Segmenti rrugor Junik–Morinë–Gjocaj po përballet me shembje të vazhdueshme të dheut, duke rritur rrezikun që rruga të bllokohet plotësisht. Banorët e zonës thonë se situata po përkeqësohet nga dita në ditë, ndërsa kërkojnë ndërhyrje të shpejta e të koordinuara, sepse kalimi në këtë pjesë bëhet gjithnjë e më i pasigurt.
Banori i fshatit malor Gjocaj, Demë Gjocaj, tregon se shembjet nuk janë vetëm problem infrastrukturor, por edhe rrezik real për njerëzit. Ai thekson se gjendja nuk është e kënaqshme dhe se çdo ditë ekziston frika se çfarë mund të ndodhë në rast të reshjeve të papritura. Sipas tij, gjatë dimrit rruga bëhet edhe më e rrezikshme, pasi makinat mund të bien në humnerë nëse toka dobësohet.
Gjocaj shton se mjafton një shi i fortë dhe situata mund të shkojë në përkeqësim të menjëhershëm: uji shtrohet, toka rrëshqet dhe rruga mund të bllokohet. Ai pohon se, përveç vështirësive për lëvizje, ndërhyrjet e tjera bëhen më të vështira sapo rruga dëmtohet ose mbushet me baltë e mbeturina nga rrëshqitja e dheut.
Ai flet edhe për shembje që, sipas tij, kanë ndodhur në pjesë të tjera të rrugës, duke e bërë të domosdoshme një zgjidhje më të shpejtë e më të qëndrueshme. Gjocaj thotë se për këtë çështje është adresuar edhe kërkesë në Kuvendin Komunal të Junikut. “Përveç asaj që e pamë më herët, këtu gjatë shirave uji ngritet dhe bëhet si liqen, e prej aty dheu rrëshqet poshtë me baltë e me drunj dhe rruga mbyllet krejtësisht. Shihet edhe këtu që kanë ardhur me ekskavatorë dhe e kanë hapur rrugën. Këtu gjendja është edhe më e keqe, më vjen keq edhe për pronarin, sepse po i dëmtohet toka për shkak të ndërtimit të mureve mbrojtëse prej betoni, për të ndalur këtë katastrofë”, thekson ai.
Reagim i shpejtë për të shmangur bllokimin e rrugës Junik–Gjocaj
Në anën tjetër, zyrtarët komunalë në Junik thonë se, përkundër kërkesave të banorëve për rehabilitimin e rrugës, kufizimet buxhetore kanë penguar ndërhyrjen deri më tani. Demokrat Ganijaj, drejtor për Shërbime Publike në Komunën e Junikut, bën me dije se kryetari i komunës ka formuar një komision i cili ka bërë vlerësimin e dëmeve të shkaktuara ndër vite në Junik, kryesisht në infrastrukturën rrugore.
Sipas tij, raporti i këtij vlerësimi është përcjellë në Qeverinë e Kosovës për mbështetje. Ganijaj thekson se deri më tani nuk ka pasur konfirmim për mbështetje nga Qeveria, megjithatë komuna thotë se e sheh të nevojshme të reagojë për t’iu ofruar lëvizje më të mirë banorëve të kësaj pjese. Ai shton se beson që gjatë këtij viti, sapo të jetë në dispozicion kontrata për mirëmbajtjen verore të rrugëve, edhe kjo pjesë do të sanohet.
Ndërkohë, banorët dhe institucionet e komunës theksojnë se zona ka potencial të jashtëzakonshëm, sidomos për zhvillimin e blegtorisë dhe turizmit. Prandaj, funksionalizimi i plotë i qarkullimit në segmentin Junik–Morinë–Gjocaj shihet si i rëndësishëm jo vetëm për sigurinë e përditshme, por edhe për perspektivën ekonomike të banorëve. Por deri në realizimin e rehabilitimit, frika kryesore mbetet ajo e përsëritjes së shembjeve, sidomos gjatë periudhave kur reshjet ndikojnë drejtpërdrejt në stabilitetin e rrugës.
Botuar fillimisht në Bota Sot
