Komisionarja europiane për Zgjerim, Marta Kos, ka theksuar se zgjerimi mbetet një prej prioriteteve të Bashkimit Evropian dhe se brenda bllokut ka hapësirë për të gjitha shtetet e Ballkanit Perëndimor. Deklaratat e saj u dhanë në Bruksel, në kuadër të takimit ku ministrat e Jashtëm të vendeve anëtare të Bashkimit Evropian po takohen me homologët e tyre nga rajoni. Në qendër të diskutimeve janë paralajmëruar tema të rëndësishme gjeopolitike, të lidhura drejtpërdrejt me rrugën evropiane të vendeve të Ballkanit Perëndimor dhe me pritjet që Brukseli ka nga kandidatët për anëtarësim.
Para gazetarëve, Kos foli për vendet e rajonit dhe për proceset që lidhen me integrimin e tyre në Bashkimin Evropian, por nuk e përmendi Kosovën. Mesazhi kryesor i saj ishte se perspektiva evropiane e rajonit mbetet e hapur dhe se vendet që japin rezultate në procesin e reformave duhet të shohin edhe përgjigje konkrete nga ana e Bashkimit Evropian. Ajo e paraqiti zgjerimin jo vetëm si një synim politik, por edhe si një proces që duhet të prodhojë rezultate të prekshme për vendet kandidate dhe për qytetarët e tyre.
“Ka vend për të gjitha shtetet e Ballkanit Perëndimor në Bashkimin Evropian dhe dua të jap një mesazh të qartë që zgjerimi është prioritet për Bashkimin Evropian dhe, nëse kandidatët tanë japin rezultate, atëherë edhe ne duhet të japim rezultate, dhe po i japim ato”, tha Kos. Me këtë deklaratë, ajo synoi të nënvizojë se marrëdhënia mes vendeve të rajonit dhe institucioneve të BE-së duhet të ndërtohet mbi përmbushjen e detyrimeve nga kandidatët dhe mbi hapa të matshëm nga Brukseli në drejtim të integrimit.
Zgjerimi i BE-së dhe Plani i Rritjes
Një pjesë e rëndësishme e deklarimit të Marta Kos lidhej me procesin e anëtarësimit të Malit të Zi në Bashkimin Evropian. Ajo u ndal te themelimi i grupit punues për anëtarësimin e Malit të Zi në BE, duke theksuar se qytetarët e këtij vendi janë shumë të orientuar drejt Bashkimit Evropian. “Qytetarët e Malit të Zi janë vërtet shumë pro”, u shpreh Kos, duke e lidhur këtë qëndrim me ecurinë e vendit në procesin e integrimit dhe me mbështetjen që një proces i tillë gëzon brenda shoqërisë malazeze.
Kos foli edhe për Planin e Rritjes, një nga instrumentet përmes të cilit Bashkimi Evropian synon të mbështesë integrimin gradual të vendeve të Ballkanit Perëndimor. Ajo tha se zbatimi i këtij plani po ecën mirë dhe paralajmëroi disbursime financiare në ditët në vijim. “Pastaj, sa i përket Planit të Rritjes, zbatimi po ecën mirë dhe në ditët në vijim do të disbursojmë afro 200 milionë dollarë për Malin e Zi, Shqipërinë dhe Malin e Zi. Dhe po sjellim gjithashtu rezultate konkrete kur bëhet fjalë për integrimin gradual, siç e dini javën e kaluar Serbia iu bashkua Shqipërisë, Malit të Zi dhe Maqedonisë së Veriut në SEPA”, tha ajo.
Ky paralajmërim për afro 200 milionë dollarë u vendos në kontekstin e përpjekjeve të BE-së për të sjellë përfitime konkrete për vendet e rajonit gjatë rrugës së tyre drejt anëtarësimit. Në deklaratën e saj, Kos e përmendi integrimin gradual si një fushë ku tashmë po shihen hapa të prekshëm. Ajo veçoi edhe faktin se Serbia javën e kaluar iu bashkua Shqipërisë, Malit të Zi dhe Maqedonisë së Veriut në SEPA, duke e paraqitur këtë si shembull të rezultateve konkrete që po vijnë paralelisht me procesin më të gjerë të zgjerimit.
Takimi në Këshillin e Punëve të Jashtme në Bruksel po zhvillohet në një moment kur Bashkimi Evropian po e vendos sërish Ballkanin Perëndimor në fokus të diskutimeve politike dhe ekonomike. Ministrat e Jashtëm të vendeve anëtare të BE-së dhe homologët e tyre nga Ballkani Perëndimor pritet të trajtojnë çështje që lidhen me zhvillimet gjeopolitike, me ecurinë e reformave dhe me mënyrat se si procesi i integrimit mund të bëhet më i prekshëm për rajonin. Deklaratat e Marta Kos e vendosën theksin te mesazhi se zgjerimi mbetet në agjendën e Bashkimit Evropian dhe se vendet e Ballkanit Perëndimor, nëse përmbushin pritjet, duhet të marrin rezultate nga Brukseli.
Botuar fillimisht në Bota Sot