Shqipëria do të luajë nesër një ndeshje miqësore kundër Izraelit, takim që vjen me interes të madh për shkak se do të jetë sfida e parë nën drejtimin e trajnerit të ri, Maran. Përballja ndonëse e karakterit testues, pritet të shërbejë si pikënisje për mënyrën e punës që tekniku po i vendos skuadrës, si në aspektin taktik, ashtu edhe në atë të qasjes në lojë.
Në konferencën për shtyp, Maran ka theksuar se objektivi i tij kryesor është të ndërtojë një Shqipëri që kërkon të zhvillojë lojën në mënyrën më të mirë të mundshme. Ai nënvizoi se, me kaq pak kohë në dispozicion, nuk ka qenë e lehtë të përgatiten të gjitha detajet që duhen për të kaluar idetë në fushë. Megjithatë, trajneri u ndal te entuziazmi që ka parë te futbollistët dhe te motivimi i tyre për të punuar e për të dhënë maksimumin në ndeshje.
“Sigurisht që siç e kam thënë, ajo çfarë është në fokus, është që të jemi një Shqipëri që kërkon të bëjë ndeshjen më të mirë. Me kaq pak kohë, ka qenë e vështirë për të bërë gjithçka që kemi përgatitur dhe ajo që do të dalë në fushë”, tha Maran. Ai shtoi se i pëlqyen dëshirat dhe motivimi i lojtarëve, duke e konsideruar skuadrën si të motivuar dhe duke pritur të shihet kjo gjë edhe gjatë asaj që do të shfaqet në fushë.
Shqipëria duhet të ketë ADN dhe të mbajë topin
Maran e konsideroi Izraelin një kundërshtar jo të lehtë, duke theksuar se është ekip që “e detyron kundërshtarin të luajë keq”. Sipas trajnerit, ndaj Izraelit duhet të ketë intensitet në lojë dhe skuadra duhet të shmangë krijimin e hapësirave për kundërshtarin. Për këtë arsye, ndeshja shihet si një test i mirë si për trajnerin, ashtu edhe për lojtarët, për të parë se si do të reagojë ekipi ndaj një rivali që e ndërlikon planin e kundërshtarit.
Tekniku theksoi se kjo nuk është një krahasim me ndeshje të nivelit të klubeve të mëdha, por një përballje ku në qendër është Shqipëria dhe nevoja për të ndërtuar identitetin e vet. “Nuk është ndeshje PSG-Arsenal, por është Shqipëria dhe ne duhet të krijojmë ADN në bazë të lojtarëve tanë”, u shpreh Maran. Ai nënvizoi se një trajner, nëse mban gjithçka të sigurt dhe i sheh si absolute idetë e tij, nuk mund të evoluojë, ndërsa Maran tha se i vë vazhdimisht idetë e tij në diskutim.
Sipas tij, futbolli ka ndryshuar, ashtu si kanë ndryshuar edhe lojtarët në vitet e fundit. Ajo që i pëlqen trajnerit është që skuadra, kur të dalë në fushë, të bazohet te karakteristikat e futbollistëve dhe ta mbyllë ndeshjen me rezultat pozitiv. Maran kërkoi që vështirësitë e çdo ndeshjeje të mos dalin në pah, duke nënkuptuar se skuadra duhet të ruajë qetësi dhe të menaxhojë momente të vështira gjatë lojës.
Në vijim, Maran theksoi edhe një tjetër parim: dëshiron një skuadër agresive që të mbajë topin. Ai shtoi se ndaj Izraelit kjo do të jetë e vështirë, sepse kundërshtari “fshihet te detajet e posedimit të topit” dhe mënyra si e menaxhon lojën. Trajneri kërkoi që ekipi i tij të dalë me kurajo dhe personalitet në fushë, duke e lidhur këtë qasje me synimin për të ndërtuar një Shqipëri që luan me identitet, ruan kontrollin dhe kërkon të fitojë ndeshjen.
Botuar fillimisht në Sport Ekspres