Presidenti i Real Madridit, Florentino Pérez, doli të martën pasdite para mediave për të sqaruar se nuk do të japë dorëheqje. Ai njoftoi se do të shpallen zgjedhjet brenda klubit, ndërsa bëri të qartë se si ai ashtu edhe Bordi i tij i Drejtorëve do të kandidojnë për të vazhduar drejtimin.
Në fjalimin e tij, Pérez hodhi akuza të drejtpërdrejta ndaj asaj që e quajti një “lëvizje anti-Madrid”. Sipas tij, po zhvillohet një fushatë kundër interesave të Real Madridit dhe, njëkohësisht, edhe kundër tij personalisht. Presidenti e paraqiti këtë situatë si të krijuar në mënyrë të qëllimshme dhe jo si një reagim i thjeshtë ndaj rezultateve sportive.
Pérez theksoi se Real Madridi nuk është vetëm një pronar, duke e lidhur klubin drejtpërdrejt me anëtarësinë. Ai tha se janë 100 mijë anëtarë që e përbëjnë klubin dhe, për këtë arsye, vendimi për zgjedhjet ka për synim që anëtarët të jenë në qendër të procesit. “Kam vendosur të shpall zgjedhjet, në të cilat unë dhe Bordi im i Drejtorëve do të kandidojmë”, tha Pérez, duke argumentuar se gjithçka ka ardhur pasi është krijuar, siç u shpreh ai, “një situatë absurde” nga fushatat kundër klubit.
Presidenti i Real Madridit iu kthye edhe pyetjes “ku është Florentino?”, që sipas tij po përmendet vazhdimisht nga kritikët. Ai tha se zakonisht nuk flet hapur për këtë çështje, por vendosi të shfrytëzojë momentin e njoftimit për zgjedhjet. Në fjalën e tij, Pérez tha se disa persona i kanë bërë deklarata të rënda për shëndetin e tij, duke pretenduar se ai ka kancer. Ai e konsideroi këtë si pjesë të fushatës së drejtuar kundër tij dhe e kundërshtoi kategorikisht.
Pérez: zgjedhjet në Real Madrid, anëtarët vendosin
“Dua të shfrytëzoj këtë mundësi për t’u bërë të ditur atyre që ishin të shqetësuar se unë jam ende president i Real Madridit dhe i kompanisë sime dhe se shëndeti im është perfekt”, tha Pérez. Më tej, ai shtoi se nëse do të kishte kancer, siç është thënë, do të duhej të shkonte në një qendër rehabilitimi për kancer. Sipas tij, fakti që shëndeti i tij është “perfekt” e bën të pamundur që ai të ishte në gjendje të keqe siç pretendohen.
Florentino Pérez, i prerë në tonin e tij, u tha kundërshtarëve se tani i kanë “në dorë” zgjedhjet, duke e lidhur këtë me sfidën e drejtpërdrejtë ndaj atyre që, sipas tij, po përpiqen ta largojnë nga posti i presidentit. Ai tha se klubi ka arritur suksese të shumta nën drejtimin e tij dhe përmendi numrin e trofeve: Real Madridi ka fituar 66 kupa në futboll e basketboll, gjatë kohës së tij në krye, ku përfshihen edhe shtatë kupa evropiane në futboll. Për Pérez-in, ky rekord është argument për të kundërshtuar narrativën e kritikëve.
Presidenti këmbënguli se janë krijuar edhe grupe që kanë interes të marrin pronësinë e klubit nga anëtarët e tij. Ai sqaroi se në zgjedhje ka një logjikë të qartë: kandidimi është bërë që anëtarët të jenë ata që vendosin. Në këtë kontekst, Pérez iu referua edhe rolit të mediave, duke thënë se gazetaria shpesh mund të krijojë perceptime, por realisht anëtarët duhet të kenë besimin tek drejtimi që zgjedhin. Ai u shpreh se “njerëzit më besojnë mua” dhe se në Madrid anëtarët janë “në krye” për aq kohë sa është ai president. Për ata që duan të kandidojnë, Pérez e trajtoi si një të drejtë të tyre, duke kërkuar vetëm të mos flitet “pas shpine” se gjoja është i lodhur.
Botuar fillimisht në Koha.net
