Lista Studentore “Studentët po fitojnë” ka shpallur fitoren në zgjedhjet e jashtëzakonshme parlamentare në Serbi. Në selinë zgjedhore të kësaj liste ka nisur një festë e madhe, ndërsa përfaqësuesit u janë drejtuar qytetarëve me një mesazh për nisjen e një kapitulli të ri për Serbinë.
Gjatë komunikimit të tyre, studentët kanë bërë thirrje për një festim paqësor dhe me dinjitet, pa konflikte dhe pa dhunë. Ata kanë kërkuar që qytetarët të mos bien pre e provokimeve, të mos përfshihen në përplasje dhe të mos lejojnë që asnjë përpjekje për të nxitur tensione të errësojë atë që, sipas tyre, është arritur së bashku.
“I nxisim qytetarët ta festojnë këtë fitore në mënyrë paqësore, me dinjitet dhe krenari – mos u bini pre e provokimeve, mos u përfshini në konflikte dhe mos lejoni që asnjë përpjekje për të nxitur tensione të errësojë atë që kemi arritur së bashku. Le të jetë përgjigjja jonë ndaj çdo provokimi – dinjiteti; ndaj çdo fyerjeje – paqja dhe ndaj çdo përpjekjeje për të na përçarë – një solidaritet edhe më i fortë”, thuhej në mesazhin e listës.
Studentët kanë theksuar se nuk duan që festa të përshkallëzohet në dhunë. Ata kanë nënvizuar se, sipas tyre, gjatë muajve të fushatës nuk kanë bërë sakrifica për të “humbur”, por për të mbajtur gjërat që i kanë forcuar gjatë gjithë kësaj kohe: besimin te drejtësia, solidaritetin dhe mosdhunën.
Në fjalimin e fitores, Lista Studentore e ka parë rezultatin e zgjedhjeve si fillimin e ndryshimeve të mëdha në Serbi. Përfaqësuesit kanë deklaruar se “nesër fillon puna”, duke e përshkruar atë si një detyrë serioze, të përgjegjshme dhe të vështirë, me synim ndërtimin e një vendi ku ligji vlen njësoj për të gjithë, ku e vërteta nuk ndëshkohet dhe ku dija respektohet.
“Sonte festojmë, nga nesër ndërtojmë” – nisja e punës
Studentët kanë vazhduar me mesazhin se të rinjtë duhet të kenë një të ardhme për veten e tyre dhe se askush nuk duhet të jetojë në frikë vetëm pse mendon ndryshe. Ata kanë thënë se nata e fitores duhet të shënojë fillimin e një kapitulli të ri, ku nuk ndahet shoqëria në fitues dhe humbës, por punohet së bashku për një model ku secili të ketë të drejtë të shprehet, të njohë të vërtetën dhe të ketë mundësi reale për një të ardhme.
Në të njëjtin komunikim, Lista Studentore ka përcjellë një formulim të qartë: “Sonte festojmë fitoren; duke filluar nga nesër, ndërtojmë të ardhmen. Rroftë liria! Studentët kanë fituar!”
Në prapavijë të këtij shpallje, vlerësimet paraprake të CeSID dhe Ipsos tregojnë se Lista Studentore ka fituar rreth 52 për qind të votave dhe mund të sigurojë 138 mandate parlamentare, çka do të mundësonte një shumicë të pavarur në parlament.
Ndërkaq, Komisioni Zgjedhor Republikan ka publikuar rezultatet e para nga zgjedhjet e parakohshme parlamentare. Sipas këtyre shifrave, lista e Aleksandar Vuçiqit ka aktualisht 141 ulëse në Parlamentin prej 250 ulësesh, ndërsa Lista Studentore ka 95. Rezultatet vijnë nga 203 prej të gjitha vendvotimeve, duke lënë të hapur mundësinë e përditësimeve ndërsa vazhdon numërimi.
Botuar fillimisht në Bota Sot