Jared Kushner ka reaguar ndaj raportimeve të disa mediave amerikane për projektin e planifikuar në zonën e Zvërnecit, në Shqipëri. Në përgjigjen e tij, ai i ka hedhur poshtë pretendimet se toka i është dhënë nga qeveria shqiptare, duke sqaruar se marrëveshja është realizuar përmes një transaksioni privat dhe duke dhënë shifra konkrete për vlerën e blerjes dhe parashikimet e investimit.
Kushner ka theksuar se toka nuk është fituar si grant apo përmes një vendimi qeveritar, por është blerë nga partnerët e tij nga një palë private. Sipas tij, çmimi i blerjes ka qenë 230 milionë euro, në një transaksion privat. Ai ka shtuar gjithashtu se bëhet fjalë për “ndër çmimet më të larta të paguara në rajon” për një marrëveshje me përmasa të tilla.
Në reagim ai ka shpjeguar edhe procesin ligjor të pronësisë. Kushner thotë se titulli i pronësisë është shqyrtuar nga këshilltarët ligjorë dhe është verifikuar përpara se të vazhdohej me projektin. Më tej, ai ka paraqitur se puna për idenë ka nisur fillimisht si investim privat, i mbështetur në besimin se Shqipëria ka potencial ekonomik dhe turistik.
Projekt i pavarur privat: 230 mln euro dhe deri 4 mld investim
Ai ka deklaruar se investimi përfaqëson kapital të konsiderueshëm privat dhe se sipërmarrja është ndërmarrë edhe pse, sipas tij, nuk ka garanci për rezultatin. Kushner argumenton se motivi kryesor lidhet me besimin te Shqipëria dhe te shqiptarët, si dhe me idenë se projekti mund të sjellë vlera afatgjata në ekonomi dhe në zhvillimin e zonës.
Sipas planit që ai përshkruan, nëse projekti rezulton i suksesshëm, investimi i përgjithshëm mund të arrijë në rreth 4 miliardë euro. Kushner ka lidhur këtë shifër me pritshmërinë për krijimin e vendeve të punës dhe gjenerimin e aktivitetit ekonomik, ndërsa thekson se projekti synon edhe të rrisë dukshmërinë ndërkombëtare të Shqipërisë.
Një pjesë e konsiderueshme e reagimit i është kushtuar punës përgatitore që, sipas tij, ka zgjatur më shumë se tre vjet. Kushner thotë se gjatë kësaj periudhe janë shpenzuar dhjetëra miliona dollarë për studimin e terrenit, mjedisit dhe nevojave të rajonit. Ai përmend se në punë kanë qenë përfshirë arkitektë, dizajnerë, inxhinierë, ekspertë mjedisorë dhe partnerë të tjerë, me qëllim të hartimit të një projekti që të ketë ndikim afatgjatë në zhvillimin ekonomik të vendit.
Kushner ka sqaruar edhe rolin e tij në këtë nismë. Ai thotë se përgjegjësia e tij lidhet kryesisht me vizionin dhe dizajnin, ndërsa e përshkruan veten si partner në pakicë dhe jo të përfshirë në menaxhimin e përditshëm të projektit. Në reagim ai ka përmendur partnerët e përfshirë, duke përfshirë Asher Abehsera, të cilin e quan mik dhe partner biznesi, si dhe familjen shqiptare Kastrati, të cilën e paraqet si atë që ua kishte prezantuar fillimisht mundësinë e investimit në këtë zonë.
Ai ka përmendur gjithashtu Ramez dhe Moutaz Alkhayyat, duke thënë se ishte takuar për herë të parë me ta në Doha gjatë Kupës së Botës 2022. Kushner ka shpjeguar historinë e tyre si sipërmarrës, që u larguan nga Siria dhe ndërtuan bizneset e tyre në Katar. Në lidhje me raportimet, ai ka mohuar se projekti ka ecur për shkak të lidhjeve të tij me presidentin amerikan Donald Trump. Sipas shpjegimit të tij, interesi kishte nisur në verën e vitit 2021, kur ai ishte ende qytetar privat, dhe para se Trump të shpallte kandidaturën për zgjedhjet presidenciale të vitit 2024.
Edhe për aeroportin, i përmendur në disa prej raportimeve, Kushner ka dhënë një version tjetër. Ai thotë se aeroporti ishte miratuar përpara se ai ta shihte projektin për herë të parë dhe se një nga faktorët që e kishte tërhehequr drejt kësaj mundësie investimi ka qenë pikërisht ky komponent. Në fund, Kushner ka përsëritur se vendimi për vazhdimin e projektit i takon Shqipërisë dhe institucioneve të saj.
Ai ka mbyllur reagimin me një mesazh shpresëdhënës për rezultatet e mundshme të nismës: nëse projekti miratohet, Kushner thotë se pret të krijohet diçka për të cilën shqiptarët të jenë krenarë, dhe që familjet nga Shqipëria dhe nga vende të ndryshme të botës ta shijojnë për breza. Po ashtu, ai nënvizon se sipërmarrja parashikon zhvillim sipas standardeve të larta mjedisore dhe se projekti duhet të kalojë të gjitha procedurat rregullatore e mjedisore në Shqipëri dhe të marrë miratimet përkatëse.
Botuar fillimisht në Telegrafi
