Kryeministri Edi Rama ka vlerësuar rolin e Operatorit të Blerjeve të Përqendruara (OBP), duke e parë atë si një nga instrumentet kryesore të reformës në prokurimet publike. Në fokus të deklarimeve të tij ka qenë ndryshimi i mënyrës se si realizohen procedurat e blerjeve publike në Shqipëri, duke e lidhur këtë transformim me rritjen e transparencës dhe përmirësimin e eficiencës në përdorimin e fondeve publike.
Rama tha se krijimi dhe funksionimi i OBP-së ka sjellë një “kapërcim të madh” në procedurat e blerjeve publike. Ai theksoi se te kursimet ekziston një rol i posaçëm i këtij institucioni, duke e cilësuar OBP-në si një mekanizëm që ndihmon në uljen e kostove dhe në standardizimin e procesit të prokurimeve.
Sipas Kryeministrit, një prej ndryshimeve më të rëndësishme lidhet me faktin që ministritë dhe ministrat nuk kanë më lidhje direkte me tenderat. Një pjesë e konsiderueshme e procedurave, sipas tij, po transferohet gradualisht drejt Operatorit të Blerjeve të Përqendruara. Ky zhvendosje nuk synon thjesht centralizim, por ndërtimin e një strukture të specializuar, me ekspertizë të dedikuar për menaxhimin e procedurave komplekse të prokurimit publik.
OBP: kapërcim që të mos bëhen tendera në ministri
“Operatori i Blerjeve të Përqendruara na ka dhënë mundësinë të bëjmë një tjetër kapërcim të madh që të mos bëjmë më tendera në ministri”, deklaroi Rama. Në të njëjtën linjë, ai sqaroi se procesi po vijon të zgjerohet gradualisht edhe drejt agjencive dhe pushtetit vendor. Ky zgjerim, sipas tij, kryhet përmes dialogut dhe bashkëpunimit me njësitë vendore, në mënyrë që të krijohet një model i qëndrueshëm pune dhe koordinimi.
Kryeministri nënvizoi gjithashtu se pushteti vendor ka autonominë e vet. Për këtë arsye, qeveria nuk mund të imponojë mënyrën sesi realizohen tenderat nga autoritetet vendore. Megjithatë, Rama tha se po ndërtohet një model bashkëpunimi që synon rritjen e eficiencës, profesionalizmit dhe standardizimit të procedurave të prokurimit. Në këtë kuadër, logjika është që standardet dhe praktikat e unifikuara të ndikojnë pozitivisht në cilësinë e prokurimeve, pa cenuar kompetencat e institucioneve përkatëse.
Rama theksoi se, në praktikë, prokurimet publike janë shumë më komplekse nga sa perceptohen shpesh në debatin publik. Për këtë arsye, ai vlerësoi se ngritja e një strukture “superspecializuar” si OBP është thelbësore për garantimin e cilësisë dhe transparencës në përdorimin e fondeve publike. Sipas tij, kur procedurat trajtohen nga një institucion me ekspertizë të dedikuar, rritet siguria në proces dhe përmirësohet rezultati për institucionet që përfshihen në blerjet publike.
Operatori i Blerjeve të Përqendruara është një nga strukturat që qeveria ka promovuar vitet e fundit si pjesë e reformës për centralizimin e procedurave të prokurimit. Reforma, sipas të dhënave të publikuara më herët nga vetë institucioni, lidhet edhe me standardizimin e specifikimeve teknike dhe me uljen e kostove për institucionet publike. Në njoftimet e bëra publike, OBP ka raportuar se ka realizuar mbi 1 mijë procedura prokurimi për dhjetëra institucione, duke raportuar mbi 40 milionë euro kursime për buxhetin e shtetit në 2 vite operim. Këto shifra, siç janë paraqitur, e vendosin institucionin në qendër të reformës për mënyrën se si menaxhohen blerjet publike dhe si matet efektiviteti i procesit.
Botuar fillimisht në Bota Sot
