Kombëtarja shqiptare po i afrohet dy sfidave të fundit në Nations League, ku do të përballet me Finlandën dhe Bjellorusinë. Në kampin kuqezi, mesazhi është i njëjtë: synohet mbyllja e aventurës në këtë kompeticion në vendin e parë të grupit. Optimizmi është i pranishëm dhe vjen edhe nga deklaratat e futbollistëve të skuadrës, teksa Julian Shehu dhe Etrit Berisha dolën në konferencën për shtyp për të folur mbi objektivat dhe gjendjen e ekipit.
Mesfushori Julian Shehu e vuri theksin te mënyra se si ekipi po po shfaqet në ndeshjet e fundit. Sipas tij, ndryshimet në qasjen e lojës kanë dhënë rezultatet e dëshiruara, ndërsa theksoi se futbollistët janë duke ecur drejt një modeli më ofensiv dhe më agresiv përpara. Ai tha se është thelbësore që ekipi të ndihet mirë në fushë, të respektojë detyrat që kërkon trajneri dhe t’i zbatojë ato me korrektësi.
Shehu theksoi se kur rezultatet janë ato që trajneri kërkon, atëherë çdo gjë është në rregull. Përballë kësaj faze vendimtare të kompeticionit, ai nënvizoi se skuadra duhet të ruajë të njëjtin mentalitet, pa u lëkundur, teksa objektivi mbetet i qartë. Në këtë kontekst, për sfidën me Finlandën ai theksoi domosdoshmërinë e përqendrimit maksimal, sepse kundërshtari meriton respekt.
Objektivi: ruajtja e vendit të parë në grup
Megjithatë, Shehu nuk la hapësirë për interpretime të tjera: objektivi është që Shqipëria të qëndrojë në vendin e parë të grupit. Ai tha se skuadra do të ruajë kryesimin dhe beson se deri në fund do t’ia dalë, duke e lidhur këtë me disiplinën në fushë dhe zbatimin e planit të trajnerit. Mesfushori e konsideroi të rëndësishme që ekipi të mendojë për ndeshjen pas ndeshjes dhe të mos humbë fokusin, pasi çdo detaj mund të ndikojë në rrjedhën e garës.
Shehu foli edhe për aktivizimin e tij nën drejtimin e trajnerit Maran. Ai shprehu bindjen se interesat e Kombëtares qëndrojnë mbi ato personale dhe se çdo lojtar duhet të japë maksimumin brenda minutazhës që i jepet. Mesfushori theksoi se, pavarësisht sa minuta merr në dispozicion, detyra është të kontribuohet maksimalisht për ekipin. Ai nënvizoi se Kombëtarja luhet për ekipin dhe për objektivat kolektive, jo për objektiva personale të individit, qoftë edhe për sa i përket minutave në fushë.
Optimist për sfidat e ardhshme u shfaq edhe portieri Etrit Berisha. Gardiani i kuqezinjve ftoi tifozët të jenë pranë skuadrës, duke theksuar rëndësinë e mbështetjes në këtë moment vendimtar. Berisha e përmbledhi kërkesën e ekipit me një fjali të qartë: objektivi është të fitohet ndeshja dhe të vazhdohet përpara, duke ruajtur vendin e parë. Në këtë pikë, ai e vendosi fokusin te rezultatet dhe te ruajtja e pozitës në grup, që do t’i jepte skuadrës drejtimin e duhur për mbylljen e Nations League.
Portieri u ndal edhe te përballja e parë me Finlandën, duke pranuar se ajo ndeshje solli momente të vështira për Shqipërinë. Sipas Berishës, skuadra tashmë ka lënë pas atë episod dhe tani duhet të mendojë për ndeshjet e radhës. Ai shpjegoi se ajo që ndodh nuk kthehet mbrapa dhe vlerësoi se ishte një moment që ndryshoi rrjedhën e lojës: pas një gabimi nis një seri ngjarjesh, që sollën pësimin e golit dhe e bënë gjithçka më të vështirë. Megjithatë, Berisha tha se e kanë kaluar atë fazë dhe kanë në dorë gjithçka për të ardhmen.
Për të mbajtur ritmin drejt objektivit, Berisha u ndal edhe te forca e kundërshtarit. Ai vlerësoi cilësinë dhe eksperiencën e lojtarëve shqiptarë, por njëkohësisht paralajmëroi se Finlanda nuk duhet nënvlerësuar. Portieri theksoi se Shqipëria ka lojtarë cilësorë, që kanë luajtur ose po luajnë në kampionate të rëndësishme dhe se ekipi mbart eksperiencë. Megjithatë, sipas tij, kjo nuk duhet të kthehet në vetëbesim të tepruar, sepse Finlanda mbetet një kundërshtar për t’u marrë seriozisht. Mesazhi përfundimtar i kuqezinjve është i njëjtë: dy sfidat e fundit duhen luajtur me maksimalen, me synimin për ta ruajtur kreun e grupit dhe për ta mbyllur Nations League në mënyrën më të mirë të mundshme.
Botuar fillimisht në Sport Ekspres