Aktor i njohur botërisht, Tom Cruise, po tërheq sërish vëmendjen e publikut me një ndryshim rrënjësor për rolin e tij më të ri në filmin “Digger”. Pasi u publikua traileri i parë, fansat nisën të flasin gjerësisht në rrjetet sociale për transformimin e tij drastik, duke krijuar edhe pritshmëri se ky mund të jetë roli që i sjellë më në fund aktorit çmimin e parë “Oscar”.
Në këtë produksion, Cruise mban rolin e Digger Rockwell, një miliarder i industrisë së naftës. Sipas përshkrimit të rolit, personazhi përpiqet të shpëtojë njerëzimin nga një katastrofë mjedisore që e ka shkaktuar vetë. Pikërisht kjo linjë e personazhit pritet të kërkojë një interpretim të ndryshëm nga ajo që publiku është mësuar të shohë te aktori, duke theksuar transformimin jo vetëm në pamje, por edhe në prezencën në ekran.
Për ta sjellë Cruise në formën e Digger Rockwell, prodhimi ka përdorur proteza të detajuara në fytyrë dhe trup. Si rezultat, aktori shfaqet më i moshuar, më i rëndë dhe me flokë të thinjur, elemente këto që e bëjnë transformimin të dukshëm që në sekondat e para të trailerit. Ky ndryshim ka qenë pikënisja e diskutimeve të shumta online, ku shumë përdorues kanë deklaruar se e kanë pasur të vështirë ta njohin aktorin si Tom Cruise.
Transformimi i Tom Cruise në “Digger” po habit fansat
Pas publikimit të trailerit të parë, rrjetet sociale u mbushën me reagime. Një komentues shkroi se është “frymëzuese të shohësh dikë që nuk ka më asgjë për të provuar, por vazhdon të sfidojë veten”, duke shtuar se Tom Cruise “duket krejtësisht i panjohshëm”. Sipas tij, “gjithçka, zëri, mënyra e interpretimit dhe prania në ekran, është ndryshe”.
Edhe të tjerë u shprehën në të njëjtën linjë. Një përdorues tha se “nuk mund të më bindni se ai është Tom Cruise”, ndërsa një fans tjetër rrëfeu se nuk e kishte njohur në fillim. Ai shkroi: “As nuk e njoha. Ky është një rol krejt ndryshe nga ato që jemi mësuar ta shohim”. Këto reagime kanë nxjerrë në pah se transformimi i Cruise ka shërbyer si një sinjal se roli i tij mund të jetë më i thellë dhe më pak i ngjashëm me pritshmëritë tradicionale që lidhen me aktorin.
Përtej ndryshimit fizik, ka pasur edhe komente që lidhen drejtpërdrejt me qasjen artistike. Disa fansa vlerësuan guximin e aktorit për të lënë mënjanë rolet e mbushura me aksion. Një koment u shfaq me ton pozitiv, duke thënë se më në fund është një film ku “marifeti më i rrezikshëm i Tom Cruise është aktrimi i pastër”. Këto reagime sugjerojnë se publiku e lidh transformimin edhe me një mundësi për një performancë më të fokusuar te interpretimi.
Shumë prej fansave besojnë se për këtë rol, Cruise mund të marrë një nominim, madje edhe “Oscarin” e parë në karrierën e tij. Filmi mban regji të Alejandro González Iñárritu dhe pritet të dalë në kinema më 2 tetor. Në kast bëjnë pjesë edhe Jesse Plemons, Riz Ahmed, Sandra Hüller dhe Emma D’Arcy, duke e zgjeruar kështu ansamblin e aktorëve rreth një historie që vendos në qendër një miliarder të industrisë së naftës dhe përpjekjen për të përballuar pasojat e një katastrofe mjedisore.
Botuar fillimisht në Koha.net
