Çmimet e derivateve në Kosovë po shfaqin shenja stabilizimi, edhe pse janë ndikuar më parë nga luhatjet në tregjet ndërkombëtare. Këtë e ka deklaruar Ministrja në detyrë e Industrisë, Ndërmarrësisë, Tregtisë dhe Inovacionit, Mimoza Kusari-Lila, duke theksuar se ditëve të fundit po vërehet një kthesë drejt normalizimit gradual të çmimeve.
Ministrja në detyrë ka shpjeguar se rritja e çmimeve në Kosovë ka reflektuar rritjen e çmimeve në bursat ndërkombëtare. Sipas saj, çmimet në tregun kosovar lidhen drejtpërdrejt me atë që ndodh në tregjet globale, dhe kjo reflektohet më pas edhe në mekanizmin e kontrollit përmes marzhës së fitimit. Ajo ka nënvizuar se shumica e furnizimit në Kosovë vjen nga burime të tjera, por ndikimi nga çmimet e bursës vazhdon të përkthehet në çmime më të larta në tregun vendës.
“Çmimet në Kosovë kanë qenë drejtpërdrejt të ndikuara nga çmimet e berzës. Për shkak se shumica e furnizimit në Kosovë vjen nga burime të tjera, por për shkak se çmimi në stoqet ndërkombëtare është rritur, reflekton te ne në rritjen e çmimit dhe rrjedhimisht edhe në mekanizmin tonë për kontrollimin e çmimit përmes marzhës së fitimit”, ka thënë Kusari-Lila.
Stabilizimi po vërehet, ndërsa marzha mbetet në fuqi deri më 4 korrik
Ndërkaq, duke folur për ecurinë aktuale të tregut, ministrja në detyrë ka thënë se tashmë kanë filluar të shfaqen shenja të rënies së lehtë të çmimeve. Ajo ka shtuar se stabilizimi nuk është diçka që matet menjëherë, pasi kërkon kohë që tregu dhe marrëveshja e arritur të tregojnë qëndrueshmëri afatgjatë. Në bazë të vëzhgimeve ditore, ajo ka thënë se çmimet po stabilizohen, por për plotësimin e stabilitetit nevojitet një periudhë shtesë.
Në vijim, Kusari-Lila ka shpjeguar se nëse brenda disa javëve vazhdon të dëshmohet stabiliteti i tregut dhe të marrëveshjes së publikuar, atëherë pritet që çmimet e derivateve të arrijnë një stabilizim më të plotë në Republikën e Kosovës, në përputhje me vlerën apo çmimin ditor të stoqeve në tregjet globale. Sipas saj, ruajtja e ritmit të çmimeve në ditët në vijim do të jetë vendimtare për konfirmimin e trendit.
Sa i përket masave që janë marrë nga ministria, Kusari-Lila ka theksuar se ka pasur respektim të vendimit për përcaktimin e çmimit në bazë të vlerës mesatare të 10 milionë litrave derivate. Ajo ka thënë se që nga kalimi në këtë mënyrë të përcaktimit të çmimit, në baza ditore është bërë llogaritja e çmimit dhe më pas është përcjellë në të gjitha pikat. Ministrja në detyrë ka theksuar se ky vendim vazhdon të mbetet në fuqi deri më 4 korrik dhe ka shpjeguar afatin e tij njëmujor.
“Mund të them se prej se kemi kaluar në vendosjen e çmimit në bazë të vlerës mesatare të çmimit në 10 milionë litra, ka pasur një respektim në masë të këtij vendimi, në bazë ditore është ditur sa është çmimi i derivateve dhe në bazë ditore është përcjellë në të gjitha pikat. Ky vendim vazhdon të jetë në fuqi deri me datën 4 të muajit të ardhshëm. Do të thotë, me 4 qershor kam nënshkruar vendimin i cili ka afat njëmujor”, ka shtuar Kusari-Lila.
Ministrja në detyrë ka përmendur edhe planin e institucioneve për periudhën pasuese. Ajo ka thënë se institucionet do të vazhdojnë monitorimin e tregut përpara se të vendosin nëse masa do të vazhdojë apo nëse do të rikthehet përcaktimi i çmimeve sipas tregut të lirë. Në këtë mënyrë, monitorimi pritet të shërbejë për të vlerësuar nëse stabilizimi i vërejtur do të jetë i qëndrueshëm dhe i mjaftueshëm për një rregullim tjetër të mekanizmave të çmimit.
Botuar fillimisht në Koha.net