Ministri i Infrastrukturës dhe Energjisë në Shqipëri, Enea Karakaçi, deklaroi se Aeroporti Ndërkombëtar i Vlorës është një nga projektet më të rëndësishme infrastrukturore të dekadës në vend. Ai theksoi se çdo vonesë apo bllokim i këtij projekti sjell pasoja të drejtpërdrejta ekonomike dhe reputacionale për Shqipërinë.
Gjatë një konference për shtyp, ministri iu referua situatës që ka lindur nga mosmarrëveshjet mes aksionarëve lidhur me projektin. Karakaçi garantoi se shteti do të sigurojë funksionimin e aeroportit pavarësisht konflikteve mes palëve, duke iu referuar edhe klauzolave kontraktore. Sipas tij, këto klauzola parashikojnë masa që nisin nga vendosja e penaliteteve, e deri te zgjidhja e njëanshme e kontratës koncesionare.
Karakaçi e cilësoi aeroportin si një element kritik për sovranitetin dhe sigurinë kombëtare. Ai argumentoi se mosoperimi apo bllokimi i tij nuk është thjesht çështje që lidhet me biznesin privat, por është çështje e interesit publik dhe shtetëror, ku shteti ushtron kompetenca të plota mbikëqyrëse dhe rregullatore.
Ministri nënvizoi se vonesat ndikojnë në mënyrë të drejtpërdrejtë te disa grupe të interesuara. Sipas tij, çdo ditë mospërfundimi përkthehet në humbje ekonomike për operatorët turistikë, për komunitetin lokal dhe për buxhetin e shtetit. Përveç aspektit ekonomik, Karakaçi tha se kjo situatë dëmton edhe imazhin e Shqipërisë në sytë e investitorëve të huaj.
Aeroporti i Vlorës: shteti garanton funksionimin pavarësisht mosmarrëveshjeve
“Situata po dërgon mesazhe negative tek investitorët e huaj”, deklaroi Karakaçi, duke e lidhur drejtpërdrejt mungesën e operacionalitetit me reputacionin e projektit. Ai shtoi se aeroportet koncesionare me karakter strategjik janë nën mbikëqyrjen e shtetit dhe se ky i fundit garanton funksionimin e tyre në përputhje me kuadrin ligjor dhe kontraktual.
Ministri bëri të ditur se Ministria e Infrastrukturës dhe Energjisë ka ndjekur të gjitha fazat e projektit në përputhje me detyrimet ligjore dhe kontraktore. Karakaçi shprehu shqetësim për vonesat e krijuara, duke theksuar se bllokimi fizik i kantierit, konfliktet gjyqësore ndërmjet aksionarëve dhe shkeljet kontraktore kanë sjellë vonesa kritike. Ai tha se kjo sjellje nuk do të tolerohet dhe se shteti do të përdorë të gjitha mjetet ligjore për të siguruar respektimin e detyrimeve.
Sipas ministrit, konflikti që ka penguar zhvillimin e aeroportit është një mosmarrëveshje civile dhe kontraktore mes palëve private, ku Ministria nuk është palë dhe nuk mban interes në favor të asnjërës palë aksionere. Megjithatë, ai theksoi se shteti ka detyrimin të garantojë që asnjë mosmarrëveshje mes subjekteve private të mos pengojë realizimin e një infrastrukture me rëndësi kombëtare.
Karakaçi tha se zgjidhja e konfliktit u takon palëve dhe gjykatave kompetente, por kjo nuk mund të shërbejë si justifikim për moszbatimin e detyrimeve kontraktore dhe për mosvënien në funksion të aeroportit. Ai theksoi se Aeroporti Ndërkombëtar i Vlorës aktualisht nuk është operacional dhe se operacionaliteti nuk lidhet vetëm me ndërtimin e veprës civile. Për të vijuar me operimin ajror kërkohen edhe certifikatat përkatëse. Ministri e cilësoi si fakt publik se ende nuk është arritur as përmbyllja e plotë e infrastrukturës civile, as operacionaliteti sipas kushteve të kontratës, të cilat duhej të ishin përmbushur deri në atë moment.
Ai shtoi se mosmarrëveshja, e cila ka marrë vëmendje publike gjatë periudhës së fundit, ka kaluar nga niveli civil në procese gjyqësore dhe deri në procedura penale, duke ndikuar në vonesat e mëtejshme të realizimit të operacionalitetit dhe në reputacionin e projektit. Ministri e vuri theksin te impakti edhe për qytetarët, duke thënë se kjo vepër infrastrukturore është e rëndësishme për vendin, ndërsa qeveria synon zhvillimin e turizmit dhe ekonomisë përmes investimit.
Në vijim, Karakaçi tha se Ministria e Infrastrukturës dhe Energjisë është e angazhuar të zbatojë klauzolat përkatëse të kontratës koncesionare për të garantuar realizimin e operacionalitetit të aeroportit, pavarësisht mosmarrëveshjeve mes palëve. Ai theksoi se janë të gatshëm të përdorin të gjitha instrumentet ligjore dhe kontraktore, përfshirë aktivizimin e klauzolave, për të siguruar hapjen dhe funksionimin e aeroportit sipas afateve të përcaktuara.
Sipas ministrit, klauzolat parashikojnë që së pari të vendosen penalitete, të cilat MIE do t’i përcaktojë në varësi të vonesave përkatëse dhe sipas kushteve të kontratës. Më tej, ai përmendi se mund të vijojnë hapa si dërgimi i një plani mitigues për rregullimin e pasojave të kontratës, i cili mund të çojë në shtyrje të afatit, ose deri në zgjidhje të njëanshme të kontratës koncesionare, bazuar në argumentet ligjore përkatëse.
Punimet në terren për ndërtimin e Aeroportit Ndërkombëtar të Vlorës nisën zyrtarisht në nëntor 2021 nga konsorciumi Mabco Construction, YDA Group dhe 2A Group.
Botuar fillimisht në Bota Sot
