Nicolas Cage ka folur për një periudhë kur mendoi seriozisht të tërhiqej nga aktrimi. Aktori i njohur tha se pas filmit “Dream Scenario” të vitit 2023, kishte nisur të ndiejë se nuk dinte më çfarë tjetër mund të sillte në kinematografi dhe se karriera e tij kishte hyrë në një fazë reflektimi.
62-vjeçari e rrëfeu këtë në një intervistë për Extra. Ai shpjegoi se pas suksesit që pati filmi, u gjend përballë një lloj pasigurie për të ardhmen. Në atë kohë, sipas tij, mendimet e para nuk lidhnin me një projekt të ri, por me idenë e largimit, sepse i dukej sikur kishte arritur një kufi për atë që mund të bënte përmes filmit.
“Po mendoja për pensionimin pas ‘Dream Scenario’, sepse nuk e dija më çfarë tjetër mund të bëja me kinemanë”, deklaroi Cage. Megjithatë, ai theksoi se vendimi për t’u larguar nuk erdhi menjëherë dhe nuk ishte diçka përfundimtare. Aktori tha se më pas e rishikoi mendimin, duke e parë aktrimin si një nevojë që nuk mund ta shmangte.
“Nevoja është nëna e shpikjes” – Cage i hap rrugë projekteve të reja
Pas idesë për pensionim, Cage tha se mendoi ndryshe: “Më pas mendova: ndoshta duhet të vazhdoj të aktroj, sepse e kam të nevojshme. Dhe nevoja është nëna e shpikjes”. Në këtë mënyrë, aktori e lidhi vazhdimin e punës me një shtysë kreative, që e shtynte të kërkonte sfida dhe forma të tjera interpretimi.
Ai tregoi se nisi të mendojë për rrugë të reja artistike përtej formulës që kishte përdorur deri atëherë. “I thashë vetes: mirë, le të provojmë diçka tjetër. Çka vjen më pas? Televizioni. Çka tjetër? Ndoshta teatri”, u shpreh aktori. Edhe pse këto ishin skenarë që i kalonin në mendje, ai la të kuptohej se po i jepte vetes mundësi të reja për t’u testuar në hapësira të ndryshme.
Ndërsa pranoi se “kurrë nuk duhet të thuash kurrë”, Cage tha se mbetet i hapur edhe për një paraqitje të mundshme në teatër. Kjo ide, sipas tij, nuk ishte mbyllur plotësisht si opsion, por ishte lënë si mundësi në të ardhmen, paralelisht me fokusin që po i kushtonte projekteve të reja.
Pas këtyre dyshimeve për karrierën, Nicolas Cage vendosi të hynte në një projekt televiziv. Ai mori pjesë në serialin e ri të Amazon Prime Video “Spider-Noir”, ku interpreton personazhin Spider-Man Noir dhe alter-egon e tij Ben Reilly. Aktori tha se puna në televizion i solli një ndjesi të re vetëbesimi, duke e parë si një sfidë të re dhe si një hap konkret për të provuar diçka ndryshe.
“Po përpiqem të mësoj gjithnjë e më shumë dhe pasi përfundova serialin ‘Spider-Noir’, u ndjeva i fuqizuar. Ndjeva sikur: ‘Wow, ia dola. E përfundova një sezon televiziv’. Nuk është aspak e lehtë”, tregoi Cage. Ai shpjegoi më tej se puna në serial është shumë e ndryshme nga filmat, sepse përfshin regjisorë të ndryshëm dhe një ritëm më intensiv pune.
Sipas aktorit, ky proces i ngjan një mënyre prodhimi që kërkon përshtatje të vazhdueshme. “Është pothuajse si një fabrikë dhe duhet të përshtatesh me atë ritëm, ta bësh të funksionojë dhe njëkohësisht të mbetesh argëtues për publikun”, tha ai. Për Cage, kalimi nga kinemaja te televizionit u shoqërua jo vetëm me ndryshime në mënyrën e punës, por edhe me ndjesinë se po vazhdonte të zhvillohej si artist, pa u ndalur në “Dream Scenario”.
Botuar fillimisht në Koha.net
