Prokuroria e Posaçme (SPAK) ka regjistruar një procedim penal pas kallëzimit të depozituar ndaj kryeministrit Edi Rama dhe disa funksionarëve të tjerë publikë, si dhe ndaj subjekteve private të përfshira në projekte turistike në Zvërnec, Rrjoll dhe Divjakë-Karavasta. Lajmi u bë publik të shtunën, në të njëjtën ditë kur protesta e studentëve kundër qeverisë u përshkallëzua sërish në rrugët e kryeqytetit.
Sipas të dhënave të publikuara, kallëzimi është ngritur nga një grup ekspertësh dhe protestuesish, ndërsa depozitimi u bë në gusht. Në një shkresë të datës 6 nëntor, të nënshkruar nga drejtuesi i SPAK-ut, Klodjan Braho, prokuroria u ka konfirmuar kallëzuesve se procedimi penal me numër 97 është regjistruar më 10 shtator dhe ndodhet në fazën e hetimit.
Më tej, nga raportimet e përmendura, procedimi penal është regjistruar për disa vepra penale, por deri në mbyllje të artikullit nuk ka informacione që ndonjë person të figurojë zyrtarisht si i dyshuar apo në hetim. Po ashtu, deri në atë moment nuk ishte dhënë asnjë reagim nga kryeministri Rama apo nga qeveria.
SPAK heton kallëzimin për projekte në Zvërnec, Rrjoll dhe Divjakë-Karavasta
Kallëzimi kërkon hetim për shpërdorim detyre, ndikim të paligjshëm ndaj funksionarëve publikë, korrupsion pasiv të funksionarëve të lartë dhe një grup të strukturuar kriminal. Në argumentet e paraqitura nga kallëzuesit, skema thuhet se përsëritet në të tre rastet: fillimisht ndryshohet ligji, më pas miratohet një instrument i posaçëm planifikimi dhe në fund leja jepet nga Këshilli Kombëtar i Territorit (KKT), i cili drejtohet nga kryeministri.
Për rastin e Baks-Rrjollit, kallëzimi i referohet një vendimi të KKT-së të dhjetorit 2024, i firmosur nga kryeministri Edi Rama dhe nga ish-zëvendëskryeministrja Belinda Balluku, që miratoi rregulloren e veçantë për resortin “Blue Borgo”. Për Divjakë-Karavastën, bëhet fjalë për masterplanin “Kingscoast”, një qytet i ri brenda parkut kombëtar. Ndërsa në Zvërnec, projekti thuhet se zhvillohet sot nga një kompani e regjistruar përmes një trusti në Holandë, ku pronarët realë nuk janë të njohur publikisht.
Kallëzimi mbështetet kryesisht në hulumtimet “The Albanian Files” dhe “Dosjet e KKT-së”, një bazë të dhënash që përmendet me 252 vendime të Këshillit Kombëtar të Territorit. Nismëtarja e kallëzimit, arkitektja Entela Spahivogli, ka shprehur pritshmërinë që SPAK t’i shqyrtojë projektet një nga një, duke nisur nga roli i kryetarit të KKT-së, i cili është kryeministri, dhe duke kërkuar që hetimi të mos kufizohet vetëm te tre rastet e përmendura, por të shtrihet në çdo projekt ku përdoren të njëjtat mekanizma.
Në të njëjtën ditë, protestuesit zhvilluan protestën e radhës kombëtare. Aktiviteti i së shtunës u nis në orën 14:00 para Ministrisë së Arsimit dhe u përshkrua si protesta e parë sipas kalendarit të ri, me dy tubime kombëtare në javë: çdo të mërkurë dhe të shtunë. Dy orë më herët, Partia Demokratike kishte mbajtur tubimin e saj para Kryeministrisë, pas thirrjes së kryetarit Sali Berisha. Mbështetësit e PD-së marshuan më pas drejt Ministrisë së Arsimit, por studentët kundërshtuan bashkimin e tyre, duke theksuar se protesta e tyre është e pavarur nga partitë. Pas disa minutash tensionesh verbale, situata u qetësua.
Para Ministrisë së Arsimit, protestuesit dogjën kosha mbeturinash dhe hodhën gurë, ndërsa policia përdori ujë me presion dhe spraj lotsjellës. Më pas, një pjesë e protestuesve marshoi drejt Kryeministrisë, me thirrje për dorëheqjen dhe arrestimin e Ramës, si dhe kundër Partisë Demokratike. Në bulevardin “Dëshmorët e Kombit”, të rinj të maskuar shkulën pllaka trotuari dhe i hodhën drejt efektivëve, bashkë me molotovë dhe fishekzjarre. Policia, me rreth 1.200 efektivë në gatishmëri, u përgjigj me autobotë uji dhe gaz lotsjellës, duke i shpërndarë protestuesit drejt Parkut Rinia dhe Sheshit Skënderbej. Gjatë ditës u shoqëruan disa persona, përfshirë edhe pranë selisë së PD-së, ndërsa policia njoftoi se po kërkon personat e maskuar që kryen akte dhune. Deri në mbrëmje nuk kishte të dhëna të konfirmuara për të lënduar.
Ndërkohë, kryeministri Rama përsëriti ftesën për dialog me studentët dhe ka hapur edhe një platformë online për komunikim. Studentët e kundërshtojnë këtë ftesë dhe kërkojnë dorëheqjen e kryeministrit, duke theksuar se nuk negociohet kërkesa e tyre. Protestat e nisura në mes të tetorit janë shoqëruar me përplasje të shpeshta me policinë; ministri i Brendshëm Ervin Demo ka bërë të ditur se vetëm në dy javët e para u lënduan 347 persona, mes tyre protestues, efektivë dhe kalimtarë. Në fund të tetorit, qeveria miratoi një paketë masash që i jep policisë kompetenca të reja për të kufizuar tubimet pranë institucioneve dhe parashikon gjoba deri në 500 mijë lekë. Sipas të dhënave, vetëm nga 3 deri më 6 nëntor, policia vendosi 95 gjoba ndaj protestuesve për bllokim rruge. Grupimet studentore e kanë çuar paketën në Gjykatën Kushtetuese, e cila ende nuk ka dhënë vendim.
Botuar fillimisht në Bota Sot