Ekspertja e politikës së jashtme, Donika Emini, ka vlerësuar se Kosova po përballet me një moment të rëndësishëm në raport me Bashkimin Evropian, por sipas saj, elita politike në vend po e neglizhon dhe po nuk po arrin ta shfrytëzojë këtë mundësi. Në fokus të komenteve të saj ishte pozita e komisioneres për Zgjerim, Marta Kos, të cilën Emini e sheh si një faktor potencial pozitiv për avancimin e Kosovës drejt BE-së.
Emini ka thënë se Marta Kos përfaqëson një mundësi të rëndësishme për Kosovën. Ajo ka argumentuar se kjo komisionere është më pak e ngarkuar politikisht ndaj Kosovës, duke theksuar qëndrimet e saj të ashpra ndaj regjimit të presidentit serb, Aleksandar Vuçiq. Në këtë drejtim, ekspertes i ka interesuar edhe fakti se Marta Kos vjen nga Sllovenia, ndryshe nga komisionerët paraardhës, që ka thënë se kanë qenë nga Hungaria.
“Marta Kos është komisionerja për Zgjerim që Kosova duhet ta kishte ëndërruar. Para kësaj ishte nga Hungaria, kjo është nga Sllovenia. Është pozitive. Është më e pangarkuar politikisht me Kosovën, ka qenë shumë e ashpër me regjimin e Vuçiqit”, ka thënë Emini në “Interaktiv” të KT-Vsë.
Momenti me BE-në mund të humbet nëse nuk zbatohen reformat
Në vijim të analizës së saj, Donika Emini ka ngritur kritika ndaj klasës politike në Kosovë. Ajo ka thënë se vendi po mbetet i bllokuar në kriza të brendshme politike, çka, sipas saj, çon në humbjen e mundësive për të avancuar më shpejt në raport me BE-në. Emini ka theksuar se mesazhet që vijnë në këtë drejtim nuk po lexohen sa duhet nga elita politike, pavarësisht se Kosova ka një hapësirë të kufizuar për të ndërtuar një dinamikë të re lidhur me procesin evropian.
Sipas Eminit, Kosova ka rrugë të qartë për të avancuar përmes Planit të Rritjes të Bashkimit Evropian. Ajo ka theksuar se ky Plan nuk lidhet vetëm me dialogun me Serbi, duke e paraqitur si një mekanizëm që mund t’i mundësojë Kosovës të angazhohet më gjerë në raport bilateral me BE-në. Emini ka thënë se plani i jep hapësirë Kosovës të implementojë 111 reformat që, sipas saj, janë përcaktuar nga vetë Kosova.
Emini ka shtuar se Agjenda e Reformave e Kosovës është vlerësuar nga BE-ja si një nga më të mirat në rajon, por sipas saj, zbatimi ka ngecur për shkak të mungesës së vullnetit politik. Ajo ka argumentuar se vullneti për zbatimin e Planit të Rritjes ka qenë “zero” dhe se çështja nuk duhet të zhvendoset te përgjegjësitë mes subjekteve politike. “Vullneti politik për zbatimin e Planit të Rritjes ishte zero, faji s’ishte i opozitës. Po dëgjoj se po thonë opozita. Por s’ka faj opozita sepse ju keni shumicën. Nuk është votuar sepse ka krizë politike, jo pse nuk e ka votuar opozita”, ka deklaruar Emini.
Ndërkohë, Kos gjatë ditës së sotme ka vizituar për herë të parë Prishtinën që nga momenti kur ka marrë pozitën. Marta Kos u prit nga ushtruesja e detyrës së presidentes, Albulena Haxhiu, kryeministri në detyrë Albin Kurti dhe nga përfaqësues të tjerë politikë. Gjatë takimeve, ajo ka folur për perspektivën evropiane, në një kohë kur çështja e zbatimit të reformave dhe shfrytëzimi i momentit me BE-në po del sërish në fokus të diskutimeve.
Botuar fillimisht në Koha.net
