Egjipti e nisi rrugëtimin në Kupën e Botës 2026 me një barazim 1-1 ndaj Belgjikës në Grupin G. Por, përtej emrave të njohur si Mohamed Salah dhe Omar Marmoush, vëmendja po tërhiqet edhe nga diçka që e bën këtë skuadër unike: disa nofka të pazakonta që shfaqen në listën e kombëtares egjiptiane.
Në këtë përzierje mes futbollit modern dhe kulturës lokale, në kombëtaren e Egjiptit shfaqen lojtarë që mbajnë emra që në shikim të parë të çojnë te legjenda të njohura të futbollit francez dhe brazilian. Trezeguet, Dunga dhe Zico janë pikërisht këta emra, por historia e tyre tregon se bëhet fjalë për futbollistë egjiptianë që kanë nofka të veçanta.
Nofkat bëhen pjesë e identitetit të lojtarëve në Botën 2026
“Trezeguet” është nofka e Mahmoud Ahmed Ibrahim Hassan. Ndërsa “Dunga” mban Nabil Emad dhe “Zico” lidhet me emrin Mostafa Mohamed Zaki Abdelraouf. Këto emra mund të duken si emra të figurave të mëdha ndërkombëtare, por në realitet janë pseudonime egjiptiane që kanë nisur që herët dhe kanë mbetur të lidhura me mënyrën se si këta futbollistë luajnë, si duken ose si u janë parë talenteve të tyre.
Një nga historitë më të veçanta lidhet me lindjen e nofkës “Trezeguet”. Mahmoud Hassan e mori këtë pseudonim kur ishte vetëm nëntë vjeç, gjatë kohës që ishte në akademinë e Al Ahlyt në Kajro. Trajneri i tij, Badr Ragab, mendonte se djali i ngjante legjendës franceze David Trezeguet jo vetëm për modelin e flokëve, por edhe për instinktin që tregonte në fushë për të shënuar gola. Sipas kujtimeve të trajnerit, që kur u bashkua me ekipin, ai shënonte më shumë se të tjerët dhe ishte i shkëlqyer në lojën në ajër.
Më pas, “Trezeguet” ndërtoi një karrierë të suksesshme në Evropë. Ai u dallua veçanërisht në Turqi, ku luajti me Kasimpasan dhe Trabzonsporin. Po ashtu, provoi edhe futbollin në Ligën Premier me Aston Villan. Sot, ai konsiderohet si një nga figurat më të rëndësishme të kombëtares së Egjiptit dhe mban rolin e zëvendëskapitenit, pas Mohamed Salahut.
Edhe nofka “Dunga” ka një histori që lidhet me stilin e lojës. Mesfushori egjiptian Nabil Emad njihet prej vitesh me këtë pseudonim. Emri iu vendos nga ish-drejtori sportiv i Pyramids FC, Wael Habib, i cili ishte një admirues i madh i legjendës braziliane Dunga. Habib e kishte bindjen se stili i lojës së Emadit i ngjante asaj që shoqëroi Dungën. Si mesfushor mbrojtës, luftarak dhe me shumë energji, ai e fitoi shpejt nofkën që e shoqëron edhe sot. Dunga ka regjistruar mbi 150 ndeshje me Pyramids dhe më pas mbi 120 me Zamalekun, duke u radhitur ndër mesfushorët më të njohur në futbollin egjiptian.
Sa i përket “Zico”-s, ajo vjen nga një rrugë krejt tjetër. Mostafa Mohamed Zaki Abdelraouf ka rrëfyer se babai i tij ishte tifoz i futbollit brazilian dhe u vinte djemve emra të lojtarëve të famshëm. Fillimisht, nofkën e mbante vëllai i madh, por më vonë Mostafa u bë “Zico i vogël”. Si fëmijë, ata shihnin videot e Zicos dhe përpiqeshin t’i imitoni. Me kalimin e kohës, nofka mbeti përgjithmonë. Sot, 29-vjeçari po kalon momentin më të madh të karrierës, pasi është pjesë e skuadrës së Egjiptit në Kupën e Botës 2026.
Koleksioni me nofka të pazakonta nuk mbaron me këto emra. Karim Walid njihet si “Nedved”, ndërsa Ahmed Ramadan mban nofkën “Beckham”, megjithëse luan si mbrojtës qendror. Arsyeja është se, kur ishte fëmijë, ishte specialist i goditjeve standarde dhe trajnerët e krahasuan me David Beckhamin. Një tjetër rast është Youssef Ibrahim, i njohur gjerësisht si “Obama”, nofkë që iu vendos gjatë futbollit të të rinjve për shkak të ngjashmërisë fizike me ish-presidentin amerikan Barack Obama.
Edhe për “Zidane” ka pasur konfuzion mes tifozëve. Disa i kanë kujtuar Mohamed Zidanit, ish-sulmuesit që ka luajtur për Borussia Dortmundin, Mainzin dhe Hamburgun, duke e parë këtë mbiemër si të lidhur me legjendën franceze. Por, ndryshe nga rastet e tjera, në rastin e tij “Zidan” nuk ishte nofkë: emri i plotë i tij ishte Mohamed Abdallah Zidan dhe fjala “Zidan” është një emër i zakonshëm arab, pa lidhje me Zinedine Zidane. Megjithatë, ai vetë ka pranuar se si fëmijë shihte videot e Zidane dhe përpiqej të imitonte lëvizjet e tij.
Ndërkohë, krahas emrave të mëdhenj si Salah dhe Marmoush, kombëtarja e Egjiptit sjell në Kupën e Botës 2026 edhe një koleksion unik pseudonimesh. Këto nofka jo vetëm që pasqyrojnë kulturën e futbollit në vend, por edhe e bëjnë skuadrën egjiptiane një nga më interesante dhe më të veçanta në botë.
Botuar fillimisht në Telegrafi