Plani i rikuperimit për Gazën, i cili po ndiqet nga Bordi i Paqes i Donald Trumpit, është tkurrur ndjeshëm nga një projekt i madh për rindërtimin e gjithë territorit, duke u kthyer në një skemë shumë më të vogël, e konceptuar si projekt-pilot vetëm për jugun e Rripit të Gazës.
Sipas skemës së re, edhe plani pilot që ishte parashikuar të vihej në jetë nuk është projekt i shtrirë në të gjithë zonën. Ai parashikon ngritjen e një kampi të përkohshëm për një pjesë të vogël të rreth dy milionë njerëzve të zhvendosur, bashkë me administratë palestineze, polici dhe një forcë të vogël ndërkombëtare sigurie. Megjithatë, ky version i reduktuar nuk pritet të marrë formë para fundit të vitit.
Gjatë javëve të fundit janë hedhur disa hapa konkretë. Disa zyrtarë kosovarë dhe marokenë kanë mbërritur në Izrael dhe pritet të jenë pjesë e bërthamës së Forcës Ndërkombëtare të Stabilizimit (ISF), detyra e së cilës do të jetë të mbrojë kampin pilot në jug të Gazës. Ndërkohë, një bazë logjistike për këtë forcë – e paraparë për të ruajtur automjete, pajisje dhe materiale të tjera – po shkon drejt përfundimit në pikëkalimin kufitar Kerem Shalon, në mes të Izraelit dhe Gazës.
Edhe pse përgatitjet lidhen me ISF-në dhe infrastrukturën bazë logjistike, puna për vetë kampin pilot afër qytetit të Rafahut nuk ka nisur. Po ashtu, nuk është vënë re as ndërtim i ri për bazën logjistike. Pamjet satelitore nuk kanë treguar asnjë zhvillim të ri, duke e lënë projektin ende në fazë përgatitore dhe pa masa të dukshme në terren.
Rrjedha e planit pilot për Gazën mbetet e pasigurt
Një tjetër pengesë është kalendari politik në Izrael. Siç është raportuar nga “The Guardian”, nuk priten përparime të mëdha para zgjedhjeve të 27 tetorit në Izrael, të cilat potencialisht mund ta ndryshojnë balancën brenda koalicionit të kryeministrit Benjamin Netanyahu. Paralelisht me këtë, Izraeli ka vijuar të shkelë armëpushimin e arritur nga Trumpi në tetorin e kaluar dhe, sipas të dhënave të përmendura, ka bllokuar punën e rindërtimit si dhe rrjedhjen e ndihmave humanitare në Gaza.
Diplomatë perëndimorë në Jerusalem besojnë se mundësia më e madhe për të parë përparim në Gaza lidhet me ardhjen e një qeverie të re në Izrael. Në këtë kontekst, një diplomat në Jerusalem ka theksuar se Bordi i Paqes nuk kishte opsion tjetër veçse të përpiqej të shfrytëzonte maksimalisht hapësirën e lejuar, pasi pranimi i një dështimi do të hapte rrugën për fraksione ekstreme brenda Qeverisë së Izraelit. Këto fraksione, sipas përshkrimit, kanë plane rrënjësisht të ndryshme për Gazën.
Po sipas asaj që thuhet në artikull, qëllimi i skemës së ngushtuar është të “bëhet diçka” dhe të mbahet situata “në lojë”, sepse nëse ndalet, të tjerë me agjenda më radikale mund të marrin përsipër zhvillimet. Në këtë kuadër përmendet se ka diskutime për transferim të plotë të popullatës ose për një formë kolonializmi. Për më tepër, diplomatët kanë shprehur shqetësim se Netanyahu, duke parë rrezikun për humbje në zgjedhje, mund të ndërmarrë ofensivë të plotë para zgjedhjeve të tetorit.
Gjatë kohës që nga sulmet e Izraelit prej armëpushimit të tetorit, janë raportuar mbi 1100 palestinez të vrarë. Ushtria izraelite, sipas të dhënave të përmendura, tani e ka nën kontroll më shumë se 60 për qind të territorit dhe ka krijuar një zonë tampon përtej saj. Ndërkohë, rikthimi në luftë të plotë do të rrezikonte edhe planin modest të Bordit të Paqes, duke prishur logjikën e kampit pilot dhe penguar zbatimin e tij. Në këtë situatë, forcat izraelite kanë vijuar të sugjerojnë se një kthim i mundshëm në përshkallëzim do të ndërlikonte edhe skemën e reduktuar të stabilizimit dhe të rindërtimit për Gazën.
Botuar fillimisht në Koha.net
