Eurodeputeti bullgar nga Korça, Andrey Kovatchev, ka vlerësuar ecurinë e Shqipërisë në rrugën drejt Bashkimit Europian, por në të njëjtën kohë është ndalur edhe te protestat masive që po zhvillohen në vend. Në deklaratën e tij për mediat, ai theksoi se zëri i qytetarëve duhet të dëgjohet dhe se protestat paqësore janë pjesë e demokracisë.
Kovatchev u shpreh se pret që si qeveria ashtu edhe opozita të dialogojnë dhe të gjejnë zgjidhje në interes të qytetarëve. Ai nënvizoi se Shqipëria ka bërë progres në procesin e integrimit dhe mbetet ndër vendet më të avancuara për anëtarësim në BE.
Eurodeputeti foli edhe për angazhimin e tij parlamentar. Ai tha se është shumë i kënaqur që ndodhet përsëri në Shqipëri, së bashku me kolegët e tij nga Parlamenti Bullgar, ndërsa shtoi se javën e ardhshme në Strasburg do të miratohet në seancë plenare raporti vjetor i zgjerimit për Shqipërinë. Sipas tij, progresi i bërë nga Shqipëria është i mirëpritur, ndërsa ai vlerësoi faktin që partitë shqiptare janë të përkushtuara ndaj integrimit evropian.
Dialogu dhe zëri i qytetarëve, pjesë e rrugës drejt BE-së
Ndërsa u pyet nëse protestat mund të ndikojnë në progresin e Shqipërisë drejt Bashkimit Europian, Kovatchev tha se po monitorohen nga afër të gjitha zhvillimet. Ai theksoi se çështja u takon klasës politike në Shqipëri të zgjidhë dhe të ndjekë të gjitha standardet, veçanërisht ato ekologjike, si dhe investimet që duhen bërë.
Eurodeputeti sqaroi se në këtë proces nuk po ndërhyhet në politikën e brendshme të Shqipërisë. Megjithatë, sipas tij, do të ketë një tekst në raport-progresin që lidhet me përmbushjen e të gjitha ligjeve dhe standardeve për ekologjinë, por edhe me zhvillimin rajonal dhe turizmin. Për Kovatchev, këto janë fusha që vazhdojnë të mbeten në vëmendje në vlerësimet e institucioneve evropiane.
Në një tjetër pyetje, gazetarja e lidhur me protestat dhe përvojën në vendin e tij u ndal te efekti i protestave. Kovatchev tha se në Bullgari janë mësuar me protesta të tilla dhe se, në parim, është mirë të dëgjohet zëri i popullit nëse gjithçka zhvillohet e qetë dhe paqësore. Ai përsëriti thirrjen për të gjitha partitë, si ato në pushtet ashtu edhe ato në opozitë, që të ruajnë qetësinë, të dëgjojnë njëra-tjetrën dhe të gjejnë zgjidhjen më të mirë për qytetarët.
Në vijim, Kovatchev theksoi se për qytetarët e Shqipërisë “më e mira” është të hyjnë sa më shpejt të jetë e mundur në Bashkimin Europian dhe të gëzojnë së bashku familjen evropiane. Ai e lidhi këtë edhe me kontekstin aktual të sfidave globale dhe me faktin që Shqipëria, sipas tij, është një aleate e mirë në NATO. Ai shtoi se perspektiva drejt BE-së është shumë shpejt në horizont, duke e parë atë si një etapë të rëndësishme për vendin në një periudhë kur çështjet gjeopolitike janë të shumta.
Pyetjes se çfarë duhet të bëjë qeveria në lidhje me protestat, eurodeputeti iu përgjigj duke nënvizuar se duhet të dëgjojë njerëzit dhe të ndjekë të gjithë legjislacionin, si dhe standardet mjedisore. Ai i cilësoi këto si elemente që, sipas tij, do të pasqyrohen edhe në tekstin e Parlamentit Evropian. Kovatchev gjithashtu sqaroi se në Parlamentin Evropian nuk do të ndërhyhet në politikën e brendshme të Shqipërisë, ndërsa mbeti në thirrjen për një bashkëpunim të mirë mes partisë në pushtet dhe partive opozitare.
Botuar fillimisht në Bota Sot