Një studim i ri i kryer nga kompania austriake AVILOO hedh dritë mbi pyetjen që i intereson gjithnjë e më shumë blerësit e automjeteve elektrike: sa gjatë e ruan bateria kapacitetin e saj pas kilometrave realë të përdorimit. Përmes testit të pavarur AVILOO Flash, studimi grumbullon të dhëna nga automjete elektrike të përdorura dhe të testuara, duke llogaritur gjendjen e baterisë dhe autonominë e pritshme në distanca të ndryshme.
AVILOO për secilin model llogarit gjendjen mesatare të baterisë në tri pika kyçe të kilometrazhit: 50.000, 100.000 dhe 150.000 kilometra. Përveç gjendjes së baterisë, studimi paraqet edhe autonominë e pritshme që do të mbulojë 99 për qind të automjeteve në secilën prej këtyre pikave. Kjo mënyrë vlerësimi synon të japë një panoramë më praktike të degradimit të baterisë, duke u bazuar në matje reale dhe jo në supozime.
Testi AVILOO Flash është një diagnostikim i pavarur që zgjat rreth tre minuta. Pajisja lidhet me portën OBD të automjetit dhe është dizajnuar pikërisht për të dhënë përgjigje në çfarë gjendjeje ndodhet bateria e çdo makine. Studimi thekson se bazohet tërësisht në automjete elektrike të certifikuara dhe në automjete të përdorura, gjendja reale e baterive të të cilave është dokumentuar dhe nuk është hamendësuar.
Kapaciteti i baterisë: cilat modele ruajnë më shumë pas 150 mijë kilometrash
Sipas të dhënave të bëra publike nga AVILOO, edicioni aktual i studimit përfshin më shumë se 500 mijë teste të pavarura të kryera te automjete të certifikuara nga AVILOO gjatë periudhës 2022–2026. Testet janë kryer mbi 20 modele të njohura të automjeteve elektrike, ndërsa të dhënat janë pjesë e një baze globale që përmban më shumë se një milion teste. Për rrjedhojë, hulumtimi përfshin modele të testuara në mbarë botën, duke i dhënë analizës një shtrirje më të gjerë se vetëm një treg apo një periudhë të vetme.
Një element i rëndësishëm i studimit është se gjendja e shëndetit të baterisë (SoH) — pra përqindja e kapacitetit fillestar që i ka mbetur baterisë — mund të ndryshojë ndjeshëm edhe brenda të njëjtit model. AVILOO njofton se SoH mund të ketë diferencë deri në 13,5 për qind ndërmjet automjeteve më të mira dhe më të dobëta të të njëjtit model. Kjo do të thotë se dy makina të së njëjtës linjë mund të shfaqin ritme të ndryshme të degradimit, edhe pse i përkasin të njëjtit lloj sistemi baterie.
Studimi vë në pah edhe një prirje teknike: automjetet elektrike me bateri më të vogla, të cilat kanë nevojë për cikle më të shpeshta karikimi për të përshkuar të njëjtën distancë, zakonisht shfaqin degradim më të shpejtë të baterisë sesa modelet me bateri më të mëdha. Me fjalë të tjera, mënyra se sa shpesh karikohet një bateri dhe madhësia e saj ndikojnë në mënyrën si zvogëlohet kapaciteti gjatë përdorimit.
Në testimet e AVILOO-s, vetura që ka dalë më mirë është Hyundai Ioniq 5. Bateria e saj prej 72,7 kWh ruante ende 93,37 për qind të kapacitetit pas 150 mijë kilometrash. Po ashtu, dy crossoverë të njohur kanë shënuar rezultate të ngjashme: Volkswagen ID.4, me bateri 77 kWh, ruan 95,41 për qind të kapacitetit pas 50.000 kilometrash dhe 90,09 për qind pas 150.000 kilometrash. Ndërsa Tesla Model Y Long Range, me bateri 78,8 kWh dhe prodhuar nga viti 2021 deri në 2025, regjistron 94,54 për qind të kapacitetit pas 50 mijë kilometrash dhe 90,05 për qind pas 150 mijë kilometrash. Këto rezultate, sipas studimit, konsiderohen si të mira.
AVILOO, përveç analizës së të dhënave, lëshon edhe certifikata për gjendjen e baterive të automjeteve elektrike të përdorura, duke e lidhur matjen dhe vlerësimin me vendimmarrjen e blerjes dhe përdorimit të makinave elektrike. /Telegrafi/
Botuar fillimisht në Telegrafi
