Hansi Flick doli në një konferencë për media për të folur rreth gjithçkaje që e pret Barcelonën në ndeshjen e fazës së ligës së Ligës së Kampionëve kundër PSG-së. Gjermanit i duhet të përgatisë skuadrën për një përballje që, sipas mënyrës si e përshkruan ai, është ndër më tërheqëset në botë, pikërisht sepse në fushë do të zbresin dy ekipe që renditen në vendin e parë dhe të dytë.
Trajneri foli me superlativa si për PSG-në ashtu edhe për trajnerin Luis Enrique, duke lënë të kuptohet se Barcelona do të përballet me nivelin më të lartë. Por në të njëjtën kohë Flick sqaroi qartë çfarë duhet të bëjë ekipi i tij për të konkurruar në kushte sa më të barabarta. Ai theksoi se skuadra duhet të hyjë në ndeshje me mentalitetin e duhur dhe me plan të qartë loje, pa u shpërqendruar nga emri i kundërshtarit.
“Mendoj se ndeshja e nesërme do të jetë një test i mirë për ne, për të parë se ku jemi. Dua që të luajmë me besim, guxim dhe si një skuadër e bashkuar. Nuk kemi humbur në dhjetë ndeshjet e fundit, por përballemi ndoshta me skuadrën më të mirë të dy viteve të fundit, më të mirën në botë. Është një mundësi e mirë për të parë nivelin tonë dhe çfarë mund të përmirësojmë”, tha Flick.
Flick beson se Barcelona është në një pozicion pozitiv, pavarësisht se sezoni i kaluar ka qenë i vështirë. Sipas tij, këtë sezon ekipi ka luajtur që nga fillimi ashtu siç e ka planifikuar dhe ashtu siç e ka pritur. Ai nënvizoi se ekipi ka shumë besim kur e ka topin dhe krijon raste, duke e parë ndeshjen e nesërme si një sfidë, por jo si një pengesë që e largon fokusin.
Barcelona duhet të jetë e bashkuar përballë PSG-së
“Është krejt ndryshe, por nesër është vetëm një ndeshje. Jemi gati për ta dhe i shoh lojtarët e mi të lumtur që do të përballen me PSG-në”, shtoi trajneri. Në logjikën e tij, përgatitja psikologjike dhe ritmi i lojës janë po aq të rëndësishme sa edhe ekzekutimi në fushë.
Një pjesë e konferencës iu kushtua edhe rreziqeve kryesore që paraqet PSG-ja. Flick u ndal te roli i mesfushës, duke e quajtur atë “zemra e lojës”. Ai theksoi se të dyja skuadrat kanë mesfushorë me cilësi shumë të lartë, por vëmendja kryesore është te mënyra si Barcelona do ta menaxhojë posedimin dhe kontrollin e hapësirave. “Mesfusha është e rëndësishme, është zemra e lojës, dhe të dyja skuadrat kanë mesfushorë të një cilësie shumë të lartë. Natyrisht, posedimi i topit është i rëndësishëm: nëse kundërshtari nuk e ka topin, nuk mund të shënojë, por më pas mund të bësh gabime dhe kundërsulmet e PSG-së janë të jashtëzakonshme. Nuk mund t’ia lejojmë vetes ta humbim topin lehtë ose të bëjmë gabime. Duhet të jemi shumë të përqendruar”, paralajmëroi Flick.
Ai foli edhe për faktin se Barcelona ka pësuar gola në pothuajse çdo ndeshje, duke shpjeguar se luajtja me vijë të lartë mbrojtëse është gjithmonë rrezik, por gjithçka varet nga reagimi kur skuadra humb topin dhe nga ruajtja e distancës mes lojtarëve. Flick tha se, në fund të fundit, rëndësi ka mënyra si e mban ekipi strukturën edhe në momentet kur topi nuk kontrollohet. “Të luash me vijë të lartë mbrojtëse është gjithmonë rrezik, por në fund gjithçka varet nga mënyra se si reagojmë kur e humbim topin dhe si e ruajmë distancën mes vete. Këtë duhet ta bëjmë dhe ta bëjmë mirë. Kemi mbajtur portën të paprekur vetëm në një ndeshje, por gjithashtu kemi shënuar shumë gola”, nënvizoi trajneri.
Flick u ndal edhe te momenti i klubit dhe lidhja me tifozët. Ai vlerësoi respektin dhe dashurinë që ndiejnë tifozët e Barcelonës, por edhe qyteti dhe njerëzit e tij, duke e lidhur këtë mbështetje me mënyrën se si luan ekipi dhe me cilësinë e tij. “E vlerësoj shumë respektin dhe dashurinë që ndiejmë nga tifozët e Barcelonës, nga vetë qyteti dhe njerëzit e tij. Është diçka e mrekullueshme, edhe për mënyrën se si luajmë futboll, për mentalitetin dhe cilësinë tonë. Dhe, natyrisht, edhe sepse fitojmë. Kur fiton, të gjithë janë të lumtur. Jam shumë krenar për ta”, deklaroi ai. Për “El Clasicon”, Flick reagoi me qartësi: “Gjithmonë ndeshja e radhës është më e rëndësishmja, prandaj nesër”.
Në pjesën e fundit të konferencës, Flick u pyet edhe për gjykimin në “Santiago Bernabeu” gjatë ndeshjes mes Real Madridit dhe Sevillas, veçanërisht për ndërhyrjen e Arda Gulerit ndaj Peques. Mesfushori turk e goditi me bërryl futbollistin e Sevillas në një aksion që shkaktoi polemika dhe u kërkua përjashtimi i tij me karton të kuq. Ky debat u pasua edhe nga episode të tjera të diskutueshme në ndeshjen e drejtuar nga Busquets Ferrer, me Cuadra Fernandezin në VAR, çka nxiti kritika nga kampi i Barcelonës për atë që u konsiderua si gjykim në favor të skuadrës madrilene. Megjithatë, Flick shmangu përfshirjen në këtë çështje dhe nuk deshi të komentonte vendimet e gjyqtarëve. Ai tha: “Nuk është pyetje për mua. Për këto çështje duhet të pyesni dikë tjetër. E pashë atë që ndodhi, por nuk më pëlqen të përgjigjem”.
Botuar fillimisht në Bota Sot