Toni Kroos ka dalë sërish me një analizë të ashpër ndaj Barcelonës, duke vënë në pikëpyetje aftësitë e skuadrës së Hansi Flick për t’u përballur me kundërshtarët më të fortë në Ligën e Kampionëve. Ish-mesfushori gjerman, i njohur për qasjen e drejtpërdrejtë ndaj futbollit, ka theksuar se katalunasit luajnë bukur, por nuk i ka bindur te repartin defensiv.
Sipas Kroos, Barcelona mund të ketë stil ofensiv që i krijon shume raste ekipit, megjithatë ky plan bëhet i rrezikshëm kur përballesh me skuadra që dinë ta ndëshkojnë hapësirën. Ai është shprehur se i pëlqen mënyra si lëviz dhe ndërton lojën Barcelona, por beson se mungon “cilësia e jashtëzakonshme” në mbrojtje për ta mbështetur atë mënyrë loje pa u ekspozuar ndaj kundërsulmeve.
“Më pëlqen mënyra se si luan Barcelona, por nuk kanë cilësinë e jashtëzakonshme në mbrojtje për të luajtur në atë mënyrë pa e ekspozuar veten. Ka shumë hapësira për t’u shfrytëzuar dhe mbrojtësit e tyre nuk kanë shpejtësinë apo aftësitë e jashtëzakonshme defensive për t’i mbuluar ato hapësira”, ka thënë Kroos. Në këtë mënyrë, ai e ka vendosur çështjen kryesore te balanca mes sulmit dhe mbrojtjes, duke nënvizuar rrezikun që lind kur kundërshtari kalon shpejt në fazën e sulmit.
Barcelona i ka hapësirat në mbrojtje, i thotë Kroos
Ish-futbollisti gjerman ka vijuar më tej me një argument që lidhet drejtpërdrejt me Ligën e Kampionëve. Ai ka theksuar se në këtë kompeticion nuk mjafton vetëm të krijosh raste, sepse përballesh edhe me ekipe që mund të shënojnë disa gola brenda një ndeshjeje. Po ashtu, ai ka përmendur edhe rastet kur kundërshtarët mbrohen në mënyrë shumë të organizuar, duke e bërë të vështirë për Barcelonën që të zhvillojë lojën e saj të zakonshme.
“Në ato situata duhet të dish edhe si të mbrohesh. Barcelona gjithmonë përpiqet të krijojë më shumë raste se kundërshtari, por në Ligën e Kampionëve përballesh me skuadra që mund të shënojnë disa gola në një ndeshje”, ka shtuar Kroos. Sipas tij, sfida qëndron te aftësia për ta ruajtur kontrollin e lojës edhe kur kundërshtari e shndërron shpejt topin në aksion ofensiv, sidomos në momentet kur Barcelona lë hapësira pas shpinës së mbrojtjes.
Ndërkohë, Kroos ka veçuar një emër në mbrojtjen e Barcelonës, duke thënë se ka gjetur te Pau Cubarsi mbrojtësin që i afrohet më shumë profilit që kërkohet. Ai ka vlerësuar forcën dhe shpejtësinë e Cubarsit në duelet individuale, duke e cilësuar si mbrojtësin më të mirë të katalunasve.
“Për mua, Cubarsi është bindshëm mbrojtësi i tyre më i mirë. Ai ka forcën për t’i fituar duelet individuale dhe shpejtësinë për t’i përballuar situatat e vështira. Por kur i shikoj mbrojtësit e tjerë, nuk shoh dikë të cilit do t’i besoja të mbronte i vetëm kundër një sulmuesi me 30 metra hapësirë pas shpinës”, ka thënë ish-lojtari i Real Madridit. Kështu, Kroos e ka vendosur theksin se problemi nuk është vetëm te një futbollist, por te mungesa e alternativave të ngjashme që mund të mbulojnë hapësirat me shpejtësi dhe kontroll.
Në fund, ai ka marrë si krahasim Dayot Upamecanon e Bayern Munichut. Sipas Kroos, Barcelona nuk ka një mbrojtës të këtij profili që mund të lihet vetëm në një duel një kundër një, me shumë hapësirë pas shpinës, pa krijuar rrezik të menjëhershëm.
“Barcelona nuk ka dikë si Upamecano, një mbrojtës që mund ta lësh krejtësisht të vetëm në një duel një kundër një, me 30 metra hapësirë pas tij, dhe përsëri të jesh i sigurt se do ta përballojë situatën. Me Cancelo, Gerard Martín dhe lojtarë të ngjashëm, kjo bëhet shumë më e vështirë”, ka përfunduar Kroos./Telegrafi/
Botuar fillimisht në Telegrafi