Ligjëruesi i së drejtës kushtetuese, Ditar Kabashi, ka komentuar rrjedhjen e afateve për krijimin e institucioneve, pas certifikimit të rezultateve të zgjedhjeve parlamentare të 7-qershorit nga Komisioni Qendror i Zgjedhjeve.
Duke folur për çështjen e zgjedhjes së presidentit, që ka çuar në zgjedhje të parakohshme, Kabashi ka shpjeguar se Kushtetuta e Kosovës nuk e vendos si kërkesë qëndrimin e 80 deputetëve në sallë si kuorum. Sipas tij, interpretimi që ka sjellë këtë kërkesë lidhet me qëndrimin e Gjykatës Kushtetuese, i cili sipas ligjëruesit po përdoret në mënyrën e një pengese politike.
Kabashi ka theksuar se ky debat nuk është thjesht çështje procedurale, por po kthehet në mekanizëm bllokues në skenën politike. Ai ka folur në emisionin “60 Minuta” në KTV, duke nënvizuar se partitë politike po fokusohen tek argumenti i kuorumit, ndërkohë që çështjet e tjera, si vlerësimi i kandidatëve, po mbeten në plan të dytë.
“Partitë politike si levë e përdorin vetëm çështjen e kuorumit, nuk kanë diçka tjetër. Ditë e natë ne mund të flasim që ky është kandidat i përshtatshëm ose jo i përshtatshëm, por në fund si mekanizëm bllokues po përdoret kuorumi. Kuorumin nuk po e kërkon Kushtetuta por Gjykata Kushtetuese. Nuk po e them që Gjykata Kushtetuese e ka pasur tendencën e bllokimit, por kjo po shfrytëzohet nga skena politike”, ka deklaruar Kabashi.
Afatet 60-ditore dhe kuorumi sipas Gjykatës Kushtetuese
Ligjëruesi ka shtuar se posa të konstituohet Kuvendi i Kosovës, fillon afati prej 60 ditësh për zgjedhjen e presidentit. Ai ka thënë se një interpretim i tillë është bërë edhe së fundmi nga Gjykata Kushtetuese pas dekretit të ish-presidentes Vjosa Osmani. Kabashi ka dhënë edhe pasojën ligjore nëse nuk arrihet zgjedhja brenda këtij afati.
Sipas shpjegimit të tij, nëse presidenti nuk zgjidhet brenda afatit 60-ditor, atëherë në ditët në vijim vendi shkon drejt zgjedhjeve të sërishme. Kabashi ka specifikuar se ky hap ndërmerret në 45 ditëshin vijues, duke iu referuar logjikës së afateve që dalin nga interpretimet dhe procedurat institucionale.
Ndërkohë, ai ka theksuar se zgjedhja e presidentit kërkon konsensus, por konsensusi nuk nënkupton që vetëm njëra palë duhet të heqë dorë nga qëndrimet e saj. “Nuk dihet deri në moment të fundit se çfarë do të veprohet nga ana e tyre, përpos konsensusit. Ne e dimë si qytetarë por edhe si studiues që duhet të ketë një konsensus mes tyre, por konsensus nuk nënkupton që vetëm njëra palë të heqë dorë nga diçka. Nëse ka konsensus duhet ta bëjnë të gjithë. Mos t’i jepet një partie tjetër, nëse merren vesh le t’i jepet, por nuk është e pritshme”, ka thënë Kabashi.
Në përputhje me interpretimin e Gjykatës Kushtetuese, Kabashi ka përmendur edhe çështjen e kuorumit në votim: zgjedhja e presidentit kërkon pjesëmarrjen në votim të së paku 80 deputetëve. Sipas tij, Lëvizja Vetëvendosje, edhe pse parti fituese, nuk e arrin këtë numër pa marrëveshje me së paku njërën nga dy partitë kryesore në opozitë, PDK-në dhe LDK-në. Kjo është paraqitur si arsye pse debati për kuorumin po zgjat dhe po shndërrohet në pikë kyçe të bisedimeve politike.
Botuar fillimisht në Koha.net
