Rezistenca ndaj antibiotikëve po bëhet një kërcënim gjithnjë e më i madh për fëmijët, ndërsa trajtimet që dikur funksiononin për infeksione të zakonshme po humbin efektivitetin. Një studim ndërkombëtar ka analizuar mbi 106 mijë mostra infeksionesh nga fëmijë në 82 vende dhe ka gjetur se rezistenca ka vijuar të rritet në çdo rajon të botës gjatë periudhës 2004-2022.
Të dhënat e studimit tregojnë se situata nuk është vetëm një problem i izoluar, por një trend global që shfaqet në mënyra të ndryshme sipas vendeve dhe sistemeve shëndetësore. Ekspertët paralajmërojnë se deri në vitin 2035, rezistenca mund të përkeqësohet ndjeshëm, duke vënë në rrezik trajtimin e infeksioneve të përditshme te fëmijët.
Studimi u udhëhoq nga “Murdoch Children’s Research Institute”, në bashkëpunim me Universitetin e Sydneyt, dhe u publikua në revistën “Journal of the American Medical Association (JAMA)”. Autorët theksojnë se antibiotikët, të cilët kanë shpëtuar miliona jetë gjatë dekadave, po bëhen gjithnjë e më pak efektivë kur fëmijët përballen me infeksione të zakonshme, si infeksionet e mushkërive dhe të traktit urinar.
Pjesa më e shqetësuese lidhet me grupet që janë më të ndjeshme ndaj komplikimeve. Në fokus janë foshnjat, fëmijët që janë në terapi intensive dhe ata që jetojnë në vende ku sistemet shëndetësore janë më të dobëta. Për këta fëmijë, infeksionet që zakonisht trajtohen relativisht lehtë mund të kthehen në raste më të gjata dhe më të vështira, pasi bakteret zhvillojnë rezistencë ndaj barnave.
Një rast konkret i përmendur në studim është ai i Harry Booth, 13 vjeç nga Australia. Pas transplantit të veshkës, Harry merr ilaçe që ulin imunitetin. Kjo e bën atë më të ndjeshëm ndaj infeksioneve, ndërsa kur bakteret që e infektojnë janë rezistente ndaj shumë antibiotikëve të zakonshëm, mjekët detyrohen të përdorin barna më të forta dhe më të rralla.
“Trajtimet rezervë ende po funksionojnë, por kam frikë se çka do të ndodhë nëse edhe infeksionet e djalit tim bëhen rezistente ndaj tyre”, ka thënë nëna e tij, Eileen Booth. Në situata të tilla, trajtimet mund të jepen shpesh në spital dhe përmes infuzionit, çka rrit barrën për familjen dhe për sistemin shëndetësor.
Rezistenca po rritet: antibiotikët po bëhen gjithnjë e më pak efektivë
Studimi ka identifikuar edhe disa nga bakteret që paraqesin rrezik më të madh. Një prej tyre është “Acinetobacter baumannii”, i cili shkakton infeksione të rënda si pneumonia dhe sepsa dhe që shfaq nivelin më të lartë të rezistencës ndaj ilaçeve. Ndërsa “Klebsiella”, një shkaktar i zakonshëm i infeksioneve urinare, po tregon rritjen më të shpejtë të rezistencës, sidomos në Azinë Juglindore, Evropën Lindore dhe në rajonin e Paqësorit.
Sipas parashikimeve të studiuesve, deri në vitin 2035 rezistenca ndaj antibiotikëve të linjës së fundit mund të arrijë në 82 për qind për Acinetobacter baumannii. Kjo do të thotë se edhe kur mjekët përdorin alternativat më të forta, ekziston rreziku që bakteret të mos i përgjigjen më në mënyrë të plotë trajtimit. Për rrjedhojë, trajtimi i infeksioneve te fëmijët mund të bëhet gjithnjë e më kompleks, veçanërisht për ata që kanë imunitet të dobësuar ose që trajtohen në mjedise intensive mjekësore.
Botuar fillimisht në Koha.net
