Kosova ka nënshkruar të hënën një marrëveshje formale për t’iu bashkuar listës së shkurtër të shteteve që janë zotuar të jenë pjesë e Forcës Ndërkombëtare Stabilizuese (ISF) në Gaza. Hapi u bë i ditur përmes një postimi në rrjetet sociale të Bordit të Paqes, të mbështetur nga Shtetet e Bashkuara.
Në njoftim thuhet se përfaqësuesit e Republikës së Kosovës, Bordit të Paqes dhe Forcës Ndërkombëtare Stabilizuese nënshkruan Marrëveshjen për Shtetet Pjesëmarrëse, me qëllim përfshirjen e Kosovës në ISF. Marrëveshja u formalizua nga gjenerallejtënant Bashkim Jashari, komandant i Forcës së Sigurisë së Kosovës (FSK), dhe nga gjeneralmajor Jasper Jeffers, komandant amerikan i ISF-së.
Dokumenti e lidh Kosovën drejtpërdrejt me misionin e planifikuar, i cili bazohet në një plan 20-pikësh për Paqe të presidentit amerikan, Donald Trump. Në deklaratën e Bordit të Paqes thuhet se ky zhvillim i rëndësishëm nënvizon përkushtimin e Kosovës ndaj misionit të ISF-së dhe mbështetjen e vazhdueshme të saj për planin 20-pikësh.
Kosova zyrtarizon pjesëmarrjen në Forcën ISF në Gazë
Kosova ishte ndër vendet e para që e shprehën zotimin për dërgimin e trupave në kuadër të këtij misioni në Gazë. Në fillim të vitit, dërgimi i FSK-së u miratua nga Kuvendi i Kosovës dhe u autorizua nga ushtruesja e detyrës së presidentit, Albulena Haxhiu. Këto vendime i paraprinë fazës së nënshkrimit të marrëveshjes formale, që e konfirmon pjesëmarrjen e Kosovës në kuadër të ISF-së.
Ndërkohë, përgatitjet praktike kanë nisur më herët. Një ekip i Forcës së Sigurisë së Kosovës shkoi në prill në Rripin e Gazës për të bërë një vlerësim të vendit ku pritet të veprojnë trupat kosovare, si pjesë e një force ndërkombëtare në territorin palestinez. Kjo fazë e vlerësimit synon të përcaktojë rrethanat e terrenit për operimin e trupave dhe për mbarëvajtjen e misionit në zonë.
Deri tani, pesë shtete kanë nënshkruar ose janë zotuar të dërgojnë trupa në Forcën Ndërkombëtare të Stabilizimit (ISF): Kosova, Shqipëria, Indonezia, Maroku dhe Kazakistani. Ndërkaq, Egjipti dhe Jordania janë zotuar të trajnojnë policinë në kuadër të rolit të tyre në zbatimin e skemës së sigurisë pas konfliktit.
Forca Ndërkombëtare Stabilizuese lidhet me planin 20-pikësh të Trump, i cili synon t’i japë fund luftës së Izraelit në Gazë. Sipas këtij plani, forcat paqeruajtëse duhet të zhvendosen në Gazë për të siguruar zonat pas tërheqjes së forcave izraelite, për të trajnuar forca e reja policore palestineze dhe për të mbështetur dërgimin e ndihmave atje. Pjesa më e madhe e Gazës vazhdon të mbetet në rrënoja pas dy vjetësh luftë, e cila u shkaktua nga sulmet e udhëhequra nga Hamasi ndaj Izraelit më 7 tetor 2023. Hamasi cilësohet si grup terrorist nga SHBA dhe BE.
Megjithatë, edhe pse përpjekjet për dërgimin e trupave u shoqëruan me njoftime në fund të korrikut, faza e implementimit ka ngecur. Sipas informacioneve, përpjekjet nuk kanë avancuar sepse as Izraeli, as Hamasi nuk kanë pranuar të përmbushin kushtet që do të mundësonin zbatimin e marrëveshjes. I dërguari i Trumpit dhe dhëndri i tij, Jared Kushner, zhvilloi takime të ndara në gusht me zyrtarë të Hamasit dhe me udhëheqës izraelitë, por u largua pa ndonjë përparim, pasi të dyja palët ruajtën qëndrimet e tyre në kërkesat kryesore.
Si rezultat, mbetet e paqartë se kur do të mund të dërgohen trupat e misionit ndërkombëtar në Gazë. Armëpushimi ka ulur dhunën në terren, por nuk i ka dhënë fund sulmeve izraelite dhe as nuk ka garantuar çarmatimin e militantëve. Që nga arritja e armëpushimit në tetor, më shumë se 1.200 palestinezë dhe katër ushtarë izraelitë janë vrarë në Gaza, sipas zyrtarëve shëndetësorë të Gazës dhe ushtrisë izraelite.
Botuar fillimisht në Bota Sot