Kryetari i Partisë Demokratike të Kosovës (PDK) dhe kandidati për kryeministër, Bedri Hamza, ka prezantuar zotimin e tretë të programit të tij qeverisës, i fokusuar në përmirësimin e shëndetësisë. Në një konferencë për media, Hamza tha se ky zotim vjen si përgjigje ndaj shqetësimeve të qytetarëve për pasigurinë në sistemin shëndetësor dhe vështirësitë që lidhen me koston e mjekimit.
Hamza theksoi se gjatë takimeve në terren ka dëgjuar nga mijëra qytetarë se janë lodhur nga sistemi i dobët shëndetësor dhe nga shpenzimet e larta kur u duhet trajtim. Sipas prezantimit të tij, shumë njerëz përballen me pamundësi për të siguruar terapitë në kohë, ndërkohë që përballja me faturat dhe mungesa e shërbimeve i shton vështirësitë familjeve në përditshmëri.
“Një pensionist pyet veten nëse do t’i blejë ilaçet me dozat e mjaftueshme apo do ta paguajë faturën e energjisë. Një prind pret me muaj për një termin specialistik. Një pacient detyrohet të kërkojë trajtim jashtë vendit, sepse nuk e gjen këtu. Kjo nuk është normale. Dhe kjo duhet të ndryshojë. Prandaj sot kam kënaqësinë të prezantoj zotimin tonë të tretë: Shëndetësi cilësore, me shërbime më të shpejta dhe të qasshme për të gjithë. Sepse shëndeti nuk është privilegj. Është e drejtë. Dhe sepse një shtet matet jo nga premtimet që bën, por nga kujdesi që tregon për qytetarët e tij kur ata kanë më së shumti nevojë”, deklaroi Hamza.
Zotim për shëndetësi cilësore: sigurime, barna falas dhe shërbime më të shpejta
Në pjesën kryesore të prezantimit, Bedri Hamza u zotua se Qeveria që do të udhëhiqet nga ai do të zbatojë sigurimet shëndetësore. Ai tha se do të sigurohet furnizim i rregullt me barna esenciale dhe se pacientët me sëmundje kronike do të përfitojnë barna falas. Hamza paralajmëroi edhe krijimin e Qendrës Kombëtare të Urgjencës Mjekësore, që sipas tij synon të përmirësojë përgjigjen ndaj nevojave urgjente shëndetësore.
Hamza foli edhe për modernizimin e institucioneve ekzistuese dhe ndërtimet e planifikuara. Ai tha se do të modernizohet QKUK-ja dhe do të ndërtohet Spitali Rajonal i Prishtinës. Në vijim, ai përmendi angazhimin për Programin Kombëtar për Kancerin, duke përfshirë diagnostikimin e hershëm, skrining dhe trajtim sipas standardeve evropiane.
Ndër zotimet e tjera, Hamza tha se shëndetësia do të afrohet te qytetari përmes mjekësisë mobile, veçanërisht në zonat rurale dhe të largëta. Ai theksoi se do të krijohen qendra moderne rehabilitimi dhe kujdesi të specializuar për pacientët që kanë nevojë për trajtim afatgjatë. Po ashtu, u paralajmërua themelimi i Qendrës Kombëtare për Trajtimin e Varësive, për të ofruar mbështetje për njerëzit dhe familjet që ballafaqohen me këtë problem.
Hamza përfshiu në zotim edhe mbështetjen e prodhimit vendor farmaceutik, për të rritur sigurinë në furnizim dhe për të krijuar më shumë vende pune. Ai tha se sistemi shëndetësor do të digjitalizohet, me dosje elektronike dhe termine online, që synojnë shërbime më të shpejta për qytetarët. Në fund të konferencës, kreu i PDK-së i bëri thirrje qytetarëve të votojnë më 7 qershor, duke kërkuar mbështetje për numrin 125, si mesazh për të ndalur krizën në çdo sektor. “Shëndetësia nuk është shpenzim. Shëndetësia është investim. Investim në jetën e njerëzve. Investim në dinjitet. Investim në të ardhmen e Kosovës. Sepse, siç kam dëshirë ta them unë: shëndetësia, mbi të gjitha, është e”, tha Hamza, duke e mbyllur prezantimin e tij me theksin te kujdesi si domosdoshmëri për qytetarët.
Botuar fillimisht në Koha.net