Sistemi i ri evropian i hyrje-daljeve (EES), i cili përdor të dhëna biometrike për kontrollin kufitar në zonën Schengen, mund të ketë nevojë deri në dy vjet që të stabilizohet plotësisht. Lajmi është bërë i ditur nga një zyrtar i Bashkimit Evropian, i cili ka vënë në pah se periudha e përshtatjes po shoqërohet me radhë të gjata dhe me procedura që nuk zhvillohen njësoj në të gjitha shtetet.
Pas nisjes së kontrolleve të reja biometrike në kufijtë e zonës Schengen, udhëtarët kanë vazhduar të përballen me vështirësi në përpunim, kryesisht për shkak të volumit të njerëzve dhe mënyrës së zbatimit të sistemit. Edhe pse EES synon të standardizojë regjistrimin në kufi, në praktikë po shfaqen diferenca mes vendeve, çka po ndikon në kohën e pritjes dhe në rrjedhën e procedurave.
EES biometrik, radhët dhe sfidat varen nga regjistrimi fillestar
Uku Sarekanno, zëvendësdrejtor ekzekutiv në Frontex, agjencinë që ndihmon në menaxhimin e kufijve të jashtëm të BE-së, ka theksuar se mbledhja e të dhënave biometrike është pjesa më sfiduese e implementimit. Sipas tij, një nga elementet më problematike është marrja e shenjave të gishtërinjve nga udhëtarët që nuk janë shtetas të BE-së gjatë hyrjes së parë në zonën Schengen.
Zarekanno ka paralajmëruar se situata pritet të stabilizohet brenda një ose dy vjetësh. Ai e lidh kohëzgjatjen e kësaj periudhe me fazën e regjistrimit fillestar të udhëtarëve, pasi është pikërisht kjo etapa që kërkon më shumë kohë dhe përgatitje. Ndërsa sistemet dhe procedurat gradualisht përshtaten, pritet të reduktohen radhët dhe gabimet në zbatim.
Në të njëjtën linjë, zyrtari i Frontex-it ka kritikuar rastet kur disa udhëtarëve u është kërkuar të japin gjurmët e gishtërinjve edhe pas vizitës së parë, edhe pse kjo nuk parashihet nga politikat e EES-së. Këto kërkesa shtesë krijojnë vonesa të panevojshme në kufi dhe shtojnë konfuzionin tek pasagjerët, duke e bërë më të vështirë stabilizimin e plotë të sistemit.
Një tjetër problem kryesor i zbatimit ka qenë qasja e ndryshme e shteteve në implementimin e EES. Frontex ka raportuar se disa vende e menaxhojnë procesin më mirë, duke angazhuar burime të posaçme për ndjekjen e procedurave, ndërsa të tjera ende po hasin vështirësi. Kjo pabarazi në praktikë ka sjellë që përvoja e udhëtarëve të mos jetë e njëjtë nga një shtet te tjetri.
Që nga mesi i prillit, EES është dashur të zbatohet plotësisht në të gjithë kufijtë e zonës Schengen. Megjithatë, në destinacione të njohura turistike, si Spanja, Portugalia dhe Franca, janë raportuar pritje të gjata. Ndërkohë, nuk ka plane që shtetet të lejohet të pezullojnë përkohësisht procedurat e EES gjatë periudhave me fluks të lartë udhëtarësh, për të lehtësuar radhët në kufi.
Përfaqësuesi i Frontex-it ka shprehur shpresën se deri në muajin shtator problemet kryesore të sistemit do të jenë zgjidhur. Edhe pse stabilizimi i plotë pritet të zgjasë deri në një ose dy vjet, sinjalet e para të përmirësimit lidhen me standardizimin më të mirë të procedurave, rritjen e kapaciteteve në pikat kufitare dhe respektimin korrekt të rregullave për mbledhjen e të dhënave biometrike.
Botuar fillimisht në Koha.net
