Ndeshja e zhvilluar në Elbasan Arena mes Dinamos dhe Pafos u mbyll me rezultatin 1-1, por për trajnerin e skuadrës së Qipros, Sa Pinto, barazimi nuk la shije aspak të mirë. Portugezi e kaloi takimin me nerva, duke shfaqur reagime të forta në fushë dhe duke pasur edhe një përplasje me stolin e Dinamos. Kjo sjellje u vu re qartë gjatë lojës dhe ndikoi në tonin e përgjithshëm të pasndeshjes.
Pas përfundimit të sfidës, Ilir Daja u përpoq të ruante distancën dhe zgjodhi që të mos i jepte dorën Sa Pintos, menjëherë pas barazimit 1-1. Vendimi erdhi si reflektim i atmosferës së krijuar gjatë ndeshjes, ku provokimet dhe tensioni ishin të pranishme gjatë gjithë kohës.
Menjëherë pas takimit, Sa Pinto foli për performancën e ekipit të tij dhe ngriti shqetësimin kryesor: sipas tij, Pafos meritonte më shumë se një barazim dhe i ishte mohuar një gol i pastër. Trajneri deklaroi se ekipi i tij ishte më afër fitores, duke theksuar se në pjesën e parë kishte krijuar një paraqitje shumë të mirë, por kishte humbur disa raste të pastra për ta kthyer dominimin në avantazh. Për të, momenti vendimtar erdhi kur ekipi shënoi, megjithatë goli nuk u llogarit.
Sipas Sa Pintos, goli që nuk u pranua ishte i padrejtë dhe e gjithë logjika e ndeshjes do të kishte ndryshuar po të ishte ratifikuar. Ai tha se në fund skuadra e tij mori të paktën atë që mund të merrte, pra barazimin. Trajneri e cilësoi Dinamon si një ekip me pasion, vrapim dhe presion të madh, edhe nëse sipas tij nuk ka domosdoshmërisht të njëjtën cilësi si skuadra e tij. Megjithatë, ai e kuptoi dhe e pranoi vështirësinë për të luajtur në Elbasan Arena.
Sa Pinto: “Na hoqën golin e pastër”
Sa Pinto shtoi se në këtë ndeshje Pafos e kishte të qartë se do të përballej me presion konstant. Ai nënvizoi se Dinamo ndryshoi sistemet në pjesën e dytë, duke e bërë më të vështirë përshtatjen në lojë. Pikërisht në këtë fazë, ai tha se skuadrës së tij iu desh të gjente zgjidhje të reja, por kur e gjetën, arritën të kthejnë rezultatin dhe të arrijnë barazimin. Për trajnerin, sfida nuk ishte e lehtë dhe as ndeshja e kthimit nuk do të jetë më e lehtë, duke e parë gjithçka si dy përballje të ndryshme.
Trajneri portugez e shprehu synimin e qartë për ndeshjen e ardhshme, duke theksuar se e kanë “në shtëpi” dhe se duan ta përfundojnë punën. Ai tha se tani duhet të mbyllin fazat e lojës në mënyrën e duhur, pasi sipas tij ka patur momente kur skuadra e tij nuk i finalizoi saktë dhe kjo ndikoi te rezultati përfundimtar. Sa Pinto u ndal edhe te aspekti i fushës, duke deklaruar se terreni nuk i ndihmoi lojtarët dhe se me kalimin e kohës gjendja u përkeqësua.
Ndërkohë, ai përmendi edhe mënyrën si Dinamo kërkonte të sulmonte: sipas Sa Pintos, ekipi shqiptar përpiqej t’i gjente sulmuesit me topa nga mbrojtja, por kjo për të nuk është justifikim. Trajneri tha se këto janë pjesë të lojës në të cilat duhet të punojnë dhe të përmirësohen, pavarësisht kushteve të krijuara gjatë takimit. Më pas, ai u ndal te një çështje konkrete për ekipin e tij: zëvendësimi i David Luiz në pjesën e parë dhe gjendja e lojtarit pas dëmtimit.
Sa Pinto shpjegoi se David Luiz donte të vazhdonte, por si masë paraprake ai vendosi të qëndronte jashtë fushës. Trajneri theksoi se e mendoi se mund të humbisnin për një kohë të gjatë nëse do të rrezikohej më shumë, ndaj preferoi ta mbante jashtë në atë moment. Ai e cilësoi David Luiz si një futbollist të jashtëzakonshëm dhe theksoi se është kapiteni i ekipit, duke shtuar se të gjithë e dinë çfarë jep në fushë. Në fund, trajneri la të kuptohej se pavarësisht barazimit, Pafos do të reagojë në ndeshjen e kthimit, me synim të qartë për ta shkuar përpara rrugëtimin me rezultat pozitiv.
Botuar fillimisht në Sport Ekspres