Prokuroria Themelore në Prizren ka ngritur aktakuzë ndaj gjashtë personave, ku katër prej tyre dyshohet se kanë qenë zyrtarë komunalë në Suharekë, ndërsa dy të tjerët pronarë të operatorëve ekonomikë. Aktakuzat lidhen me projekte për ndërtimin e disa rrugëve lokale në fshatrat Javor dhe Luzhnicë, për të cilat pretendohet se janë aprovuar punime dhe janë dhënë pagesa edhe pse rrugët nuk janë ndërtuar në tërësi.
Sipas aktakuzës, të pandehurit D.M. dhe A.K. akuzohen për veprën penale “Keqpërdorimi i pozitës apo autoritetit zyrtar”. Ata, sipas pretendimeve të Prokurorisë, kanë vepruar në cilësinë e menaxherit të kontratës dhe mbikëqyrësit të drejtpërdrejtë të menaxherit të kontratës. Rasti lidhet me kontratat për ndërtimin e rrugëve lokale “Fejzë Koliqi – Gashi”, “Smajl Sadria” dhe “Isuf Meta” në fshatin Javor.
Prokuroria thotë se këta të pandehur, me qëllim që t’u mundësonin përfitim ose çfarëdo dobie pasurore për vete ose për personin tjetër, gjatë zbatimit të kontratës kanë tejkaluar detyrat e tyre zyrtare. Në aktakuzë theksohet se veprimet e tyre janë kryer në kundërshtim me dispozitat e Rregullores për Prokurim Publik, duke aprovuar realizimin e punimeve dhe duke lejuar pagesa.
Në këtë pjesë të rastit, sipas aktakuzës, pagesa është aprovuar në vlerë prej 29,458.20 euro, edhe pse kontrata nuk ishte realizuar në tërësi. Prokuroria pretendon se rruga “Fejzë Koliqi – Gashi” nuk ishte ndërtuar fare. Po ashtu, thuhet se me këtë mënyrë është krijuar mundësi që operatorit ekonomik t’i sigurohej përfitim i kundërligjshëm në shumën prej 9,050 euro, ndërsa Komunës së Suharekës i është shkaktuar dëm material.
Pagesa për punime të pa kryera në rrugët lokale të Suharekës
Një pjesë tjetër e aktakuzës i përket të pandehurve E.SH. dhe I.H., të cilët gjithashtu akuzohen për “Keqpërdorimi i pozitës apo autoritetit zyrtar”. Sipas Prokurorisë, ata kanë vepruar si menaxher i kontratës dhe mbikëqyrës të drejtpërdrejtë të menaxherit të kontratës, lidhur me projektin për ndërtimin e rrugëve lokale “Hafir Gashi” dhe “25 Gushti” në fshatin Javor, si dhe “Osman Dalipi” në fshatin Luzhnicë.
Prokuroria pretendon se të pandehurit kanë aprovuar realizimin e punimeve dhe kanë lejuar pagesa në shuma prej 17,124.10 euro, edhe pse kanë qenë në dijeni se rrugët “Hafir Gashi” dhe “25 Gushti” nuk ishin ndërtuar fare. Si pasojë, aktakuza thotë se operatorit ekonomik i është mundësuar përfitim i kundërligjshëm në shumën prej 6,439.82 euro, ndërsa Komunës së Suharekës i është shkaktuar dëm material.
Ndërsa për dy të pandehurit e tjerë, XH.K. dhe A.S., aktakuza i vendos ata në akuzën “Keqpërdorimi dhe mashtrimi në prokurim publik”. Prokuroria i paraqet këta persona si përgjegjës të operatorëve ekonomikë kontraktues, duke pretenduar se ata nuk kanë realizuar të gjitha punimet e parapara me kontratat e prokurimit publik, por kanë paraqitur dokumentacion sikur punimet ishin përfunduar në tërësi. Sipas aktakuzës, këto veprime kanë sjellë përfitim të mjeteve publike në mënyrë të kundërligjshme dhe kanë shkaktuar dëm buxhetit të Komunës së Suharekës.
Pas ngritjes së aktakuzës, prokurori i çështjes ka propozuar që, pas përfundimit të procedurave, të pandehurit të shpallen fajtorë dhe të dënohen. Në kërkesë është përfshirë edhe ndalimi i ushtrimit të funksioneve, në përputhje me procedurat që do të vendosë gjykata.
Botuar fillimisht në Koha.net
