Protesta qytetare që ka hyrë në ditën e saj të 12-të nuk ka përfunduar me tubimin para Kryeministrisë. Mijëra qytetarë kanë vijuar marshimin në rrugët e Tiranës, duke e shtrirë revoltën përtej bulevardit kryesor të kryeqytetit dhe duke e kthyer ditën në një tjetër moment të gjatë mobilizimi.
Pas fjalimeve dhe thirrjeve para selisë së qeverisë, protestuesit janë nisur drejt Zogut të Zi. Lëvizja e turmës ka krijuar kolona të gjata njerëzish, ndërsa për disa momente është bllokuar qarkullimi në një nga nyjet më të rëndësishme të Tiranës, duke e bërë protestën të dukshme në disa pika kyçe të qytetit.
Marshimi ka vazhduar më pas drejt zonës së ish-Doganës dhe më pas në Astir. Në këtë pjesë të itinerarit, qytetarët janë pritur me duartrokitje dhe brohoritje nga banorët e zonës. Në duar të shumta prej tyre valëviteshin flamuj kuqezi, ndërsa pankarta të shumta mbanin porosi kundër qeverisë, duke shoqëruar gjithë lëvizjen me thirrje të përsëritura.
Protesta vijon me marshim: nga Kryeministria drejt Astirit
Gjatë gjithë rrugës së protestës, qytetarët kanë përsëritur slogane që janë bërë tashmë simbol i kësaj lëvizjeje: “Rama në burg!”, “Berisha në burg!”, “Ju erdhi fundi!” dhe “Shqipëri e Re!”. Këto thirrje kanë shoqëruar turmën në çdo ndalesë të rëndësishme, ndërsa protestuesit kanë ruajtur një ritëm të njëtrajtshëm marshimi, pa e ndërprerë mobilizimin.
Sipas pjesëmarrësve, ndryshe nga protestat tradicionale politike, kjo lëvizje nuk synon vetëm kundër qeverisë. Protestuesit kanë theksuar se revolta e tyre drejtohet kundër gjithë klasës politike, të cilën e konsiderojnë se ka mbajtur peng vendin për më shumë se tre dekada. Në këtë kuadër, pjesëmarrësit kanë kërkuar zgjerim të bashkimit përtej radhëve të zakonshme të partive.
Pas kalimit në Astir, protesta është rikthyer sërish drejt qendrës së Tiranës, duke kaluar përmes Bulevardit “Dëshmorët e Kombit”. Kështu është mbyllur edhe një ditë tjetër mobilizimi masiv, të cilën organizatorët e cilësojnë si historike. Megjithatë, vëmendja e turmës dhe organizatorëve ka kaluar menjëherë te protesta e nesërme, për të cilën janë ndërtuar edhe thirrjet për pjesëmarrje.
Në përfundim të marshimit, organizatorët dhe aktivistët kanë shpërndarë një thirrje të fortë për pjesëmarrje sa më të madhe, pas njoftimit të kryeministrit Edi Rama për zhvillimin e një tubimi në Sheshin “Italia” në të njëjtën orë me protestën qytetare. Protestuesit e kanë interpretuar këtë si një përpjekje për të zbehur revoltën popullore dhe kanë paralajmëruar se përgjigjja duhet të jetë më e gjerë e më masive. “Nesër të jemi sa më shumë kundër antimitingut të Ramës me administratën e tij!”, ishte mesazhi që u përcoll vazhdimisht në fund të tubimit.
Një pjesë e konsiderueshme e thirrjeve u është drejtuar edhe punonjësve të administratës publike. Protestuesit kanë kërkuar që ata të mos përdoren si mburojë politike e qeverisë, por të bashkohen me qytetarët që kërkojnë ndryshim. Organizatorët kanë argumentuar se pjesëmarrja masive e ditëve të fundit tregon se revolta po zgjerohet përtej kufijve të zakonshëm politikë dhe se për herë të parë pas shumë vitesh qytetarët po organizohen pa partitë tradicionale. Ndërsa protesta hyn në ditën e 13-të, pritet përballja e nesërme mes tubimit qytetar dhe antimitingut të paralajmëruar nga kryeministri, në një tjetër moment të rëndësishëm të lëvizjes që prej gati dy javësh mban në këmbë Tiranën.
Botuar fillimisht në Bota Sot