Gjykata Supreme ka refuzuar si të pabazuara kërkesat për mbrojtje të ligjshmërisë në një rast që lidhet me dyshime për krim të organizuar, trafikim të narkotikëve dhe shpëlarje parash. Me këtë vendim, Supremja ka lënë në fuqi vendimet që urdhërojnë vazhdimin e paraburgimit ndaj 20 të pandehurve.
Sipas vendimit, të dyshuarit që gjenden në paraburgim janë: R.N., R.B., A.I., A.Gj., E.I., Sh.B., A.V., B.Sh., R.V., R.B., A.R., E.B., A.M., K.D., O. V., L.T., K.B., K.A., Y.M. dhe S.L. Ata dyshohen për disa vepra penale, përkatësisht “Pjesëmarrja ose organizimi i grupit kriminal të organizuar”, “Blerja, posedimi, shpërndarja dhe shitja e paautorizuar e narkotikëve” dhe “Shpëlarja e parave”.
Vendimi i Supremes vjen pasi mbrojtësi i të pandehurit Sh.B. kishte paraqitur ankesë ndaj vendimeve për paraburgim të dhëna nga Gjykata Themelore në Prishtinë dhe më pas edhe nga Gjykata e Apelit. Pra, çështja ka kaluar nëpër instanca, ndërsa Gjykata Supreme ka vlerësuar se argumentet e paraqitura nuk kanë arritur të rrëzojnë bazën ligjore për vazhdimin e masës së sigurisë.
Supremja i gjen të bazuara kushtet për vazhdimin e paraburgimit
Arsyetimi i Gjykatës Supreme thekson se pretendimet në kërkesë janë të pabazuara. Në vendim thuhet se, nga provat e administruara në shkresat e lëndës, rezulton dyshimi i bazuar se të pandehuarit kanë kryer veprat penale që u atribuohen. Gjykata e ka nënvizuar se vërtetimi i plotë i këtyre fakteve do të shqyrtohet në fazat e mëtejshme të procedurës penale.
Supremja ka vlerësuar se ekziston bazë ligjore për vazhdimin e paraburgimit, duke marrë parasysh provat dhe informacionet e siguruara gjatë hetimeve. Në këtë kuadër, njoftimi i referohet edhe komunikimeve të siguruara përmes bashkëpunimit juridik ndërkombëtar, transkripteve të komunikimeve, si dhe lëvizjeve dhe kontakteve mes të pandehurve dhe personave të tjerë që kanë qenë pjesë e hetimeve. Sipas dyshimeve të hetuesve, të pandehurit kanë vepruar si grup kriminal i organizuar në trafikimin e lëndëve narkotike.
Gjykata ka vlerësuar po ashtu se ekziston rreziku i ikjes. Sipas arsyetimit, ky rrezik lidhet me peshën e veprave penale dhe sanksionet e parashikuara, por edhe me faktin se një pjesë e të pandehurve dyshohet të kenë përdorur identitete të rreme apo të kenë ndërruar identitet për t’iu shmangur identifikimit dhe arrestimit eventual në shtete të tjera.
Në vendim theksohet edhe se ekzistojnë arsye për të besuar se, nëse do të gjendeshin në liri, të pandehurit mund të ndikojnë në bashkëpandehurit, të koordinojnë deklaratat ose të pengojnë sigurimin dhe administrimin e provave, duke cenuar rrjedhën normale të procedurës penale. Supremja ka vlerësuar më tej se vazhdimi i paraburgimit është i arsyeshëm, duke u mbështetur në mënyrën e organizimit dhe strukturimit të grupit, rolet e ndara të të pandehurve, si dhe rrezikun e përsëritjes së veprave penale.
Ndër të tjera, Gjykata Supreme ka marrë parasysh karakteristikat personale dhe të kaluarën kriminale të disa prej të pandehurve, përfshirë dënime të mëparshme brenda dhe jashtë Kosovës, edhe për vepra që lidhen me narkotikë. Nga të gjitha këto arsye, Supremja ka konkluduar se nuk ka shkelje esenciale të dispozitave të procedurës penale, pasi gjykatat e instancave më të ulëta kanë dhënë arsyetim të mjaftueshëm dhe të bazuar ligjërisht për vazhdimin e paraburgimit.
Botuar fillimisht në Koha.net