Kombëtarja shqiptare U21 do të zhvillojë dy ndeshje miqësore në kuadër të përgatitjeve për angazhime të tjera të rëndësishme. Sfidat janë planifikuar për datat 13 dhe 17 nëntor, ku kuqezinjtë do të përballen përkatësisht me Spanjën dhe Luksemburgun. Për këto dy ndeshje, trajneri Alban Bushi ka bërë publike listën e futbollistëve që do të ketë në dispozicion, si dhe ka dhënë disa detaje mbi objektivat dhe pritshmëritë për këtë cikël përgatitor.
“Janë dy ndeshje shumë të rëndësishme dhe shumë të forta. Luksemburgu është një ekip shumë i mirë, që është zhvilluar ndjeshëm vitet e fundit. Na ka mundur 1-0 dhe tashmë kemi mundësinë të marrim një lloj revanshi në fushën tonë, pasi luajmë përpara tifozëve tanë, pas pothuajse një viti”, – ka theksuar trajneri Alban Bushi.
Bushi ka nënvizuar se të dyja miqësoret, ashtu si edhe ato të marsit, pritet të zhvillohen në stadiumin “Air Albania”. Sipas tij, kjo zgjedhje lidhet me nevojën për t’u përshtatur më mirë me fushën dhe ambientin ku do të zhvillohen garat, si edhe për të shërbyer si test për skuadrën përpara sfidave të mëtejshme. Në këtë kuadër, ai ka thënë se ekipi ka vlerësuar kundërshtarin dhe ka përzgjedhur një grup lojtarësh me cilësi.
Në të njëjtën kohë, trajneri kuqezi ka sqaruar edhe mungesat që ndikojnë në planet e tij për këto takime. “Na mungojnë dy futbollistë të rëndësishëm, si Fikaj dhe Burak Alili, të cilët kanë qenë titullarë dhe pjesë e rëndësishme e formacionit. Ata janë të dëmtuar. Megjithatë, kemi edhe lojtarë të tjerë shumë të rëndësishëm, si Sina dhe Fetaj, të cilët janë pjesë e ekipit A”, ka deklaruar Bushi. Ai ka shprehur shpresë që për ndeshjen me Spanjën këta lojtarë të mund të rikthehen, pasi ekipi luan më datë 15 në Hungari.
Dy miqësore në nëntor, Shqipëria U21 gati për sfidat
Ndërkohë, për sa i përket përballjes së dytë miqësore, kur kuqezinjtë do të luajnë kundër Spanjës, trajneri Alban Bushi e ka cilësuar atë si një sfidë të veçantë. Ai e ka përshkruar Spanjën si një kundërshtar të nivelit të lartë në kategorinë U-21, me një skuadër teknike që kontrollon topin dhe nuk të lë të zhvillosh lojën ashtu siç e kërkon. Sidoqoftë, Bushi është shprehur se Shqipëria U21 e di shumë mirë strategjinë e saj dhe synon ta zbatojë në detaje gjatë ndeshjes.
“Spanja është një ndeshje speciale. Është një ekip nga më të mirët në botë në nivelin U-21. Një ekip teknik, që zotëron topin dhe nuk të lë të luash. Por ne e dimë shumë mirë strategjinë tonë. Duhet të jemi sa më kompaktë, ashtu siç kemi qenë në ndeshjet e fundit, sa më të fortë dhe sa më agresivë”, – ka thënë trajneri. Ai ka theksuar gjithashtu rëndësinë e karakterit dhe identitetit të skuadrës, duke nënvizuar se nuk ka frikë nga kundërshtari.
Sipas Bushit, plani i skuadrës lidhet me ruajtjen e organizimit në fushë, qëndrueshmërinë në momentet e vështira dhe synimin për të dalë shpejt në sulm. “Ne kemi karakter si ekip dhe identitetin tonë. Nuk kemi absolutisht frikë nga Spanja. Nuk diskutohet që do të luftojmë deri në vdekje, pa u dorëzuar dhe pa pranuar humbjen përballë saj”, ka vijuar ai. Në të njëjtën logjikë, trajneri ka folur edhe për nivelin e konkurrencës që pret kuqezinjtë në Europian, ku kundërshtarët do të jenë Spanja, Franca, Belgjika, Kroacia dhe skuadra të tjera të mëdha.
“Jemi përgatitur për këtë nivel. Prej një periudhe të gjatë po punojmë në mënyrë sistematike me një strategji të qartë, të cilën do ta zbatojmë si në ndeshjen me Spanjën, ashtu edhe në Europian. E dimë se çfarë duhet të bëjmë ndaj këtyre ekipeve të mëdha, sa ngushtë duhet të qëndrojmë dhe sa shpejt duhet të kalojmë në sulm”, – ka shtuar Alban Bushi. Ai ka nënvizuar se ndeshja me Spanjën do të jetë një rast i veçantë për skuadrën, duke deklaruar se do të kërkohet maksimumi për ta bërë performancën sa më të fortë.
Në mbyllje, trajneri është ndalur edhe te mbështetja e tifozëve. Bushi ka shprehur dëshirën që publiku të jetë i pranishëm në të dyja ndeshjet që Shqipëria U21 do të luajë në stadiumin “Air Albania”. Ai ka kërkuar që tifozët të mos vijnë vetëm për ndeshjen me Spanjën, por edhe për duelin me Luksemburgun, duke theksuar se ky kundërshtar gjithashtu meriton vëmendje. “Nuk mendoj se tifozët duhet të vijnë vetëm me Spanjën, por duhet të vijnë edhe me Luksemburgun. Ata kanë qenë gjithmonë mbështetja jonë. Sa herë që kemi luajtur në Air Albania, kemi pasur shumë tifozë. Besoj dhe shpresoj që do të jenë të pranishëm edhe në ndeshjen me Luksemburgun, sepse kemi përballë një kundërshtar që duhet vlerësuar shumë. Ne do të japim maksimumin për ta fituar këtë ndeshje, për të dominuar në lojë dhe për ta mundur me rezultat. Kemi nevojë për ta”, – tha trajneri Alban Bushi.
Botuar fillimisht në Sport Ekspres