Një gjykatë në Londër ka urdhëruar Mitch Winehouse, babain e këngëtares së ndjerë Amy Winehouse, që t’u paguajë 950 mijë funte britanike, shuma që kap vlerën e mbi 1.1 milionë eurove, dy shoqeve të artistes. Vendimi vjen pasi ai ka humbur padinë që kishte ngritur kundër tyre, lidhur me shitjen në ankand të sendeve personale të Amy-t.
Amy Winehouse ndërroi jetë në korrik të vitit 2011, në moshën 27-vjeçare, si pasojë e helmimit nga alkooli. Pas vdekjes së saj, disa vite më vonë, ish-stilistja e këngëtares Naomi Parry dhe shoqja Catriona Gourlay i nxorën në ankand sende personale që i përkisnin Amy Winehouse. Ankandi përfshinte gjithsej 155 sende, duke përfshirë veshje, çanta, këpucë baleti, bizhuteri, produkte kozmetike dhe edhe një fustan që ajo kishte veshur gjatë turneut të saj të fundit në vitin 2011.
Babai i këngëtares, Mitch Winehouse, pretendoi se dy gratë nuk kishin të drejtë t’i shisnin ato sende. Sipas argumentit të tij, çështja lidhej me pronësinë dhe autoritetin e tyre për t’i nxjerrë në ankand, por gjykata nuk e pranoi këtë qëndrim. Në vendim u vlerësua se Mitch Winehouse ishte në dijeni për ankandin dhe se nuk u sollën prova që të paditurat kishin vepruar në mënyrë të pandershme apo kishin fshehur sendet.
Një pjesë e rëndësishme e vendimit lidhet edhe me mënyrën si është zhvilluar padia dhe me faktin se gjykata ka konsideruar se akuzat e ngritura ishin të rënda. Gjykatësja Sarah Clarke ka shprehur kritika të ashpra ndaj veprimeve të Mitch Winehouse, duke theksuar se ai zgjodhi të ngrinte një padi që ajo e cilësoi si të dobët dhe që e çoi atë deri në fund në mënyrë agresive.
Gjykata në Londër e gjeti padinë të pabazë dhe urdhëroi pagesën
Sipas arsyetimit të gjykatës, paditësi ngriti akuza të rënda e të pabaza, të cilat, sipas gjykatës, dëmtuan ndjeshëm reputacionin, karrierën, sigurinë financiare dhe shëndetin e të paditurave. Sarah Clarke theksoi gjithashtu një element tjetër: fakti që Mitch Winehouse e ka ndërmarrë dhe vazhduar këtë betejë ligjore duke qenë i vetëdijshëm për dy gra të reja që, sipas gjykatës, i qëndronin besnike Amyt dhe ruanin lidhjen me kujtesën e saj. Në këtë kuptim, gjykatësja e cilësoi sjelljen e tij si edhe më të rëndë.
Vendimi i kësaj gjykate vjen edhe mbi bazën e vlerësimeve të mëparshme lidhur me natyrën e sendeve që u shitën. Në një vendim të mëhershëm, gjykata ka theksuar se Amy Winehouse “njihej për bujarinë e saj të jashtëzakonshme ndaj shoqërisë, por edhe ndaj njerëzve që mezi i njihte”. Ky konstatim u përdor për të mbështetur idenë se një pjesë e sendeve mund t’u ishin dhuruar të tjerëve ose mund të kenë qenë lënë në përdorim nga vetë këngëtarja, duke e bërë pretendimin e Mitch Winehouse edhe më të vështirë për t’u pranuar.
Pas gjithë këtij procesi, gjykata ka vendosur që Mitch Winehouse të përballojë pagesën prej 950 mijë funte, shumë e cila, në konvertim, kap mbi 1.1 milionë euro. Për Naomi Parry dhe Catriona Gourlay, vendimi i Londrës i jep fund mosmarrëveshjes ligjore rreth ankandit të 155 sendeve personale të Amy Winehouse, të cilat përfshinin aspekte të ndryshme të jetës së saj të përditshme dhe, mes tyre, edhe një veshje që ajo kishte përdorur gjatë turneut të fundit më 2011.
Botuar fillimisht në Koha.net