Në Shqipëri, pagat bruto vjetore mbeten ndër më të ulëtat në rajon dhe dukshëm poshtë mesatares europiane. Për vitin 2025, të dhënat e publikuara nga INSTAT tregojnë se një punonjës merr mesatarisht 10.3 mijë euro në vit pagë bruto, ose rreth 860 euro në muaj. Shifra korrespondon me një pagë mujore bruto prej 84.1 mijë lekësh.
Paga bruto: sa e madhe është diferenca mes Shqipërisë dhe Europës?
Diferencat reflektohen edhe në shembuj konkretë nga vendet që shpesh përmenden si destinacione për punë. Gjermania, destinacioni i preferuar i shqiptarëve vitet e fundit, ka një pagë prej 66.7 mijë euro në vit, pra mbi 6 herë më shumë se në Shqipëri. Në Itali, paga mesatare vjetore bruto shkon në 36.6 mijë euro, duke qenë mbi tre herë më e lartë se ajo e një punonjësi në Shqipëri, ndërsa në Greqi niveli është 26.5 mijë euro në vit, ose rreth 2.2 mijë euro në muaj.
Dinamika e punësimit dhe lëvizjes së popullsisë lidhet shpesh edhe me këto diferenca financiare. Të dhëna të Eurostat bëjnë të ditur se vetëm në periudhën 2022-2024 janë dhënë mesatarisht 20 mijë leje pune në vit, kryesisht në Itali, Greqi dhe Gjermani. Shifra krahasohet me rreth 3-4 mijë leje që jepeshin një dekadë më parë, duke treguar një rritje të konsiderueshme të lëvizjeve zyrtare për arsye punësimi. Po ashtu, që nga viti 2021, Bashkimi Europian ka dhënë rreth 72 mijë leje qëndrimi për herë të parë për arsye punësimi për shtetas shqiptarë. Kjo shifër i referohet vetëm ikjeve zyrtare dhe nuk përfshin ata që punojnë në mënyrë të paregjistruar në të zezë, si dhe as ata që largohen për punësim sezonal. Pavarësisht kufizimit, ajo paraqitet si rreth 13% e të punësuarve në sektorin privat jo bujqësor, sipas të dhënave të tjera të INSTAT.
Në nivel europian dhe ndërkombëtar, raporti “Taxing Wages 2026” i OECD-s tregon një gamë shumë të gjerë pagash mesatare bruto vjetore. Sipas këtij raporti, paga mesatare bruto varion nga 18,590 euro në Turqi deri në 107,487 euro në Zvicër. Të dhënat përfshijnë 27 vende europiane, nga të cilat 22 janë anëtare të Bashkimit Europian. Zvicra është i vetmi vend ku paga mesatare bruto tejkalon 100 mijë euro në vit. Pas saj, renditet Islanda me 85,950 euro, ndërsa Luksemburgu kryeson mes vendeve të BE-së me 77,844 euro, duke u pozicionuar i treti në Europë.
Pesë vendet kryesore plotësohen me Danimarkën (71,961 euro) dhe Holandën (69,028 euro), ndërsa Norvegjia, me 68,420 euro, është shumë pranë tyre. Për pesë ekonomitë më të mëdha të Europës, Gjermania kryeson me 66,700 euro, e ndjekur nga Mbretëria e Bashkuar me 65,340 euro. Franca ka pagë mesatare bruto vjetore prej 45,964 euro, Italia 36,594 euro dhe Spanja 32,678 euro. Austria (63,054 euro), Belgjika (62,348 euro), Irlanda (60,258 euro), Finlanda (55,462 euro) dhe Suedia (50,338 euro) janë në intervalin mbi 50 mijë euro në vit, ndërsa diferenca me treguesit e Shqipërisë mbetet e theksuar.
Në Bashkimin Europian, nëntë vende kanë paga mesatare nën 30 mijë euro në vit. Sllovakia regjistron pagën mesatare më të ulët vjetore në BE, me 19,590 euro. Nga 22 vendet e BE-së të përfshira në listë, nëntë prej tyre mbeten nën pragun 30 mijë euro. Hungaria (21,257 euro), Letonia (21,321 euro), Çekia (23,685 euro), Portugalia (24,254 euro) dhe Polonia (24,940 euro) rezultojnë nën 25 mijë euro në vit. Estonia (25,603 euro), Greqia (26,563 euro) dhe Lituania (28,474 euro) janë mbi këtë nivel, por gjithsesi nën pragun e 30 mijë eurove.
Botuar fillimisht në Bota Sot
