Kandidatja për deputete nga Lidhja Demokratike e Kosovës, Besa Gaxherri, ka folur për pritshmëritë e partisë në prag të zgjedhjeve dhe për rolin që, sipas saj, do të ketë kthimi i Vjosa Osmani e ka akuzuar Albin Kurtin”>Vjosa Osmanit në LDK. Ajo ka nënvizuar se synimi i partisë nuk është domosdoshmërisht marrja e 51% të votave, por dalja e parë në renditje dhe krijimi i mundësisë për të çuar përpara zgjidhje për vendin.
Gaxherri ka thënë se pritshmëritë e LDK-së lidhen drejtpërdrejt me bashkimin dhe rikthimin e ish-presidentes Vjosa Osmani në radhët e kësaj partie. Sipas saj, bashkëpunimi dhe “sinergjia” ndërmjet tyre do të ndikojë në forcimin e subjektit dhe në rritjen e mbështetjes. Ajo ka theksuar se LDK-ja po punon me objektiv të qartë që të dalë partia e parë.
“LDK-ja po pretendon të dalë subjekti i parë politik. Nuk po pretendon që do t’i marrë 51% por të dalë e para, qoftë edhe me 1% diferencë. Do të jemi të gatshëm t’i bëjmë zgjidhje këtij vendi”, ka thënë Gaxherri. Në të njëjtën linjë, ajo ka shtuar se për të bërë zgjidhje në politikë nuk mund të kërkohen të gjitha kushtet njëherësh, duke e lidhur këtë edhe me realitetin e vendimmarrjes.
Objektivi: LDK të dalë e para me Osmanin
Gaxherri ka folur edhe për faktin se kthimi i Vjosa Osmanit në LDK e sheh si një rikthim “në shtëpinë e saj”. Ajo ka thënë se Osmani, me mënyrën siç është marrë me politikën e jashtme, i ka dhënë Kosovës një vlerë të veçantë, sidomos në një periudhë kur “rendi botëror po lëvizë”. Sipas saj, qytetarët e kanë mirëpritur kthimin e Osmanit dhe këtë e ka vënë re përmes reagimeve në terren.
Në këtë kuadër, Gaxherri ka përmendur edhe rrugëtimin politik të Vjosës në LDK, duke iu referuar si shkuarjes ashtu edhe kthimit. Ajo ka argumentuar se megjithëse ka pasur një histori të vet të vendimeve në të kaluarën, rikthimi i Osmanit tani është në vendin e duhur për të. Po ashtu, kandidatja ka theksuar se qytetarët, sipas vëzhgimeve të saj, po e përcjellin me interes të veçantë.
Gaxherri ka komentuar edhe çështjen e numrave në listë. Ajo ka thënë se askush nuk është në numrin që dëshiron, as vet ajo, edhe pse në këtë proces garon me numrin 44. Megjithatë, ajo ka theksuar se në fund renditja vendoset nga qytetarët, të cilët, sipas saj, e përcaktojnë edhe mënyrën se si do të radhiten kandidatët. Gaxherri ka përmendur përvojën e saj të gjatë në LDK, duke kujtuar se edhe më herët, gjatë kohës së presidentit Ibrahim Rugova, kanë ekzistuar pretendime që disa persona të renditen në pozicione të caktuara që ata i kanë dëshiruar.
Ndërkaq, jashtë dhjetëshes së parë të listës së kandidatëve për deputetë në LDK, sipas të dhënave të publikuara, kanë mbetur disa nga emrat që kanë qenë ndër deputetët më të votuar në zgjedhjet e 28 dhjetorit. Avdullah Hoti është renditur i 11-i, ndërsa Hykmete Bajrami e 12-a. Ky fakt ka tërhequr vëmendje edhe për mënyrën se si po shpërndahet kandidatura brenda listës, ndërsa në reagimet e mëvonshme përmendet që Bajrami ka reaguar lidhur me këtë çështje.
Botuar fillimisht në Koha.net