Shërbimi Spitalor Klinik dhe Universitar i Kosovës (SHSKUK) ka bërë të ditur se mirëpret Raportin e Auditimit për vitin 2025, të hartuar nga Zyra Kombëtare e Auditimit. Në reagimin e institucionit thuhet se vlerësohet roli i këtij organi në forcimin e transparencës dhe përmirësimin e proceseve brenda institucioneve buxhetore.
Sipas njoftimit, SHSKUK ka dhënë sqarime edhe për produktet që në raport janë evidentuar me afat të skaduar. Institucioni sqaron se këto produkte nuk janë barna, por uniforma. Ato, sipas SHSKUK, nuk janë pranuar me afat të skaduar, ndërsa bëhet fjalë për rezerva të krijuara gjatë pandemisë, të cilat nuk janë përdorur dhe kanë arritur afatin e përdorimit. Më tej, SHSKUK thotë se këto produkte janë larguar nga sistemi dhe se rekomandimet për këtë çështje janë implementuar.
SHSKUK thekson gjithashtu se raporti nuk ka identifikuar raste të keqpërdorimit të mjeteve publike, dëmtimit të buxhetit, përfitimeve të kundërligjshme apo humbjeve financiare për institucionin. Sipas institucionit, gjetjet e auditorit lidhen kryesisht me çështje teknike, procedurale dhe me raportimin financiar, duke mos treguar se ka pasur parregullsi të natyrës financiare në kuptimin e keqpërdorimit të fondeve.
Implementimi i rekomandimeve ka nisur menjëherë pas raportit të auditimit
Menjëherë pas pranimit të draft-raportit të auditimit, SHSKUK thotë se ka filluar implementimin e rekomandimeve dhe ka ndërmarrë veprime konkrete për adresimin e tyre. Në njoftim theksohet se, për menaxhimin e pasurive, evidencat përkatëse janë harmonizuar dhe përditësuar, ndërsa është forcuar koordinimi ndërmjet njësive përgjegjëse. Një pjesë e rekomandimeve janë implementuar, ndërsa pjesa tjetër është në proces zbatimi sipas planit të veprimit.
Për klasifikimin e shpenzimeve dhe raportimin financiar, SHSKUK thotë se janë rishikuar procedurat e brendshme. Në të njëjtën kohë, institucioni ka dhënë udhëzime shtesë për stafin financiar dhe ka vendosur kontrolle shtesë, me qëllim që raportimi të jetë më i saktë. Implementimi i rekomandimeve, sipas njoftimit, ka filluar dhe po vazhdon në përputhje me planin e veprimit.
Sa i përket detyrimeve kontingjente, SHSKUK informon se është iniciuar harmonizimi i evidencave me Zyrën Ligjore dhe është vendosur rishikim periodik i kontesteve gjyqësore. Procesi i implementimit në këtë pjesë, theksohet se tashmë është në zhvillim. Ndërsa për rastin ku është evidentuar mungesë e dëshmisë së ekzistencës fizike, SHSKUK thotë se çështja ndodhet në trajtim nga organet kompetente të drejtësisë. Institucioni gjithashtu deklaron se po vazhdon bashkëpunimin e plotë me institucionet përgjegjëse dhe paralelisht janë forcuar mekanizmat e kontrollit të pasurive.
Për pozitat drejtuese të mbuluara me ushtrues detyre, SHSKUK thotë se kanë filluar procedurat për shpalljen e konkurseve dhe plotësimin e tyre në përputhje me legjislacionin në fuqi. Në reagimin e institucionit përmenden edhe vonesat në pagesën e faturave: SHSKUK thekson se ato kanë ndodhur kryesisht si rezultat i rritjes së kërkesave për furnizime në fund të vitit fiskal, nevojës për sigurimin e rezervave për tremujorin e parë të vitit pasues, si dhe rritjes së vazhdueshme të shërbimeve shëndetësore. Sidoqoftë, theksohet se janë ndërmarrë masa konkrete për monitorim më të mirë të detyrimeve financiare dhe planifikim më efikas të pagesave, ku implementimi i rekomandimeve ka nisur menjëherë dhe një pjesë e masave tashmë është zbatuar.
SHSKUK, siç theksohet në njoftim, e sheh raportin si pjesë të procesit të përmirësimit të brendshëm. Institucioni përmend se është një ndër organizatat buxhetore më të mëdha në vend: ka afër 8,000 punonjës, ka ofruar mbi 10 milionë shërbime shëndetësore gjatë vitit dhe operon me një buxhet vjetor prej rreth 200 milionë eurosh. Ky sistem, sipas institucionit, përfshin QKUK-në, spitalet e përgjithshme, institucionet e shëndetit mendor dhe njësitë e tjera përbërëse. Pavarësisht kompleksitetit të sistemit, SHSKUK thotë se gjetjet e auditorit kanë të bëjnë kryesisht me përmirësime administrative dhe teknike, e jo me keqmenaxhim financiar apo dëmtim të buxhetit. Në fund, institucionit i mbetet e përkushtuar ndaj transparencës, menaxhimit të përgjegjshëm të financave publike dhe zbatimit të plotë të rekomandimeve të auditorit, ku një pjesë e tyre janë implementuar dhe pjesa tjetër është në proces.
Botuar fillimisht në Bota Sot