Aeroporti Barcelona–El Prat Josep Tarradellas në Spanjë dhe Aeroporti i Düsseldorfit në Gjermani janë shpallur aeroportet më të mira në botë, sipas një indeksi të përpiluar nga Consumer Choice Center. Edicioni i ri i “World Consumer Airport Index” tenton të masë “përvojën” e udhëtarëve me disa kritere, sepse mënyra se si e vlerëson dikush aeroportin më të mirë nuk është e njëjtë për të gjithë.
Indeksi merr parasysh aspekte të ndryshme që lidhen me udhëtimin, nga shërbimet si dyqanet pa taksa (duty-free), te distanca nga qendra e qytetit. Po ashtu, vlerësimi lidhet me numrin e destinacioneve që mund të arrihen direkt, si dhe me mënyrën se si aeroporti lidhet me transportin urban. Në këtë kuadër, analizohet nëse ekziston akses i drejtpërdrejtë me metro ose shërbime kombëtare hekurudhore.
Një pjesë tjetër e rëndësishme e vlerësimit ka të bëjë me lidhjet brenda aeroportit: sa të lehta janë rrugët mes portave të imbarkimit dhe terminaleve, çfarë zgjedhjeje u ofrohet pasagjerëve për kompanitë ajrore, si dhe vonesat mesatare. Përveç kësaj, aeroportet “marrin pikë bonus” nëse koha e pritjes në kontrollet e sigurisë është më pak se tre minuta dhe nëse nuk ka kufizime për fluturimet gjatë natës.
Rezultati është i organizuar në dy renditje: njëra për aeroportet që kanë më shumë se 47.2 milionë pasagjerë në vit dhe tjetra për ata që shërbejnë më pak se ky numër. Në të dyja listat, të dyja vendet e para u takojnë aeroportëve evropianë. Për aeroporte të mëdha, në krye renditet Barcelona–El Prat Josep Tarradellas, ndërsa për aeroporte të vogla kryeson Aeroporti i Düsseldorfit. Të dy aeroportet kanë performuar mirë edhe në kohën e pritjes në kontrollet e sigurisë: në Barcelonë pasagjerët presin vetëm rreth tre minuta, ndërsa në Düsseldorf procesi i kontrollit përshkruhet si pothuajse i menjëhershëm.
Koha e sigurisë dhe lidhjet e transportit janë thelbësore në renditjen e aeroporteve
Indeksi nxjerr në pah edhe aeroportet me rezultate më të dobëta, duke treguar se çfarë problemesh shfaqin në disa aspekte kyçe. Në kategorinë e aeroporteve të mëdha, ndër më të dobëtit janë Antalya, Guangzhou Baiyun dhe Frankfurt. Ndërsa në kategorinë e aeroporteve më të vogla, rezultatet më të dobëta i kanë pasur Seoul Gimpo, Punta Cana dhe London Stansted.
Sipas kritereve që përdor indeksi, këto aeroporte kanë disa mangësi të përbashkëta. Mes tyre përmendet largësia e madhe nga qendrat e qyteteve dhe mungesa e opsioneve të transportit përmes aplikacioneve për porositjen e udhëtimeve, përveç taksive tradicionale. Një problem tjetër lidhet me qasjen e dobët në shërbimet hekurudhore, si dhe me kohë të gjata pritjeje në kontrollet e sigurisë. Për më tepër, indeksi evidenton një përqindje të lartë të vonesave mesatare në këto aeroportet.
Lista e aeroporteve më të mira të mëdha në botë, sipas renditjes, përfshin: Barcelona–El Prat Josep Tarradellas (Spanjë), Leonardo da Vinci–Fiumicino (Romë, Itali), Los Angeles International Airport (SHBA), Bangkok Suvarnabhumi International Airport (Tajlandë), Charles de Gaulle Airport (Paris, Francë), King Abdulaziz International Airport (Jeddah, Arabinë Saudite), London Heathrow Airport (Mbretëria e Bashkuar), Adolfo Suárez Madrid–Barajas Airport (Spanjë), Tokyo International Airport (Haneda) (Japoni) dhe Dubai International Airport (Emiratet e Bashkuara Arabe).
Ndërkaq, aeroportet më të mira të vogla në botë janë: Düsseldorf Airport (Gjermani), Zurich Airport (Zvicër), Copenhagen Airport (Danimarkë), Helsinki Airport (Finlandë), Milan Malpensa Airport (Itali), Oslo Gardermoen Airport (Norvegji), Munich Airport (Gjermani), Vancouver International Airport (Kanada), Brussels Airport (Belgjikë) dhe Berlin Brandenburg Airport (Gjermani). Në tërësi, indeksi e çon në vëmendje faktin që performanca e një aeroporti matet jo vetëm me destinacionet, por edhe me efikasitetin e brendshëm dhe lehtësinë e udhëtimit për pasagjerët.
Botuar fillimisht në Telegrafi
