Një 76-vjeçare në Prishtinë thotë se është sulmuar nga katër qen endacakë, ndërsa kërkesa e saj për kompensim financiar nga Komuna e Prishtinës i është refuzuar. Ngjarja ka ndodhur rreth tre muaj më parë, kur Ilmije Gjikolli po kalonte në një lagje afër magjistrales Prishtinë–Ferizaj dhe, sipas rrëfimit të saj, nuk ka pasur asnjë paralajmërim paraprak.
Ilmije Gjikolli tregon se në atë moment mendoi se rrëzimi i saj ndodhi si pasojë e një pengese në rrugë. Ajo thotë se nuk i kishte parë dhe as i kishte dëgjuar qentë, por, sapo u rrëzua, siç përshkruan, qentë e kishin kapur dhe sulmuar atë. “Isha duke shkuar, axha Nesim vdiq, isha afër shtëpisë gati me hy brenda. Unë nuk i kam parë as nuk i kam dëgjuar. Unë mendova që kam shkelë në diçka edhe jam rrëzu, e ata më kanë hipur sipër, katër qenë kanë qenë. Edhe nuk kam ditë, mendova që u rrëzova, dhe kur më ka kap qeni në këmbë, kur e kam kthy kokën katër kishin qenë ata”, thotë Gjikolli.
Pas sulmit, 76-vjeçarja thotë se ka marrë trajtimin në Qendrën Klinike Universitare (QKUK), ku edhe ishte shtrirë. Ajo thekson se ende duhet të ndjekë kontrolle mjekësore, pasi ka dhimbje nëpër trup dhe plagët po i shkaktojnë probleme shëndetësore që ndikojnë drejtpërdrejt në jetën e saj të përditshme. Sipas saj, dhimbjet e bëjnë të vështirë edhe gjumin dhe lëvizjen.
“Kurrë nuk kam mundur me flejtë, pasi që më kanë sulmuar qentë. Kurrë nuk mundem me flejtë. Duhet me pijë këtë (medikament v.j.), ndoshta mundem me flejtë. Me ecë, eci ngapak, por e kam problem, si me ecë duke çalu”, ankohet Gjikolli. Për shkak të pasojave, ajo pretendon se gjendja e saj nuk është zgjidhur plotësisht dhe se po përballet me vështirësi në aktivitetet normale ditore.
Refuzohen dy herë kërkesat për kompensim nga Komuna e Prishtinës
Familjarët e 76-vjeçares thonë se kanë kërkuar kompensim për dëmet e shkaktuara nga sulmi. Bashkëshorti i saj, Ismajl Gjikolli, thotë se do t’i drejtohet gjykatës, pasi, sipas tij, ankesa për kompensim me para nga Komuna e Prishtinës i është refuzuar dy herë. Ai tregon se kërkesa ishte adresuar nga shoqata e pensionistëve, ku thuhet se është pritur në nivel të lartë dhe ankesa është dorëzuar për shqyrtim.
Ismajl Gjikolli rrëfen procedurën që ka ndjekur: “Jam shku m’u anku. Shumë mirë më kanë pritë në nivelin më të lartë. Iia kanë shkruar ankesën. E kam dorëzu. Shkova me kërku nëse e kanë shqyrtu. Më thanë: ta kanë refuzuar ankesën”. Sipas tij, përgjigjja që i është dhënë është se do të ketë secilën hapje dhe se “kanë me u përgjigj para gjyqit”, duke e lënë të hapur rrugën ligjore.
Ndërkohë, Policia e Kosovës për rajonin e Prishtinës bën të ditur se gjatë këtij viti janë raportuar raste të sulmeve nga qentë endacakë në kryeqytet. Në një përgjigje për rastet, thuhet se në Drejtorinë e Policisë së Kryeqytetit janë paraqitur 47 raste që kanë të bëjnë me sulme nga qentë endacakë, ndërsa për rastet janë informuar edhe institucionet relevante. Për këtë problem, KOHA ka dërguar pyetje në Komunën e Prishtinës lidhur me masat që do të ndërmerren, por nuk ka marrë përgjigje.
Botuar fillimisht në Koha.net