Një valë ekstreme e të nxehtit ka përfshirë një pjesë të madhe të Evropës dhe ka thyer rekorde historike në disa vende. Sipas të dhënave paraprake të shërbimeve meteorologjike, të dielën Gjermania, Çekia, Polonia dhe Hungaria kanë regjistruar temperaturat më të larta në historinë e matjeve për periudhën përkatëse.
Në Gjermani, termometri arriti në 41.7 gradë celsius në Coschen, një zonë pranë kufirit me Poloninë. Kjo shënon një kapërcim të rekordeve të mëparshme, pasi vlerësimi prej 41.5 gradësh ishte vendosur vetëm një ditë më parë. Temperaturat e larta u shoqëruan me masa të menjëhershme për të ulur rrezikun për shëndetin e qytetarëve dhe për të menaxhuar situatën në terren.
Edhe Çekia raportoi shifra të ngjashme rekord. Në Doksany, temperaturat arritën në 41.9 gradë celsius. Në Poloni, në Slubice u matën 40.5 gradë celsius, duke thyer një rekord 105-vjeçar. Ndërsa në Hungari, në Budakalasz u regjistruan 40.7 gradë celsius. Përveç këtyre vendeve, në Sllovaki temperaturat shkuan deri në 39.3 gradë, duke e zgjeruar ndikimin e valës së nxehtit edhe në rajone të tjera.
Situata ka prekur një numër të madh njerëzish në gjithë kontinentin. Raportimet bëjnë të ditur se mbi 191 milionë persona në Evropë u përballën me temperatura prej të paktën 35 gradë celsius. Për shkak të rrezikut të lartë, në shumë vende u lëshuan paralajmërime për vapë ekstreme dhe u kërkua respektim i masave paraprake, veçanërisht gjatë orëve më të nxehta të ditës.
Vapë ekstreme, masa emergjente në disa vende evropiane
Në Berlin, autoritetet lokale ndërmorën masa për të freskuar banorët dhe turistët. Policia përdori topa uji për të ulur temperaturat “në terren” dhe për të krijuar lehtësim. Ndërkohë, kompania hekurudhore Deutsche Bahn u bëri thirrje qytetarëve të shmangnin udhëtimet që nuk janë të domosdoshme, në mënyrë që të reduktohen ekspozimet e panevojshme ndaj nxehtësisë.
Edhe Polonia mori masa shtesë. Agjencia shtetërore e sigurisë u dërgoi qytetarëve mesazhe telefonike me këshilla konkrete: të shmangin ekspozimin në diell, të reduktojnë ose të mos kryejnë aktivitet fizik gjatë periudhave më të nxehta dhe të konsumojnë sa më shumë ujë. Këto udhëzime u dhanë për të ulur rrezikun e goditjes nga nxehtësia dhe problematikave të tjera që vijnë nga temperaturat e larta.
Ndërkohë, ndikimi i valës së të nxehtit po reflektohet edhe në shifra të viktimave dhe në raportime shëndetësore në vende të tjera. Në Francë, agjencia kombëtare e shëndetit publik ka nisur të numërojë viktimat e valës së të nxehtit. Sipas të dhënave të bëra publike, nga 24 deri më 27 qershor janë regjistruar rreth 1 mijë vdekje më shumë krahasuar me periudhat e zakonshme, ndërsa autoritetet paralajmërojnë se bilanci mund të rritet ndjeshëm.
Në Spanjë, të dhënat paraprake tregojnë se të paktën 327 vdekje mund të lidhen me temperaturat ekstreme gjatë javës së kaluar. Përveç nxehtësisë, disa pjesë të Evropës u goditën edhe nga fenomene të tjera. Franca veriore dhe Belgjika u përballën me stuhi të fuqishme, me erëra të forta dhe rrufe.
Në Belgjikë, një person humbi jetën pasi një pemë ra mbi automjetin e tij pranë Brukselit. Në Francë, dhjetëra mijëra familje mbetën pa energji elektrike si pasojë e motit të rënduar, ndërsa vazhdon të monitorohet situata në terren për të vlerësuar dëmet dhe për të rikthyer shërbimet sa më shpejt të jetë e mundur.
Botuar fillimisht në Koha.net