Shkëndija ka mbyllur fazën përgatitore Në Slloveni dhe është rikthyer në Tetovë për të vazhduar punën. Trajneri Artim Pollozhani, shefi i shtabit teknik të skuadrës kuqezi, e ka cilësuar këtë cikël stërvitor si një periudhë që ka dhënë sinjale pozitive për ekipin, pikërisht në prag të ndeshjeve evropiane.
Pas përfundimit të programit stërvitor, Pollozhani ka dhënë reagimin e parë mbi atë që u pa gjatë punës në terren. Ai u shpreh se skuadra ka pasur progres dhe se futbollistët kanë arritur të shfaqin evolucion, edhe pse ngarkesat fizike kanë qenë të konsiderueshme. Kuqezinjtë kishin detyrë të testonin formën e tyre, si individualisht ashtu edhe si grup, për të hyrë në ritëm të sfidave që i presin më tej.
Në Slloveni, Shkëndija zhvilloi katër ndeshje kontrolluese me kundërshtarë të njohur dhe të fortë: Koper, Hajduk i Splitit, Celje dhe Zorya Luhansk. Këto përballje shërbyen si provë për të parë mekanizmat e lojës që po ndërtohen, për të parë reagimin e skuadrës në situata të ndryshme dhe për të vlerësuar gjendjen e lojtarëve para përballjeve në kompeticionet e Evropës.
Trajneri Pollozhani e vlerësoi edhe barazimin 2:2 kundër Zorya Luhansk, i cili u regjistrua në ndeshjen e sotme. Sipas tij, ishte një test i rëndësishëm pasi përballeshin me një kundërshtar të nivelit të lartë. Tekniku kuqezi theksoi se lodhja nga ngarkesat e fazës përgatitore ndihet në trup, por u shpreh se rezultati dhe loja e treguar kanë qenë pozitive, duke e lidhur këtë me atë që e pret ekipin në Kupat e Evropës.
“Ishte një ndeshje e rëndësishme, pasi përballeshim me një kundërshtar të nivelit të lartë. Në këtë fazë përgatitore patjetër që edhe lodhja e ngarkesa e kanë bërë të vetën, por ishte një test pozitiv para asaj që na pret në Kupat e Evropës. Me rikthimin e freskisë, automatizmi i lëvizjeve do të jetë akoma më i shpejtë. Mendoj se jemi në rrugën e duhur,” deklaroi Pollozhani.
Shkëndija synon mentalitet fitues drejt Evropës
Përtej rezultateve në miqësore, Pollozhani nënvizoi rëndësinë e ndërtimit të një mentaliteti fitues dhe të implementimit të ideve të reja taktike. Ai tha se skuadra ka luajtur përballë kundërshtarëve të fortë dhe se ajo që duan të vendosin gradualisht në lojë po merr formë. Sipas tij, miqësoret nuk janë faza ku rezultatet vendosen në plan të parë, por ajo që ka vlerë është koha e duhur dhe mënyra sesi ekipi po e kupton dhe po e zbaton konceptin e lojës.
Tekniku shtoi se koncepti i lojës kërkon kohë dhe seancat stërvitore do të vazhdojnë me një marsh tjetër, duke rritur intensitetin dhe duke i bërë lëvizjet më të automatizuara. “Kemi luajtur me kundërshtarë shumë të fortë. Ajo që duam të implementojmë gradualisht po merr formë. Rezultatet nuk janë në plan të parë në miqësore, por mentaliteti fitues duhet të futet në ekip sepse është i rëndësishëm. Koncepti i lojës do kohë dhe seanca stërvitore që lëvizjet të bëhen me një marsh tjetër,” u shpreh ai.
Sa i përket gatishmërisë për startin e eliminatoreve në UEFA Conference League, Pollozhani tha se beson te kontingjenti aktual dhe pret integrimin e plotë të përforcimeve më të fundit. Ai theksoi se një pjesë e ekipit është e përgatitur, ndërsa ardhjet e fundit në fazën e sulmit kanë sjellë ndikim të rëndësishëm, duke përmendur edhe Tambas në formën e duhur. Për trajnerin, skuadra ka një bazë të mirë për të përballuar sfidën e parë në transfertë, ku fokusi i menjëhershëm është drejt përgatitjes për ndeshjen e parë.
Pollozhani përfundoi duke folur edhe për konkurrencën brenda grupit, e cila, sipas tij, do të rritet me integrimin e lojtarëve të rinj. “Një pjesë e ekipit është e përgatitur. Me ardhjet e fundit në fazën e sulmit dhe sjelljen e Tambas në formën e duhur, jemi OK. Kemi një kontingjent të mirë për të përballuar sfidën e parë në transfertë, ku është edhe i gjithë fokusi ynë. Me integrimin e plotë të lojtarëve të rinj, do të kemi një konkurrencë të shëndoshë që do t’i shërbejë shumë grupit,” tha timonieri i kuqezinjve. Ndeshja e parë me Europa FC është planifikuar për 9 korrik në Gjibraltar.
Botuar fillimisht në Bota Sot
