Udhëheqësi i sektorit veterinar kufitar në Agjencinë e Ushqimit dhe Veterinarisë (AUV), Eroll Shehu, ka folur për masat e reja dhe kontrollet që po zhvillohen në Kosovë për produktet e qumështit. Ai ka theksuar se në dy muajt paraprak ka pasur rritje të kontrolleve ndaj produkteve të qumështit që importohen, por deri më tani nuk është konstatuar ndonjë përmbajtje e rrezikshme.
Një ditë më parë, ministri në detyrë i Bujqësisë, Armend Muja, ka njoftuar se është pezulluar përdorimi i vajit të palmës dhe qumështit pluhur në Kosovë. Sipas njoftimit të bërë nga ministri, kjo masë erdhi pas disa rasteve ku është identifikuar se përbërja e produkteve të qumështit nuk pasqyrohet saktë.
Në programin “60 Minuta” në KTV, Shehu ka shpjeguar se gjatë muajit mars dhe prill është vërejtur ngritje e kontrolleve në produktet ushqimore të specifikuara në qumësht dhe produkte të qumështit. Ai ka thënë se janë grumbulluar një sasi e konsiderueshme mostrash, të cilat më pas dërgohen për analizë në laborator.
“Deri më tash nuk kemi gjetur në import ndonjë defekt të cilin duhet ta cekim”, ka theksuar Shehu. Ai ka shtuar edhe se, sa u përket kontrolleve të brendshme të prodhuesve, nuk është gjetur ndonjë defekt i madh. Megjithatë, sipas tij, vendimet e reja lidhen kryesisht me një parim: që të paraqitet saktë se çfarë përmban produkti që blen konsumatori.
Vendimi: djathë vetëm kur produkti ka 100% përmbajtje qumështi
Shehu ka folur në mënyrë të drejtpërdrejtë për etiketimin e produkteve. Ai ka thënë se në rast se një produkt nuk është 100% me përmbajtje qumështi, atëherë nuk guxon të quhet “djathë”, as dhe të kategorizohet si produkte të ngjashme të qumështit në mënyrë të gabuar. Sipas tij, ideja e vendimit është që konsumatori të ketë qartësi të plotë në etiketë për atë që lexon, si dhe për atë që lejohet të shkruhet në produkt.
“Ideja është që kanë ardhë disa vendime, do të ketë disa ndryshime. Nuk kemi gjetur defekte të mëdha që të ndryshohen. Ideja e vendimit është që konsumatori do të ketë shumë të qartë në etiketë se çka lexon dhe çka guxon të shkruhet. Nëse një produkt nuk është 100% me përmbajtje të qumështit nuk guxon të quhet djathë dhe produkte tjera sikurse gjiza e të tjera”, ka thënë Eroll Shehu.
Ai ka theksuar më tej se AUV-i garanton për qumështin që është përdorur deri më tani. Sipas Shehut, kjo garantohet përmes kontrolleve zyrtare dhe gjetjeve, çka nënkupton se malli lejohet për shitje sepse certifikohet për treg. Përveç prodhimit, Agjencia kontrollon edhe distribuimin dhe raftet e marketeve, duke sqaruar se çështja nuk lidhet vetëm me përpunimin e produktit, por edhe me mënyrën se si ai ruhet gjatë qarkullimit dhe shitjes.
Shehu ka përmendur edhe rëndësinë e temperaturave. Ai ka thënë se kur ka ngritje të temperaturave, siç po ndodh në këto ditë, mirëmbajtja dhe kontrolli në zinxhirin e shitjes bëhet edhe më i rëndësishëm. Në këtë kuadër, kontrolli shtrihet në aspektin e ruajtjes së produktit, jo vetëm në momentin kur ai del nga përpunimi, por edhe gjatë kohës kur gjendet në treg.
Botuar fillimisht në Koha.net