Spanja ka dominuar ndaj Argjentinës për ta fituar titullin e kampionit të botës në futboll. Edhe pse finalja u mbyll me rezultat minimal 1:0, loja e ekipit spanjoll u shfaq në mënyrë të qartë gjatë gjithë ndeshjes, duke e bërë “La Roja”-n fituese të botërorit për herë të dytë. Trofeu i parë për Spanjën kishte ardhur në vitin 2010, ndërsa këtë herë ajo e rrëzoi Argjentinën, e cila ishte kampione për katër vjet.
Në këtë botëror, FIFA ka përzgjedhur disa nga statistikat më të veçanta të lojtarëve të Spanjës, të cilat tregojnë jo vetëm efikasitetin, por edhe kontrollin, qëndrueshmërinë dhe ndikimin në fazat vendimtare të lojës. Ndër të dhënat që bien në sy janë numra të pazakontë në pasime, minuta të grumbulluara, seri pa humbje dhe rekorde në driblime, si dhe një qasje e veçantë në presionin ndaj kundërshtarit.
Statistikat e Spanjës: dominim total që kulmon me trofein
Një nga shifrat më të mëdha të edicionit i takon Rodrit. Ai i kompletoi plot 790 pasime në këtë Botëror, duke thyer rekordin e tij personal për numrin më të madh të pasimeve të realizuara nga një lojtar në një edicion të Kupës së Botës. Rodri, i cili u shpall edhe lojtari më i mirë, kishte 638 pasime të suksesshme në Katari 2022. Para tij, rekordin e mbante Xavi nga Afrika e Jugut 2010 me 599 pasime.
Për pasimet, në Botërorin që përfundoi të dielën, Pau Cubarsi u rendit i dyti me 668 pasime të kompletuara, ndërsa Aymeric Laporte ishte i treti me 618. Edhe këtu vihet re pesha e mbrojtjes së qendrës spanjolle, me dy emra që spikatën në ndërtimin e lojës dhe në stabilitetin gjatë fazës kur skuadra kontrollonte ritmin e ndeshjes.
Një tjetër statistikë lidhet me kohën në fushë. Mbrojtësit e Spanjës, Marc Cucurella dhe Pau Cubarsi, luajtën së bashku 750 minuta në këtë Botëror. Kjo shifër përbën rekord sa u takon lojtarëve, pa përfshirë portierët. Për ta krahasuar, 750 minuta i kishte edhe Alexis Mac Allister te Argjentina, çka tregon se spanjollët kishin në përbërje elementë kyç që qëndruan shumë gjatë në terren gjatë gjithë rrugëtimit.
Presioni ndaj kundërshtarit është një element tjetër që FIFA e ka nxjerrë në pah. Mikel Oyarzabal ka shtyrë kundërshtarët të bëjnë 58 gabime, përkatësisht ta humbin topin. Llogaritja bëhet duke konsideruar “topin e humbur” atëherë kur lojtari bën presion ndaj kundërshtarit. Në këtë statistikë, Pedri dhe Neil El Aynaoui i Marokut ndajnë vendin e dytë me nga 51 “detyrime” për ta humbur topin.
Spanja ka treguar edhe qëndrueshmëri të jashtëzakonshme në rezultate. Skuadra është në seri prej 38 ndeshjesh pa humbje, duke vendosur një rekord të ri. Hera e fundit kur Spanja humbi ishte nga Kolumbia në mars 2024. Pas asaj humbjeje, “La Roja” ka grumbulluar 29 fitore dhe nëntë barazime. Një rekord i tillë e tejkalon edhe serinë më të gjatë që kishte pasur deri atëherë Italia, e cila nuk ishte mposhtur në 37 ndeshje nga viti 2018 deri në vitin 2021.
Edhe në fazën sulmuese, spanjollët kanë të dhëna domethënëse. Lamine Yamal kishte më së shumti driblime të suksesshme në Botëror, me 35. Kylian Mbappe u rendit i dyti me 28, ndërsa Lionel Messi i treti me 25. Rekordin e driblimeve të suksesshme e mban Maradona, me 53 driblime në Botërorin e vitit 1986. Po ashtu, Yamal ishte vetëm 19 vjeç e gjashtë ditë kur arriti këtë shifër, duke u bërë lojtari i katërt më i ri që fiton Kupën e Botës. Në listë, vetëm Giuseppe Bergomi (18 vjeç), dhe brazilianët Pele e Ronaldo (17 vjeç) kanë qenë më të rinj kur triumfuan. Për më tepër, 19 vjeç e 178 ditë e vendosin Pau Cubarsin në vendin e shtatë në këtë renditje.
FIFA ka nxjerrë në pah edhe numrat e golave. Spanja ka shënuar 14 gola në këtë Botëror. Ajo ka realizuar dy gola më shumë se në vitin 1986 dhe gjashtë gola më shumë se në vitin 2010, kur e fitoi titullin e parë. Këto shifra e lidhin drejtpërdrejt sezonin e tanishëm me historinë e suksesit të Spanjës në botëror, duke treguar se ekipi jo vetëm që u kurorëzua, por e bëri këtë me tregues të fortë në disa aspekte të lojës.
Botuar fillimisht në Koha.net