SHBA-ja dhe Irani kanë sinjalizuar se marrëveshja për t’i dhënë fund luftës është më afër se kurrë. Lajmi u bë i ditur të premten, në një kohë kur ende nuk ka të dhëna zyrtare lidhur me përmbajtjen e saktë të një dokumenti të tillë, por të dyja palët kanë lënë të kuptohet një përafrim qëndrimesh me ndërmjetësin.
Sipas njoftimeve, me ndërmjetësim të Islamabadit, SHBA-ja dhe Irani kanë deklaruar se nuk kanë qenë më pranë se tani në arritjen e një marrëveshjeje paqeje. Ndërsa mbetet e paqartë se çfarë përfshin një marrëveshje e mundshme, hapat e përmendur nga ndërmjetësit shkojnë drejt fazës përfundimtare. Nëse do të arrihet dakordimi final, nënshkrimi pritet të pasojë së shpejti.
Në këtë proces, Pakistani ka luajtur rolin e ndërmjetësit. Pas përpjekjeve që janë bërë për javë të tëra për ta çuar përpara një marrëveshje mes dy vendeve, kryeministri Shehbaz Sharif ka paralajmëruar se palët kanë rënë dakord për një tekst final. Sharif ka thënë se “Pakistani tani po punon ngushtë me të dyja palët për t’i finalizuar hapat e mëtejmë”.
Hapat finalë drejt marrëveshjes së paqes
Ndërkohë, një zyrtar i lartë i administratës amerikane ka dhënë një sinjal shtesë duke thënë se përmbajtja që po diskutohet është e përgatitur dhe i pëlqen të dyja palëve. Po sipas të njëjtave informacione, trupat vendimmarrëse të Iranit janë mbledhur për të diskutuar memorandumin. Ky moment i brendshëm vendimmarrjeje shihet si pjesë e procesit drejt miratimit të mundshëm.
Gjatë ditës është raportuar edhe për një rrjedhje të dokumentit, duke u përmendur se memorandumit i jepte përparësi Iranit. Raportimet kanë ardhur nga “Reuters”, i cili ka thënë se ka marrë informacione nga burime në Perëndim. Megjithatë, pretendimet për këtë interpretim janë hedhur poshtë nga presidenti amerikan Donald Trump.
Trump ka reaguar në rrjetet sociale, duke e cilësuar të pasaktë çdo lidhje mes asaj që është raportuar përmes burimeve ndërkombëtare dhe asaj që është rënë dakord me shkrim mes palëve. Në postimin e tij në Truth Social, ai ka nënvizuar se kushtet që janë përmendur në raportime “nuk kanë asnjë lidhje” me marrëveshjen e shkruar. Presidenti amerikan nuk ka detajuar se çfarë ishte gabim konkretisht në raportime, por ka shprehur një qëndrim të qartë se informacionet që qarkulluan nuk përkojnë me atë që është dakorduar.
Donald Trump ka shkuar edhe më tej me një vlerësim të ashpër, duke i quajtur iranianët “njerëz të pandershëm” në negociata. Sipas postimit të tij, ai ka argumentuar se ajo që Irani u ka treguar mediave nuk lidhet me kushtet reale të rënë dakord. Ai ka shtuar se “me ta nuk mund të ketë negociata me mirëbesim”, duke e quajtur “të pabesueshme” çdo pretendim të palës iraniane lidhur me arritjen e një marrëveshjeje.
Nga ana tjetër, ministri i Jashtëm iranian, Abbas Aragchi, ka theksuar se mediat duhet të përmbahen nga publikimi i spekulimeve. Ai ka kujtuar se memorandumi i mirëkuptimit i Islamabadit nuk ka nevojë të interpretohet përmes thashethemeve, ndërsa pritet të vijojnë diskutimet dhe sqarimet për fazat e ardhshme. Procesi, sipas sinjaleve të deritanishme, po zhvillohet drejt finalizimit, me shpresën që pas dakordimit të fundit, nënshkrimi të ndodhë shpejt.
Botuar fillimisht në Koha.net
