Pas humbjes së peshës, sfida kryesore për shumë persona nuk është vetëm si ta arrijnë rezultatin, por si ta mbajnë atë në kohë. Shpesh ndodh që, pas një periudhe të përpiktë, njerëzit kthehen gradualisht te zakonet e vjetra të të ngrënit, ndërkohë që ulet edhe aktiviteti fizik. Kjo mund t’i zhbëjë ngadalë përpjekjet e mëparshme, ndaj është e rëndësishme të ndërtohen zakone të shëndetshme që bëhen pjesë e rutinës së përditshme.
Një nga gabimet më të shpeshta është të mendohet se një program i rreptë dhe afatshkurtër është i mjaftueshëm. Dietat shpesh kanë limit kohor dhe, sapo mbarojnë, shumë njerëz rikthehen në modelin e mëparshëm. Për të shmangur këtë, qasja më praktike është ndryshimi gradual i zakoneve të përditshme. Në vend që të përqendroheni vetëm në menynë për një periudhë të caktuar, synimi duhet të jetë krijimi i një rutine që mund të vazhdojë për muaj dhe vite.
Ka edhe ndryshime të thjeshta që mund të ndihmojnë për ruajtjen e peshës. Për shembull, futja e perimeve në çdo vakt dhe përfshirja e një burimi proteinash në vakte ku konsumohen ushqime të tilla. Këto nuk garantojnë domosdoshmërisht rënie të menjëhershme në peshë, por ndikojnë në përmirësimin e të ushqyerit dhe e bëjnë më të lehtë që zakonet e shëndetshme të mbeten pjesë e jetës së përditshme.
Jini fizikisht aktivë edhe pasi të keni arritur peshën e dëshiruar. Ruajtja e rezultateve kërkon lëvizje të rregullt, dhe kjo nuk nënkupton patjetër stërvitje intensive apo orë të tëra në palestër. Ecja, çiklizmi, stërvitja, puna në kopsht apo edhe pastrimi i shtëpisë llogariten si forma aktiviteti fizik. E rëndësishme është të gjeni një mënyrë lëvizjeje që ju përshtatet dhe që mund ta praktikoni pa u lodhur nga rutina.
“Rreth 250 minuta aktivitet në javë” për të ruajtur peshën
Sipas udhëzimeve të përgjithshme, rreth 250 minuta aktivitet me intensitet të moderuar në javë mund të ndihmojnë në ruajtjen e peshës trupore. Kjo barazohet me rreth 50 minuta aktivitet, pesë ditë në javë. Në këtë mënyrë, aktiviteti fizik bëhet më i menaxhueshëm dhe më pak i lidhur me periudha të shkurtra. Përtej lëvizjes së përditshme, është po aq e dobishme të mos neglizhoni edhe aspektin e forcës.
Përveç aktivitetit si ecja ose vrapimi, përfshirja e ushtrimeve të forcës luan rol të rëndësishëm. Stërvitja e forcës ndihmon në ruajtjen dhe ndërtimin e masës muskulore, e cila zvogëlohet natyrshëm me moshën, por edhe gjatë periudhave më të gjata të deficitit kalorik. Këtë lloj stërvitjeje mund ta bëni në palestër, në shtëpi ose jashtë. Ushtrimet duhet të synojnë grupet kryesore të muskujve të paktën dy herë në javë, në mënyrë që të krijohet një bazë e qëndrueshme për metabolizmin dhe përbërjen trupore.
Një element tjetër kyç është vëzhgimi i zakoneve tuaja. Është e vështirë të ndryshosh sjellje pa kuptuar se çfarë e nxit atë. Për këtë arsye, monitorimi i dietës dhe aktivitetit fizik mund t’ju ndihmojë të dalloni më qartë kur dhe pse konsumoni ushqime të caktuara ose anashkaloni stërvitje. Mund të mbani shënime për atë çfarë keni ngrënë, sa keni ngrënë dhe ku keni qenë, si jeni ndjerë para dhe pas vaktit, sa ka zgjatur vakti dhe çfarë keni bërë gjatë kohës që keni ngrënë. Vlen të kushtohet vëmendje edhe ndjenjës së ngopjes: kështu bëhet më e lehtë të dallohen momentet kur po hani nga zakoni, nga mërzia ose nga arsye emocionale, në vend të urisë reale.
Mbajtja e një ditari të tillë nuk duhet të jetë punë e përditshme. Mund të jetë e dobishme veçanërisht kur vëreni se po e keni më të vështirë të ruani zakone të shëndetshme. Një tjetër mbështetje praktike është të kujtoni arsyen pse keni filluar: ruajtja e peshës bëhet më e lehtë kur ekziston një motiv i qartë. Disa persona e nisin ndryshimin për të pasur më shumë energji dhe për të kaluar më shumë kohë aktive me fëmijët e tyre, ndërsa të tjerë e bëjnë për shqetësime shëndetësore ose për një kënaqësi më të madhe me trupin. Pasi ta keni përcaktuar, shkruajeni arsyen dhe vendoseni diku ku do ta shihni shpesh, sepse kjo kujtesë mund të ndihmojë kur mungon motivimi.
Së fundi, ruajtja e peshës së dëshiruar është një proces afatgjatë. Nuk ka një zgjidhje të vetme që garanton se kilogramët e humbur do të mbeten përgjithmonë jashtë; zakonisht kërkohet një kombinim mes një diete të ekuilibruar, ushtrimeve të rregullta, zakoneve cilësore dhe gatishmërisë për të mos lejuar që rëniet e herëpashershme të shndërrohen në braktisje të plotë. Qëllimi nuk duhet të jetë t’i përmbaheni rregullave të rrepta vetëm për një periudhë të shkurtër, por të ndërtoni një stil jetese që mund ta mbani edhe pasi të mbarojë dieta.
Botuar fillimisht në Telegrafi
