Demaçi i ka dhënë mbështetje dhe ka folur për ditën që po afrohej. Në atë bisedë, sipas Thaçit, Demaçi i kishte thënë: “Boll kemi ecë në këmbë e krye si popull, por mirë na doli në fund. Mos dëgjo shumë në të majtë e në të djathtë, poshtë e lartë, por kryje këtë punë – nesër do të jem aty”.
Hashim Thaçi ka sqaruar se gjatë takimit e ka informuar Demaçin edhe për faktin se shteti i Kosovës do të kishte flamurin, himnin dhe simbolet e veta shtetërore. Në këtë pjesë të rrëfimit, Thaçi thotë se Demaçi ia ka kthyer me një mesazh të qartë: “Bacë, po bëhet shteti, mos humb kohë pas ngjyrave e tingujeve të muzikës, sot nuk janë punët tuaja këto”. Për Thaçin, kjo ishte një nxitje për fokus maksimal te akti kryesor – drejt përmbylljes së rrugës drejt pavarësisë.
Ai ka shtuar se Demaçi nuk ka qëndruar vetëm në bisedë të përgjithshme, por ka hyrë edhe në detaje të rëndësishme të procesit. Thaçi tregon se Demaçi kishte lexuar edhe tekstin e Deklaratës së Pavarësisë, dokument që të nesërmen do t’u paraqitej deputetëve për votim dhe nënshkrim.
Ndërsa e lidh rrëfimin me ndjenjat e asaj nate, Thaçi ka thënë se, pas konsultimit me Demaçin, u ndje i lehtësuar. “Pas konsultimit me këtë njeri të letrave dhe humanist u ndjeva i lehtësuar dhe më i shtrënguar për ditën e bekuar që po vinte për popullin e Kosovës”, ka deklaruar ai. Në këtë mënyrë, takimi i 16 shkurtit 2008, pak para se Kosova të kalonte në një etapë vendimtare më 17 shkurt, paraqitet si një moment ku mbështetja, këshillat dhe leximi i dokumentit shndërrohen në qetësi dhe përkushtim shtesë për aktin historik.
Botuar fillimisht në Telegrafi